ଭୋଗରାଇ,୧୩ା୪(ପ୍ରଦୀପ ଦାସ): ବାଲେଶ୍ୱର ଜିଲା ଭୋଗରାଇ ବ୍ଲକ ସୀମାନ୍ତ ଚନ୍ଦନେଶ୍ୱର ମହାଦେବଙ୍କ ବିଶ୍ୱ ପ୍ରସିଦ୍ଧ ଚୈତ୍ର ଚଡ଼କ ମେଳା ରବିବାର ପ୍ରତିକୂଳ ପାଗ ସତ୍ତ୍ୱେ ଧର୍ମୀୟ ଉତ୍ସାହ ଓ ଉଦ୍ଦୀପନା ମଧ୍ୟରେ ସମାପନ ହୋଇଛି। ଚଳିତ ବର୍ଷ ଦୀର୍ଘ ୧୪ ଦିନ ଧରି ଚାଲିଆସୁଥିବା ଏହି ପ୍ରସିଦ୍ଧ ମେଳାରେ ଓଡିଶା, ପଶ୍ଚିମବଙ୍ଗ, ଝାଡ଼ଖଣ୍ଡ ରାଜ୍ୟରୁ ଲକ୍ଷାଧିକ ଶ୍ରଦ୍ଧାଳୁ ଜୀଉଙ୍କ ମନ୍ଦିରକୁ ଭକ୍ତି ଭାବନା ନେଇଁ ଆସିଥିଲାବେଳେ ଚନ୍ଦନେଶ୍ୱର ୪ କିମି ପରିଧି ମଧ୍ୟରେ ସେବାୟତ, ପଣ୍ଡା, ଅନୁଷ୍ଠାନ ଓ ଲୋକଙ୍କ ଘରେ ଆଶ୍ରୟ ନେଇଥିଲେ। ଶନିବାର ସନ୍ଧ୍ୟାରେ କାଳବୈଶାଖୀ ଝଡ଼ ଯୋଗୁ ମହାନୀଳ ଉତ୍ସବ ଫିକା ପଡ଼ିଥିବା ବେଳେ ରବିବାର ଅସଂଖ୍ୟ ଶ୍ରଦ୍ଧାଳୁ ଜୀଉଙ୍କ ପାଟ ଉତ୍ସବ ଦର୍ଶନ ଲାଗି ଭିଡ ଜମାଇଥିଲେ। ମହାଦେବଙ୍କ ନୀତିକାନ୍ତି ଓ ଚଡ଼କ ମେଳାର ବିଶେଷ ପୂଜା ପାଠ ସେବାୟତ ଓ ପଣ୍ଡାଙ୍କ ଦ୍ୱାରା କରାଯାଇଥିଲା। ଲକ୍ଷ ଲକ୍ଷ ଶୈବଭକ୍ତ ମନ୍ଦିର ଚାରି ପାଖରେ ମହାଦେବଙ୍କୁ ଆରାଧନା କରି ମନ୍ଦିର ପରିକ୍ରମା, ଦଣ୍ଡ ମାରିବା, ନେତ୍ରନାଳରେ ଜଳାଭିଷେକ କରିଥିଲେ। ଅପରାହ୍ନରେ ମହାଦେବଙ୍କଠାରୁ ଆଜ୍ଞାମାଳ ନେଇ ଜୀଉଙ୍କ ମୁଖ୍ୟ ସେବାୟତ ତଥା ମୌରସୀ ତପନ କୁମାର ପଣ୍ଡା ଏବଂ ଉପ ମୌରସୀ ବୁଦ୍ଧଦେବ ପଣ୍ଡା ଜୀଉଙ୍କ ଆଜ୍ଞାମାଳ ନେଇଁ ସେବାୟତ, ପଣ୍ଡା, ପାଟଭକ୍ତ, ଦେଉଳିଆ,ଶ୍ରୀବେକିଡ଼ି, ଟ୍ରଷ୍ଟ ବୋର୍ଡ଼ର ସଦସ୍ୟ ଓ ଶ୍ରଦ୍ଧାଳୁ ମାନେ ଚନ୍ଦନେଶ୍ୱର ନିକଟସ୍ଥ ବାଡ଼ସରିସା ଗ୍ରାମ ଜୀଉଙ୍କ ହାକାଣ୍ଡ ପୋଖରୀରେ ସମବେତ ହୋଇଥିଲେ। ସକାଳଠୁ ରାତି ୮ ଟା ପର୍ଯ୍ୟନ୍ତ ହାକାଣ୍ଡ ପୋଖରୀରେ ମାଳଚନ୍ଦନଉତ୍ସବ ରେ ଶୈବଭକ୍ତ ମାନେ ଆହ୍ଲାଦିତ ହୋଇଥିଲେ। ସମସ୍ତ ଶୈବ ଭକ୍ତ ମାନେ ପରସ୍ପର ମଧ୍ୟରେ ଫୁଲମାଳ ଓ ଚନ୍ଦନ ଲଗାଇ କୋଳାକୋଳି ହୋଇ ଓଡ଼ିଆ ଓ ବଙ୍ଗଭାଷୀଙ୍କ ନବବର୍ଷ ଭାଇଚାରାର ସନ୍ଦେଶ ଅତୁଟ ରହୁ ବୋଲି ଭଗବାନଙ୍କ ଠାରେ ପ୍ରାର୍ଥନା କରିଥିଲେ।
