ପ୍ୟାରିସ, ୩।୯: ଫ୍ରାନ୍ସର ଜଣାଶୁଣା ପ୍ରଫେଶନାଲ ଫୁଟ୍ବଲ କ୍ଲବ ପ୍ୟାରିସ ସେଣ୍ଟ-ଜର୍ମେନ (ପିଏସ୍ଜି)ର ୩ଜଣ ଖେଳାଳି କରୋନା ଭାଇରସ୍ ଦ୍ୱାରା ଆକ୍ରାନ୍ତ ହୋଇଥିବା ଜଣାପଡ଼ିଛି। ପିଏସ୍ଜି ପକ୍ଷରୁ ଏନେଇ ସୂଚନା ଦିଆଯାଇଛି। କିନ୍ତୁ କେଉଁ ଖେଳାଳି କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ପିଏସ୍ଜି ପକ୍ଷରୁ ସେମାନଙ୍କ ନାମ ଉଲ୍ଲେଖ କରାଯାଇନାହିଁ। ତେବେ ସ୍ପୋଟର୍ସ ଡେଲୀ ଏଲ୍କ୍ୟୁପ୍ ପକ୍ଷରୁ ପ୍ରକାଶିତ ଏହାର ରିପୋର୍ଟରେ ଉଲ୍ଲେଖ କରାଯାଇଛି ଯେ, ବିଶ୍ୱର ସବୁଠାରୁ ଦାମୀ ଫୁଟ୍ବଲର୍ ନେମାର କରୋନା ପଜିଟିଭ ଚିହ୍ନଟ ହୋଇଛନ୍ତି। ଏହି ରିପୋର୍ଟ ମୁତାବକ, ବ୍ରାଜିଲ ସୁପର୍ଷ୍ଟାର୍ ନେମାରଙ୍କ ବ୍ୟତୀତ ପିଏସ୍ଜିର ଆଉ ୨ଜଣ ଖେଳାଳି ଆଞ୍ଜେଲ ଡି ମାରିଆ ଓ ଲେଣ୍ଡ୍ରୋ ପାରେଡସ୍ ମଧ୍ୟ କରୋନା ସଂକ୍ରମିତ ହୋଇଛନ୍ତି। ଏ ୩ଜଣ ଖେଳାଳି ନିକଟରେ ସ୍ପେନର ଏକ ଦ୍ୱୀପକୁ ଛୁଟି କାଟିବାକୁ ଯାଇଥିଲେ। କରୋନା ଆକ୍ରାନ୍ତ ସମସ୍ତ ୩ଜଣ ଖେଳାଳି ବର୍ତ୍ତମାନ ୧୪ ଦିନ ପାଇଁ ସେଲ୍ଫ ଆଇସୋଲେଶନରେ ରହିଛନ୍ତି। ସେପ୍ଟେମ୍ବର ୧୦ରୁ ଫ୍ରେଞ୍ଚ୍ ଲିଗ୍ ଆରମ୍ଭ ହେଉଥିବାବେଳେ ଏହି ୩ ଖେଳାଳି ପ୍ରାରମ୍ଭିକ ପର୍ଯ୍ୟାୟରେ କେତୋଟି ମ୍ୟାଚ୍ ଖେଳିବାରୁ ବଞ୍ଚିତ ହୋଇପାରନ୍ତି। ଏଠାରେ ଉଲ୍ଲେଖଯୋଗ୍ୟ, ବ୍ରାଜିଲ ଷ୍ଟାର୍ ନେମାର ବିଶ୍ୱର ସବୁଠାରୁ ଦାମୀ ଫୁଟ୍ବଲ ଖେଳାଳି ହେବାର ସୌଭାଗ୍ୟ ଲାଭ କରିଛନ୍ତି। ବାର୍ସିଲୋନାରେ ୪ ବର୍ଷ ବିତାଇବା ପରେ ୨୦୧୭ରେ ପିଏସ୍ଜି କ୍ଲବ ତାଙ୍କୁ ୧୯.୮ କୋଟି ଡଲାର ମୂଲ୍ୟରେ ଚୁକ୍ତି କରିଥିଲା।