ଓ୍ବେଲିଂଟନ୍, ୭ା୧୧: ନ୍ୟୁଜିଲାଣ୍ଡର ହାମିଲଟନ୍ରେ ରହୁଥିବା ଏକ ଦମ୍ପତି ବଗିଚାରୁ ଏକ ବଡ଼ ଆକାରର ଆଳୁ ଖୋଳି ବାହାର କରିଛନ୍ତି। ଏହାର ଓଜନ ୭.୮ କିଲୋଗ୍ରାମ୍ ରହିଛି। ସମ୍ପୃକ୍ତ ଦମ୍ପତି କୋଲିନ୍ ଏବଂ ଡୋନା କ୍ରେଗ୍-ବ୍ରାଉନ୍ ଆଳୁର ନାମ ଡଗ୍ ରଖିଛନ୍ତି। ଏବେ ସୁଦ୍ଧା ଗିନିଜ୍ ବୁକ୍ ଓ୍ବାଲର୍ଡ ରେକର୍ଡରେ ସ୍ଥାନିତ ହୋଇଥିବା ଆଳୁର ସର୍ବାଧିକ ଓଜନ ପ୍ରାୟ ୫ କେ.ଜି. ରହିଛି। ତେଣୁ ‘ଡଗ୍’କୁ ଗିନିଜ୍ ଓ୍ବାଲର୍ଡ ରେକର୍ଡରେ ସାମିଲ କରାଯିବାକୁ ସେମାନେ ଆବଦେନ କରିଛନ୍ତି। ଗତ ଅଗଷ୍ଟ ୩୦ରେ ଉଭୟେ ବଗିଚାରେ ମାଟି ଖୋଳି କିଛି ମଞ୍ଜି ପକାଉଥିବାବେଳେ କିଛି ବଡ଼ ଧରଣର ଜିନିଷ ତଳେ ଥିବା ଜାଣିବାକୁ ପାଇଥିଲେ। ଅଧିକ ଖୋଳିବା ପରେ କୁକୁର ପରି ଦେଖାଯାଉଥିବା ଏହି ଆଳୁ ମିିଳିଥିଲା। ଏତେ ବଡଧରଣର ଆଳୁ ଦେଖିବା ପରେ ଉଭୟେ ଆଶ୍ଚର୍ଯ୍ୟ ହୋଇଯାଇଥିଲେ। ପରେ ସେମାନେ ସେଥିରେ ଟୋପି ପିନ୍ଧାଇ ତାହାକୁ କୁକୁର ପରି ସଜାଇଥିଲେ। ୨୦୧୧ରେ ବ୍ରିଟେନରୁ ମିଳିଥିବା ଆଳୁ ଗିନିଜ୍ ଓ୍ବାଲର୍ଡ ରେକର୍ଡ କରିଥିଲା। ଏହାର ଓଜନ ୫ କେଜି ତଳେ ରହିଥିଲା। ଏବେ ସୁଦ୍ଧା ବ୍ରିଟେନରୁ ମିଳିଥିବା ଆଳୁ ହିଁ ଏହି ରେକର୍ଡରେ ରହିଛି ବୋଲି ଗିନିଜ୍ ବୁକ୍ ଅଫିସିଆଲ ପକ୍ଷରୁ କୁହାଯାଇଛି। ଏ ନେଇ କୋଲିନ୍ କୁହନ୍ତି, ଏଭଳି ଆଳୁ ଫଳିବା ପାଇଁ ସେ କୌଣସି ସ୍ବତନ୍ତ୍ର କୌଶଳ ଆପଣାଇନାହାନ୍ତି। ଏପରିକି ସେ ବଗିଚାରେ ଆଳୁ ଚାଷ ମଧ୍ୟ କରିନାହାନ୍ତି। ସେଠାରେ ଲାଗିଥିବା ଅନ୍ୟ ଚାରାଗୁଡ଼ିକୁ ବଢ଼ାଇବା ପାଇଁ କେବଳ କିଛି ଜୈବିକ ଖତ ଆଦି ବଗିଚାରେ ପକାଇଦେଇଥାନ୍ତି। ତେଣୁ ଏଭଳି ଧରଣର ଆଳୁ ଆପେଆପେ ହିଁ ସେଠାରେ ଫଳିଛି ବୋଲି କୋଲିନ୍ କହିଛନ୍ତି। ଏତେ ବଡ଼ ଆକାରରେ ଫଳିବା ପାଇଁ ଏହାକୁ ବର୍ଷେ କିମ୍ବା ଅଧିକ ସମୟ ଲାଗିଥାଇପାରେ। ଏଭଳି ଅଦ୍ଭୁତ ପ୍ରକାରର ଆଳୁର ଫଟୋ ଏବେ ସୋସିଆଲ ମିଡିଆରେ ଭାଇରାଲ ହୋଇଛି। ଅନେକ ଏହି ଆଳୁ ଦେଖି ଆଶ୍ଚର୍ଯ୍ୟ ହୋଇଥିବାବେଳେ କେତେଜଣ ସବୁଠାରୁ ଅସୁନ୍ଦର ଆଳୁ ବୋଲି କହିଛନ୍ତି। ଏଥିରେ ପଟୋଟୋ ଭୋଡ୍କା ପ୍ରସ୍ତୁତ କରିବାକୁ ଚାହଁାନ୍ତି ବୋଲି କୋଲିନ୍ କହିଛନ୍ତି।