ଇଟାଲୀର ଏକ ବିଳାସପୂର୍ଣ୍ଣ ବ୍ରାଣ୍ଡ୍ ବିଶ୍ୱର ସବୁଠୁ ଦାମୀ ବ୍ୟାଗକୁ ଡିଜାଇନ କରିଛି। କମ୍ପାନୀ ଏହି ବ୍ୟାଗ୍ କିଛିଦିନ ତଳେ ଲଞ୍ଚ କରିଛି। ଏହି ବ୍ୟାଗର ମୂଲ୍ୟ ହଜାରେ କି ଲକ୍ଷେ ନୁହଁ, ୫୩ କୋଟି ଟଙ୍କା। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ। ସମୁଦ୍ର ପ୍ରଦୂଷଣ ରୋକିବା ପାଇଁ ସଚେତନତା ଅଭିଯାନ ସୃଷ୍ଟି କରିବାକୁ ଏହି ବ୍ୟାଗ ତିଆରି କରାଯାଇଛି।
ଇଟାଲୀ ବ୍ରାଣ୍ଡ୍ ବୋରିନି ମିଲେନେସି ୬ ମିଲିୟନ ୟୁରୋ ଅର୍ଥାତ୍ ପ୍ରାୟ ୫୩ କୋଟି ଟଙ୍କା ମୂଲ୍ୟରେ ନିର୍ମିତ ବିଶ୍ୱର ସବୁଠାରୁ ମହଙ୍ଗା ବ୍ୟାଗ୍ ଲଞ୍ଚ୍ କରିଛି। ଏହି ଦେଖିବାକୁ ଖୁବ୍ ସୁନ୍ଦର। ଏଥିରେ ୧୩୦ କ୍ୟାରେଟ୍ ହୀରା ଏବଂ ମୋତି ଆଚ୍ଛାଦିତ ହୋଇଛି।
ଇନ୍ଷ୍ଟାଗ୍ରାମରେ ବୋରିନି ମିଲେନେସି କ୍ୟାପଶନ ଲେଖିଛନ୍ତି, ସମୁଦ୍ରର ସୁରକ୍ଷା ତଥା ସଚେତନତା ସୃଷ୍ଟି କରିବା ପାଇଁ ଆମର ବ୍ୟାଗ୍ ଉନ୍ମୋଚନ କରି ଆମେ ଗର୍ବିତ। ଏହା ଏକ ୬ ମିଲିୟନ ୟୁରୋ ବ୍ୟାଗ। ଏହା ମଧ୍ୟ ଲେଖାଯାଇଛି ଯେ, ସମୁଦ୍ରକୁ ସୁରକ୍ଷା ଯୋଗାଇବା ପାଇଁ ଏହାର ଆୟରୁ ୮୦୦ ହଜାର ୟୁରୋ ଦାନ କରାଯିବ।
ଏହି ବ୍ୟାଗର ସୌନ୍ଦର୍ଯ୍ୟ ଇନ୍ଷ୍ଟାଗ୍ରାମ ପୋଷ୍ଟରେ ଏକ ଭିଡିଓ ମାଧ୍ୟମରେ ଦର୍ଶାଯାଇଛି। ହାଲୁକା ନୀଳ ଦେଖାଯାଉଥିବା ଏହି ବ୍ୟାଗରେ ସୁନାର ପ୍ରଜାପତି ମଧ୍ୟ ଲାଗିଛି। ଯାହା ଖୁବ୍ ଆକର୍ଷଣୀୟ ଲାଗୁଛି। ଏହା ବ୍ୟତୀତ ଏହି ବ୍ୟାଗକୁ ବନ୍ଦ୍ କରିବା ପାଇଁ ଏକ ହୁକ୍ ମଧ୍ୟ ଲଗାଯାଇଛି।
ଇଟାଲୀୟ ବ୍ରାଣ୍ଡ୍ ବୋରିନି ହେଉଛି ମିଲେନେସି ବ୍ୟାଗ୍ ତିଆରି କରୁଥିବା ଏକ ବ୍ରାଣ୍ଡ। କମ୍ପାନୀର ଇନ୍ଷ୍ଟାଗ୍ରାମ ଆକାଉଣ୍ଟରେ ଅନେକ ସୁନ୍ଦର ବ୍ୟାଗ ଶେୟାର କରାଯାଇଛି। ଏଥିରେ ବ୍ୟାଗଗୁଡ଼ିକର ମୂଲ୍ୟ ଏବଂ ଏହା ସମ୍ପର୍କରେ ସୂଚନା ଦିଆଯାଇଛି। ଏହି ବ୍ୟାଗର ମୂଲ୍ୟକୁ ନେଇ ଏବେ ସମଗ୍ର ବିଶ୍ୱରେ ଚର୍ଚ୍ଚା ହେଉଛି।
