ଜେନେଭା, ୩୦।୫ : ମଙ୍କିପକ୍ସ ସଂକ୍ରମଣ ପୃଥିତ୍ବୀର ବିଭିନନ ଦେଶରେ ବଢ଼ିବାରେ ଲାଗିଛି। ଏନେଇ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ଚିନ୍ତା ପ୍ରକଟ କରାଯାଇଛି। ଇତିମଧ୍ୟରେ ୨୩ଟି ଦେଶରେ ମଙ୍କିପକ୍ସର ୨୫୭ ମାମଲା ନିଶ୍ଚିତ ହୋଇଥିବା ବିଶ୍ୱ ସ୍ବାସ୍ଥ୍ୟ ସଂଗଠନ କହିଛି। ଏଥିସହ ୧୨୦ ଟି ସନ୍ଦିଗ୍ଧ ମାମଲାର ଖବର ସାମ୍ନାକୁ ଆସିଛି। ଆମେରିକାର ରୋଗ ନିୟନ୍ତ୍ରଣ ଏବଂ ନିରାକରଣ କେନ୍ଦ୍ର ପକ୍ଷରୁ ଆଠଟି ରାଜ୍ୟରେ ୧୨ ଟି ମାମଲା ରିପୋର୍ଟ କରାଯାଇଛି।
ବିଶ୍ୱ ସ୍ବାସ୍ଥ୍ୟ ସଂଗଠନ ଅନୁସାରେ ପାଞ୍ଚଟି ଆଫ୍ରିକୀୟ ଦେଶରେ ମଙ୍କିପକ୍ସର ୧୩୬୫ଟି ମାମଲା ପଞ୍ଜିକୃତ ହୋଇଛି। ଏଥିରେ ୬୯ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ଡିସେମ୍ବରରୁ ମେ ମଧ୍ୟରେ ବିଭିନ୍ନ ଦେଶରେ ଏହି ମାମଲା ଦେଖିବାକୁ ମିଳିଛି।
୨୩ ଟି ଦେଶରେ ଏପର୍ଯ୍ୟନ୍ତ ଏଥିଯୋଗୁ କୌଣସି ମୃତ୍ୟୁ ହୋଇନାହିଁ। ବିଶ୍ୱ ସ୍ବାସ୍ଥ୍ୟ ସଂଗଠନ କହିଛି ଯେ ପଶ୍ଚିମ ଆଫ୍ରିକାରେ ମଙ୍କିପକ୍ସ ଥିବା ଲୋକଙ୍କ ମୃତ୍ୟୁ ଅଳ୍ପ ବୟସ କିମ୍ବା ଏଚଆଇଭି ସଂକ୍ରମଣ ଯୋଗୁ ଘଟିଛି। ବିଶ୍ୱ ସ୍ବାସ୍ଥ୍ୟ ସଂଗଠନ କହିଛି ଯେ ପ୍ରଥମ ଥର ଯେ ପଶ୍ଚିମ ଏବଂ ମଧ୍ୟ ଆଫ୍ରିକା ପରି ଭିନ୍ନ ଭୌଗୋଳିକ ଅଞ୍ଚଳରେ ମଙ୍କିପକ୍ସର ମାମଲା ବ୍ୟାପୁଛି। ବିଶ୍ୱ ସ୍ବାସ୍ଥ୍ୟ ସଂଗଠନ ଏନେଇ ସତର୍କ ରହିବାକୁ ଚେତାବନୀ ଦେଇଛି।
