ଦୁନିଆ ରହସ୍ୟରେ ପରିପୂର୍ଣ୍ଣ। ବେଳେବେଳେ ଏଭଳି କିଛି ଜିନିଷ ବିଷୟରେ ଜଣାପଡେ, ଯେଉଁ କଥା ଶୁଣି ଲୋକମାନେ ଜାଣି ଆଶ୍ଚର୍ଯ୍ୟ ହୋଇଯାଆନ୍ତି। ଆଜି ଆମେ ଆପଣଙ୍କୁ ଏପରି ଏକ ଗଛ ବିଷୟରେ କହିବାକୁ ଯାଉଛୁ, ଯାହା ବିଷୟରେ ଜାଣି ଆପଣ ଚକିତ ହୋଇପାରନ୍ତି। କାରଣ, ଏହା ଏକ ସାଧାରଣ ଗଛ ନୁହେଁ, ବରଂ ଦୁନିଆର ସବୁଠାରୁ ବିଷାକ୍ତ ଗଛ। ଏହାର ଫଳର ସାମାନ୍ୟ ଖଣ୍ଡଟିଏ ଖାଇଦେଲେ ମୃତ୍ୟୁ ହେବା ସୁନିଶ୍ଚିତ।
ଏହି ବିଶାକ୍ତ ଗଛର ନାମ ହେଉଛି ମଞ୍ଚିନିଲ୍। ଫ୍ଲୋରିଡା ଏବଂ କାରିବିଆନ ସମୁଦ୍ର କୂଳରେ ଏହାକୁ ଦେଖିବାକୁ ମିଳେ। ଗଛର ଉଚ୍ଚତା ୫୦ ଫୁଟ ପର୍ଯ୍ୟନ୍ତ ହୋଇଥାଏ। ଏହାର ପତ୍ରଗୁଡ଼ିକ ଅତ୍ୟନ୍ତ ଚକଚକିଆ ଏବଂ ଗୋଲାକୃତିର। ଏହି ଗଛ ଏତେ ବିଷାକ୍ତ ଯେ ଯଦି କେହି ଏହାର ସଂସ୍ପର୍ଶରେ ଆସନ୍ତି, ତେବେ ଏହା ଶରୀର ଫୁଲି ଯାଇଥାଏ। ଗଛର ପ୍ରତ୍ୟେକ ଅଂଶଠାରୁ ଫଳ ଅଧିକ ବିଷାକ୍ତ। ଫଳର ଗୋଟିଏ ଖଣ୍ଡ ଖାଇବା ଦ୍ୱାରା ମଣିଷର ମୃତ୍ୟୁ ହୋଇଯାଇପାରେ। ଏହି ଗଛ ଏବଂ ଫଳ ବିଷୟରେ ଅନେକ ଗବେଷଣା ମଧ୍ୟ କରାଯାଇଛି। ଦେଖିବାକୁ ଗଲେ ଏହି ଫଳ ସେଓ ପରି । ଖ୍ରୀଷ୍ଟୋଫର୍ କଲମ୍ବସ ଏହି ଫଳକୁ ମୃତ୍ୟୁର ଛୋଟ ସେଓ ବୋଲି କହିଛନ୍ତି।
କେବଳ ଏତିକି ନୁହେଁ, ଯଦି ଗଛର କିଛି ଅଂଶ କୌଣସି ବ୍ୟକ୍ତିଙ୍କ ଆଖି ସଂସ୍ପର୍ଶରେ ଆସେ ତେବେ ସେ ଅନ୍ଧ ହୋଇଯାଇପାରନ୍ତି। ଏହି ଗଛ ଏତେ ବିପଜ୍ଜନକ ଯେ ଲୋକଙ୍କୁ ଏହାର ଆଖପାଖରେ ବୁଲିବାକୁ ଦିଆଯାଇ ନ ଥାଏ। ଗଛ ଚାରିପାଖରେ ସତର୍କତା ବୋର୍ଡ ମଧ୍ୟ ଲଗାଯିବା ସହ ଏଥିରୁ ଦୂରେଇ ରହିବାକୁ ଲୋକଙ୍କୁ ଚେତାବନୀ ଦିଆଯାଇଛି। ନିକୋଲା ଏଚ୍ ଷ୍ଟ୍ରିକଲ୍ୟାଣ୍ଡ ନାମକ ଜଣେ ବୈଜ୍ଞାନିକ କହିଛନ୍ତି ଯେ ଥରେ ସେ ଏବଂ ତାଙ୍କର କିଛି ବନ୍ଧୁ ଟୋବାଗୋ କାରିବିଆନ ଦ୍ୱୀପ କୂଳରେ ଥିଲେ। ସେମାନେ ଭୁଲରେ ଉକ୍ତ ଫଳ ଖାଇଥିଲେ। ଫଳ ଖାଇବାର ଅଳ୍ପ ସମୟ ପରେ ସେମାନଙ୍କ ଶରୀର ଜଳାପୋଡା ହେବା ସହ ଫୁଲିବା ଆରମ୍ଭ କରିଥିଲା। ତେବେ ତୁରନ୍ତ ଚିକିତ୍ସା ପାଇବା ଯୋଗୁ ସେମାନେ ନିଶ୍ଚିତ ମୃତ୍ୟୁରୁ ରକ୍ଷା ପାଇଯାଇଥିଲେ।