ଛେଣ୍ଡିପଦା, ୧୫ା୧୧ (ସ୍ବ.ପ୍ର.): ରାତି ହେଲେ ଧାନ ବିଲରେ ପଶୁଛନ୍ତି ବାର୍ହା ପଲ। ଏକର ଏକର ଜମିରେ ଫସଲ ନଷ୍ଟ କରୁଛନ୍ତି ଏହି ଜଙ୍ଗଲୀ ଜନ୍ତୁ। ବାରମ୍ବାର ଅଭିଯୋଗ କଲେ ମଧ୍ୟ ସ୍ଥାୟୀ ପ୍ରତିକାର ବ୍ୟବସ୍ଥା କରୁନି ବନ ବିଭାଗ। ଏପରି କି ବାର୍ହା ଘଉଡ଼ାଇବାକୁ ଚାଷୀଙ୍କୁ ବାଣ, ଲାଇଟ୍ ଆଦି ଯୋଗାଇ ଦିଆଯାଉ ନାହିଁ। କ୍ଷୟକ୍ଷତିର ଉପଯୁକ୍ତ ଆକଳନ ସହ ଆବଶ୍ୟକ କ୍ଷତିପୂରଣ ପ୍ରଦାନ କରାଯାଉ ନାହିଁ। ଫଳରେ ଉଜୁଡ଼ା ଫସଲ ଦେଖି କରଜ କରି ଧାନ ଚାଷ କରିଥିବା ଚାଷୀ ମୁଣ୍ଡରେ ପଡ଼ୁଛି ଚଡ଼କ।
ବାର୍ହା ଉପଦ୍ରବକୁ ନେଇ ବର୍ଷ ବର୍ଷ ଧରି ଏପରି ହଇରାଣ ହେଉଛନ୍ତି ଅନୁଗୋଳ ଜିଲା ଛେଣ୍ଡିପଦା ବନାଞ୍ଚଳର ଚାଷୀ। କେତେବେଳେ ହାତୀ ତ ପୁଣି ବାର୍ହା ଦ୍ୱାରା ଫସଲ ନଷ୍ଟ ହେଉଛି। ଏହାକୁ ନେଇ ଚିନ୍ତାରେ ପଡ଼ିଛନ୍ତି ଛେଣ୍ଡିପଦା ବ୍ଲକର କୋଶଳା ବହିଆଳି, ମୁଣ୍ଡାମାଳ, ଷଣ୍ଡପାଳ, ଭାଗଲକଟା, ବ୍ରାହ୍ମଣବିଲ, କଙ୍କୁରପାଳ, କମ୍ପସଲା, ବାହାଳସାହି, ଚାଙ୍ଗୁଡିଆ, ବରପଦା, କୋରଡା, କୁଶକିଳା, ତେଣ୍ଟୁଲୋଇ, ବାଲିପଟା, କିସିଣ୍ଡା, ଶିମିଳିପାଳ, ଦୁବନାଳି, ଫୁଲଝରୀ, ବସନ୍ତପୁର, ପାଟକମୁଣ୍ଡା ଆଦି ପ୍ରାୟ ୫୦ରୁ ଅଧିକ ଗ୍ରାମର ଚାଷୀ। ଜଙ୍ଗଲ ନିକଟସ୍ଥ ଜମିରେ ଏମାନେ ଚାଷ କରିଥିବାରୁ ବହୁ ସଂଖ୍ୟାରେ ବାର୍ହା ପଲ ଧାନ, ଚିନାବାଦାମ, ପରିବା ଫସଲ ଖାଇ ନଷ୍ଟ କରିଦେଉଛନ୍ତି। ଗତ କିଛିମାସ ହେବ କୋଶଳା ରିସର୍ଚ୍ଚ ନର୍ସରି ଚତୁଃପାର୍ଶ୍ୱରେ ଥିବା ଜମି ଗୁଡିକରୁ ବହୁ ଧାନ ଫସଲଖାଇ ନଷ୍ଟ କଲେଣି ଏହି ଜଙ୍ଗଲି ଜନ୍ତୁ। ତେଣୁ ଚାଷୀମାନେ ସେମାନଙ୍କ ଫସଲକୁ ରକ୍ଷା କରିବା ପାଇଁ ମଞ୍ଚାମାନ ତିଆରି କରି ଜଗି ରହୁଛନ୍ତି। ଗତ ଶୁକ୍ରବାର ରାତିରେ କୋଶଳା ଚନ୍ଦନ ନଗରଠାରେ ଥିବା ମୁଣ୍ଡାମାଳ ଜମିରେ ବାର୍ହା ପଲ ପଶି ବହୁ ଏକର ଜମିରେ ଫସଲ ନଷ୍ଟ କରିଛନ୍ତି। ଏ ନେଇ ଚାଷୀମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖା ଦେଇଛି। ଏପରିକି ଅନେକ ଥର ବାର୍ହାପଲଙ୍କୁ ଘଉଡାଇବା ବେଳେ ସେମାନେ ଆକ୍ରମଣର ଶିକାର ହେଉଛନ୍ତି। ଗତ ଫେବୃୟାରୀରେ ଜରପଡା ବନାଞ୍ଚଳ ଜେରେଙ୍ଗ ଗୋପୀନାଥପୁର ଗ୍ରାମର ସନୁ ସାହୁ ଗ୍ରାମ ନିକଟସ୍ଥ ବୁଢ଼ୀ ମୁଣ୍ଡିଆ ପାହାଡ଼ ପାଖ ବଗିଚାକୁ ଯାଉଥିବାବେଳେ ବାର୍ହା ଆକ୍ରମଣ କରିଥିଲା। ଫଳରେ ଘଟଣାସ୍ଥଳରେ ସନୁଙ୍କ ମୃତ୍ୟୁ ହୋଇଥିଲା। ସେହିପରି ବସନ୍ତପୁର ଗ୍ରାମର ସ୍ବପ୍ନେଶ୍ୱରଙ୍କ ପୁତ୍ର ବିଶ୍ୱନାଥ ସାହୁ ବାର୍ହା ଆକ୍ରମଣର ଶିକାର ହୋଇଥିଲେ। ତଥାପି ଫସଲ ବଞ୍ଚାଇବାକୁ ରାତି ଅନିଦ୍ରା ହୋଇ ଜମି ନିକଟରେ ଚାଷୀମାନେ ଜଗି ବସିବାକୁ ବାଧ୍ୟ ହେଉଛନ୍ତି।