ଦୁବାଇ, ୧୦ା୨ (ପି.ଟି.)-ଚେନ୍ନାଇରେ ଅନୁଷ୍ଠିତ ଇଂଲଣ୍ଡ ବିପକ୍ଷ ପ୍ରଥମ କ୍ରିକେଟ ଟେଷ୍ଟରେ ୨୨୭ ରନରେ ପରାଜୟ ଦ୍ୱାରା ଭାରତ ବିଶ୍ୱ ଟେଷ୍ଟ ଚାମ୍ପିୟନଶିପ୍ ର଼୍ୟାଙ୍କିଙ୍ଗ ତାଲିକାରେ ଚତୁର୍ଥ ସ୍ଥାନକୁ ଖସି ଆସିଛି। ଅନ୍ୟପକ୍ଷରେ ଭ୍ରମଣକାରୀ ଦଳର ଉଦ୍ଘାଟନୀ ଇଭେଣ୍ଟର ଫାଇନାଲରେ ପ୍ରବେଶ ଆଶା ଉଜ୍ଜୀବିତ ରହିଛି। ଆଗକୁ ନ୍ୟୁଜିଲାଣ୍ଡର କୌଣସି ସିରିଜ ଖେଳିବାର କାର୍ଯ୍ୟକ୍ରମ ନାହିଁ। ଦଳ କିନ୍ତୁ ଖେଳିସାରିଥିବା ମ୍ୟାଚଗୁଡ଼ିକରୁ ୭୦.୦ ପ୍ରତିଶତ ସ୍କୋର କରି ପ୍ରଥମ ଦଳ ଭାବେ ଚଳିତ ବର୍ଷ ପରବର୍ତ୍ତୀ ଭାଗରେ ଲଡର୍ସଠାରେ ଖେଳାଯିବାକୁ ଥିବା ଟେଷ୍ଟ ଚାମ୍ପିୟନଶିପ୍ ଲାଗି ଯୋଗ୍ୟତା ଅର୍ଜନ କରିସାରିଛି। ଚେପକଠାରେ ବିଜୟ ଦ୍ୱାରା ଟେବୁଲରେ ଇଂଲଣ୍ଡ ପ୍ରତିଶତ ପଏଣ୍ଟ ସହ ଶୀର୍ଷକୁ ଉନ୍ନୀତ ହୋଇପାରିଛି। ଦଳ ଯଦି ଏହି ସିରିଜ ୩-୧, ୩-୦ କିମ୍ବା ୪-୦ରେ ଜିତେ ତେବେ ଫାଇନାଲକୁ ଉନ୍ନୀତ ହୋଇପାରିବ। ଗତ ମାସରେ ଅଷ୍ଟ୍ରେଲିଆ ବିପକ୍ଷରେ ଚମତ୍କାର ସିରିଜ ବିଜୟ ପରେ ଭାରତ ଟେବୁଲର ଶୀର୍ଷ ସ୍ଥାନ ଅଧିକାର କରିନେଇଥିଲା। ମାତ୍ର ଇଂଲଣ୍ଡ ବିପକ୍ଷ ଓପନିଂ ଟେଷ୍ଟରେ ପରାଜୟ ଦ୍ୱାରା ଭାରତ ୬୮.୩ ପ୍ରତିଶତ ପଏଣ୍ଟ ସହ ଚତୁର୍ଥ ସ୍ଥାନକୁ ଖସି ଆସିଛି। ଭାରତ ଯଦି ଅବଶିଷ୍ଟ ତିନୋଟି ମ୍ୟାଚ ମଧ୍ୟରୁ ଅତିକମ୍ରେ ଦୁଇଟିରେ ବିଜୟ ହାସଲ ସହ ସିରିଜ ୨-୧ କିମ୍ବା ୩-୧ରେ ଜିତେ ତେବେ ଫାଇନାଲ ପାଇଁ ଯୋଗ୍ୟତା ଅର୍ଜନ କରିପାରିବ। ଅନ୍ୟପକ୍ଷରେ ଭାରତ-ଇଂଲଣ୍ଡ ସିରିଜ ଯଦି ଡ୍ର ରୁହେ ଅବା ଇଂଲଣ୍ଡ ଏଥିରେ ୧-୦, ୨-୧ ଅବା ୨-୦ରେ ବିଜୟ ଲାଭ କରେ ତେବେ ଅଷ୍ଟ୍ରେଲିଆ ଫାଇନାଲ ପାଇଁ ଯୋଗ୍ୟତା ଅର୍ଜନ କରିବ ବୋଲି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ପକ୍ଷରୁ ଏକ ପ୍ରେସ୍ ରିଲିଜ୍ରେ କୁହାଯାଇଛି। ଅନ୍ୟପକ୍ଷରେ ଦକ୍ଷିଣ ଆଫ୍ରିକା ବିପକ୍ଷ ଘରୋଇ ସିରିଜ ୨-୦ରେ ଜିତିବା ଦ୍ୱାରା ପାକିସ୍ତାନ ୪୩.୩ ପ୍ରତିଶତ ପଏଣ୍ଟ ସହ ୫ମ ସ୍ଥାନରେ ରହିଥିବା ବେଳେ ଦକ୍ଷିଣ ଆଫ୍ରିକା ୩୦.୦ ପ୍ରତିଶତ ପଏଣ୍ଟ ସହ ୬ଷ୍ଠ ସ୍ଥାନକୁ ଖସି ଆସିଛି। ବାଂଲାଦେଶ ବିପକ୍ଷ ପ୍ରଥମ ଟେଷ୍ଟରେ ଆକର୍ଷଣୀୟ ବିଜୟ ପରେ ଓ୍ବେଷ୍ଟଇଣ୍ଡିଜ ଟେବୁଲର ୭ମ ସ୍ଥାନରେ ରହିଛି। ବାଂଲାଦେଶ ଏପର୍ଯ୍ୟନ୍ତ କୌଣସି ପଏଣ୍ଟ ଅର୍ଜନ ନ କରି ଟେବୁଲର ସର୍ବନିମ୍ନ ସ୍ଥାନରେ ରହିଛି।