ନୂଆଦିଲ୍ଲୀ,୧୨।୫(ପି.ଟି.): ନ୍ୟୁଜିଲାଣ୍ଡ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନ୍ଶିପ୍ (ଡବ୍ଲ୍ୟଟିସି) ଫାଇନାଲ୍ସ ପାଇଁ ଭାରତୀୟ ଦଳ ଘୋଷଣା କରାଯାଇଛି। ଏହି ଦଳରେ କୌଣସି ରିଷ୍ଟ ସ୍ପିନର ସ୍ଥାନ ପାଇ ନ ଥିବାରୁ ପାକିସ୍ତାନ ପୂର୍ବତନ ଲେଗ୍ ସ୍ପିନର ଡାନିଶ କାନେରିଆ ଚିନ୍ତାବ୍ୟକ୍ତ କରିଛନ୍ତି। ଏହା ଭାରତ ପାଇଁ ସମସ୍ୟା ସୃଷ୍ଟି କରିପାରେ। ଯୁବ ରିଷ୍ଟ ସ୍ପିନର ରାହୁଲ ଚହର ସାମିଲ ହୋଇଥିଲେ ଭାରତର ବୋଲିଂ ଆଟାକ ଆହୁରି ଶକ୍ତିଶାଳୀ ହୋଇଥାନ୍ତା ବୋଲି କାନେରିଆ କହିଛନ୍ତି।
ଇଂଲଣ୍ଡର ସାଉଥାମ୍ପଟନଠାରେ ଡବ୍ଲ୍ୟୁଟିସି ଫାଇନାଲ ଜୁନ୍ ୧୮ରୁ ଆରମ୍ଭ ହେବ। ଭାରତ ମଧ୍ୟ ଏହି ହାଇପ୍ରୋଫାଇଲ ମ୍ୟାଚ୍ ସହ ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ପାଇଁ ଦଳ ଘୋଷଣା କରିଥିଲା। ଏହି ସିରିଜ ଅଗଷ୍ଟ ୪ରୁ ଆରମ୍ଭ ହେବ। ଘୋଷିତ ଭାରତୀୟ ଦଳ ନିଶ୍ଚିତ ଭାବେ ଶକ୍ତିଶାଳୀ। ତେବେ ଏହି ଦଳରେ କୌଣସି ରିଷ୍ଟ ସ୍ପିନର ସ୍ଥାନ ନ ପାଇବା ଆଶ୍ଚର୍ଯ୍ୟଜନକ ବୋଲି ସେ ମନ୍ତବ୍ୟ ଦେଇଛନ୍ତି। ଦଳରେ ଅଭିଜ୍ଞ ରବିଚନ୍ଦ୍ରନ ଅଶ୍ୱିନ, ଓ୍ବାଶିଂଟନ ସୁନ୍ଦର, ଅକ୍ଷର ପଟେଲ ଓ ରବୀନ୍ଦ୍ର ଜାଡେଜାଙ୍କ ଭଳି ବିଶ୍ୱସ୍ତରୀୟ ସ୍ପିନର ରହିଛନ୍ତି। ଇଂଲଣ୍ଡ ଜଳବାୟୁରେ ଲେଗ୍ ବ୍ରେକ୍ ବୋଲର ନିର୍ଣ୍ଣାୟକ ଭୂମିକା ଗ୍ରହଣ କରିଥାନ୍ତି ବୋଲି ସେ କହିଛନ୍ତି। ସିଜନ ଆରମ୍ଭ ହେଲେ ଉଇକେଟରେ ଆର୍ଦ୍ରତା ରହିଥାଏ। ଦ୍ରୁତ ବୋଲରମାନଙ୍କ ପାଇଁ ସୁବିଧାଜନକ ସ୍ଥିତି ରହିଥିଲେ ମଧ୍ୟ ଲେଗ୍ ସ୍ପିନରମାନେ ମଧ୍ୟ ସଫଳତା ପାଇଥାନ୍ତି। ଦୀପକ ଚହର ଦଳରେ ସାମିଲ ହୋଇଥିଲେ ନିଶ୍ଚିତ ଭାବେ ଇଂଲଣ୍ଡରେ ଭଲ ପ୍ରଦର୍ଶନ କରିଥାନ୍ତେ। ନ୍ୟୁଜିଲାଣ୍ଡ ଦଳରେ ଇସ୍ ସୋଧିଙ୍କ ଭଳି ଲେଗ୍ ସ୍ପିନର ରହିଛନ୍ତି। ଚହରଙ୍କ ଉଚ୍ଚତା ଓ ବୋଲିଂ ଶୈଳୀ ବେଶ୍ ଆକର୍ଷଣୀୟ ବୋଲି ୪୦ ବର୍ଷୀୟ କାନେରିଆ କହିଛନ୍ତି। ଗୁଗ୍ଲି, ଫ୍ଲିପର ପକାଇବା ସହ ୨୧ ବର୍ଷୀୟ ଚହର ଭଲ ଲେଗ୍ ସ୍ପିନ ମଧ୍ୟ ପକାଇଥାନ୍ତି।
ଭାରତ ଟେଷ୍ଟରେ ଭଲ ପ୍ରଦର୍ଶନ କରୁଥିଲେ ମଧ୍ୟ ନ୍ୟୁଜିଲାଣ୍ଡ ବିପକ୍ଷରେ କଡ଼ା ଚ୍ୟାଲେଞ୍ଜର ସମ୍ମୁଖୀନ ହେବ। ରିଷଭ ପନ୍ତ ଭଲ ଖେଳିଥିଲେ ମଧ୍ୟ ଅଜିଙ୍କ୍ୟ ରାହାନେ ଓ ଚେତେଶ୍ୱର ପୂଜାରା ଆଶାନୂରୂପ ପ୍ରଦର୍ଶନ କରିପାରି ନ ଥିଲେ। ବୋଲରଙ୍କୁ ନେଇ ଟେଷ୍ଟରେ ବିଜୟ ହାସଲ କରାଯାଇଥାଏ। ଦଳରେ ୫ଜଣ ବିଶ୍ୱସ୍ତରୀୟ ବୋଲର ଥିଲେ ୨୦ଟି ଉଇକେଟ ଅକ୍ତିଆର କରିହେବ ଓ ମ୍ୟାଚ୍ ଜିତିବାରେ କୌଣସି ଅସୁବିଧା ରହିବ ନାହିଁ ବୋଲି କାନେରିଆ କହିଛନ୍ତି।