ଝାରସୁଗୁଡ଼ା ଅଫିସ,୧୧।୧୧: ବେଦାନ୍ତ ଆଲୁମିନିୟମ୍ ଉତ୍ପାଦକ କମ୍ପାନୀ ଝାରସୁଗୁଡ଼ା ପକ୍ଷରୁ ବିଶ୍ୱ ହାତଧୂଆ ଦିବସ ପାଳନ କରାଯାଇଛି। ଏହା ସହ ଏକ ସଚେତନତା ବାର୍ତ୍ତା ଦିଆଯାଇଛି। ଲୋକମାନଙ୍କୁ ହାତ ଧୋଇବା ଓ ସ୍ବଚ୍ଛ ରହିବା ଉପରେ ଏକ ସପ୍ତାହବ୍ୟାପୀ ସଚେତନ ଅଭିଯାନ ଆୟୋଜିତ ହୋଇଥିଲା। ଏହି ଅଭିଯାନରେ ୨୮ଟି ଗ୍ରାମକୁ ସାମିଲ କରାଯାଇଥିଲା। ଏହା ସହ ସ୍କୁଲର ଛାତ୍ରୀଛାତ୍ର, ବୟସ୍କ ବ୍ୟକ୍ତି ପ୍ରାୟ ୧୬ଶହ ଲୋକଙ୍କ ପାଖରେ ଏହି ସଚେତନ ବାର୍ତ୍ତା ଉପସ୍ଥାପନ କରାଯାଇଥିଲା। ଅଭିଯାନର ଏକ ଅଂଶ ଭାବେ କମ୍ପାନୀ କର୍ତ୍ତୃପକ୍ଷ ଗ୍ରାମଗୁଡ଼ିକୁ ଯାଇ ଏହାର ଭ୍ରାମ୍ୟମାଣ ହେଲଥ୍ ୟୁନିଟ୍ ସହାୟତାରେ ହାତ ଧୋଇବାର ୬ଟି ସୋପାନ ଉପରେ ଆଲୋକପାତ କରିଥିଲେ।
ତେବେ ବେଦାନ୍ତର ସ୍ବାସ୍ଥ୍ୟସେବା ପଦକ୍ଷେପ ସମ୍ପର୍କରେ କମ୍ପାନୀ ସିଇଓ ସୁନିଲ ଗୁପ୍ତା କହିଛନ୍ତି ଯେ, ବିଶ୍ୱ ହାତଧୂଆ ଦିବସ ଆମ ଅଞ୍ଚଳର ଲୋକମାନଙ୍କୁ ମୌଳିକ ସ୍ବାସ୍ଥ୍ୟ ଓ ସ୍ବଚ୍ଛତା ଅଭ୍ୟାସ ସମ୍ପର୍କରେ ଏକ ବାର୍ତ୍ତା ଦେଉଛି। ଆମେ ଆଶାକରୁ ଅଞ୍ଚଳର ଲୋକମାନେ ଏହି ମହତ୍ତ୍ୱକୁ ଉପଲବ୍ଧ କରିବେ।