ଷ୍ଟକହୋମ୍, ୨୬।୪ : ପୃଥିବୀର ବିଭିନ୍ନ ଦେଶର ସାମରିକ ଖର୍ଚ୍ଚରେ ବୃଦ୍ଧି ଘଟିଛି। ମଙ୍ଗଳବାର ସ୍ବିଡେନର ଷ୍ଟକହୋମ୍ ଇଣ୍ଟରନ୍ୟାଶନାଲ ପିସ୍ ରିସର୍ଚ୍ଚ ଇନଷ୍ଟିଚ୍ୟୁଟ୍ (ଏସଆଇପିଆର୍ଆଇ) ଦ୍ୱାରା ପ୍ରକାଶିତ ଏକ ରିପୋର୍ଟରେ ଏହା ଉଲ୍ଲେଖ କରାଯାଇଛି। ରିପୋର୍ଟ ଅନୁସାରେ ୨୦୨୧ରେ ପୃଥିବୀର ବିଭିନ୍ନ ଦେଶର ମୋଟ ସାମରିକ ଖର୍ଚ୍ଚ ପରିମାଣ ୨,୧୧୩ ଶହ କୋଟି ଡଲାର ଛୁଇଁଛି।
ସାମରିକ ଖର୍ଚ୍ଚରେ ଆଗୁଆ ଥିବା ୧୫ ଦେଶ ମଧ୍ୟରେ ଶୀର୍ଷରେ ଆମେରିକା ରହିଛି। ଆମେରିକା ୨୦୨୧ରେ ୮୦୧ ଶହ କୋଟି ଡଲାର ଖର୍ଚ୍ଚ କରିଥିଲା। ଏହା ପଛକୁ ଦ୍ୱିତୀୟ ସ୍ଥାନରେ ଚାଇନା ରହିଛି। ଚାଇନା ୨୯୩ ଶହ କୋଟି ଡଲାର ଖର୍ଚ୍ଚ କରିଥିବାବେଳେ ତାଲିକାରେ ତୃତୀୟ ସ୍ଥାନରେ ଭାରତ ରହିଛି। ୨୦୨୧ରେ ଭାରତ ସାମରିକ କ୍ଷେତ୍ରରେ ୭୬.୬ ଶହ କୋଟି ଡଲାର ଖର୍ଚ୍ଚ କରିଛି। ସାମରିକ ଖର୍ଚ୍ଚରେ ପୃଥିବୀରେ ଆମେରିକାର ଶେୟାର ୩୮ ପ୍ରତିଶତ ଥବାବେଳେ ଚାଇନାର ୧୪ ପ୍ରତିଶତ ରହିଛି ବୋଲି ରିପୋର୍ଟରେ ଉଲ୍ଲେଖ କରାଯାଇଛି
। ସେହିପରି ଭାରତର ସାମରିକ ଖର୍ଚ୍ଚ ୨୦୨୦ ତୁଳନାରେ ୦.୯ ପ୍ରତିଶତ ବୃଦ୍ଧି ହୋଇଥିବାବେଳେ ୨୦୧୨ଠାରୁ ୩୩ ପ୍ରତିଶତ ବଢ଼ିଛି। ୨୦୨୧ରେ ଭାରତର ଶେୟାର ୩.୬ ପ୍ରତିଶତ ରହିଥିଲା। ୨୦୨୧ରେ ଶୀର୍ଷରେ ଥିବା ୫ ଦେଶ ସାମରିକ କ୍ଷେତ୍ରରେ ମୋଟ ୧,୩୦୫ ଶହ କୋଟି ଡଲାର ଖର୍ଚ୍ଚ କରିଥିବା ରିପୋର୍ଟରେ ପ୍ରକାଶ ପାଇଛି। ଅପରପକ୍ଷରେ ଶୀର୍ଷ ୧୫ ଦେଶର ଖର୍ଚ୍ଚ ୧୭୧୭ ଶହ କୋଟି ଡଲାର ଛୁଇଁଥିବାବେଳେ ଏହା ପୃଥିବୀର ମୋଟ ସାମରିକ ଖର୍ଚ୍ଚର ୮୧ ପ୍ରତିଶତ ରହିଛି।
ଗତ ୨୦ ବର୍ଷ ମଧ୍ୟରେ ଇରାନ ପ୍ରଥମ ଥର ପାଇଁ ଶୀର୍ଷ ୧୫ ଦେଶ ମଧ୍ୟରେ ରହିଛି। ଏହାର ସାମରିକ ଖର୍ଚ୍ଚ ୨୦୨୧ରେ ୧୧ ପ୍ରତିଶତ ବୃଦ୍ଧି ପାଇଛି। ଏହା ମୋଟ ୨୪.୬ ଶହ କୋଟି ଡଲାର ଖର୍ଚ୍ଚ କରିଛି। ୨୦୨୧ରେ ଇରାନ ଶେୟାର ୧.୨ ପ୍ରତିଶତ ରହିଥିଲା। ସେହିପରି ୧୫ତମ ସ୍ଥାନରେ ଥିବା ଇସ୍ରାଏଲର ସାମରିକ ଖର୍ଚ୍ଚ ୨୦୨୧ରେ ୨୪.୩ ଶହ କୋଟି ଡଲାର ଥିବାବେଳେ ଏହାର ଶେୟାର ୧.୨ ପ୍ରତିଶତ ରହିଛି। କରୋନା ମହାମାରୀ ସତ୍ତ୍ୱେ ବିଭିନ୍ନ ଦେଶର ସାମରିକ ଖର୍ଚ୍ଚ ବଢ଼ିଥିବା ରିପୋର୍ଟରେ ଦର୍ଶାଯାଇଛି। ୨୦୧୫ ପରଠାରୁ ବିଭିନ୍ନ ଦେଶର ସାମରିକ ଖର୍ଚ୍ଚ ବଢ଼ିଥିବା ରିପୋର୍ଟରେ ପ୍ରକାଶ ପାଇଛି।
