ପାରଳାଖେମୁଣ୍ଡି,୨୬ା୬ (ଗିରିଧାରୀ ପରିଛା): ମାଧ୍ୟମିକ ଶିକ୍ଷା ବୋର୍ଡ ପକ୍ଷରୁ ଆୟୋଜିତ ଓଟିଇଟି ପରୀକ୍ଷାକୁ ନେଇ ଏବେ ଚିନ୍ତାରେ ପଡ଼ିଛନ୍ତି ବହୁ ପରୀକ୍ଷାର୍ଥୀ। ଗୋଟିଏ ଦିନରେ ୨ଟି ପେପର ପାଇଁ ପରୀକ୍ଷା ହେବାକୁ ଯାଉଥିବା ବେଳେ ପରୀକ୍ଷା କେନ୍ଦ୍ର ଭିନ୍ନ ଭିନ୍ନ ସହରରେ ପଡ଼ିଥିବାରୁ ପରୀକ୍ଷାର୍ଥୀଙ୍କ ସମସ୍ୟା ବଢ଼ି ଯାଇଛି। ମାଧ୍ୟମିକ ଶିକ୍ଷା ବୋର୍ଡର ଏଭଳି ଅଜବ ନୀତି ଅନେକଙ୍କୁ ଆଶ୍ଚର୍ଯ୍ୟ କରିଛି । ପ୍ରକାଶ ଥାଉକି ଆସନ୍ତା ଜୁଲାଇ ୧ ତାରିଖରେ ଓଟିଇଟି ପରୀକ୍ଷା ଅନୁଷ୍ଠିତ ହେବ । ଏହି ପରୀକ୍ଷା ଦେବା ପାଇଁ ଆବେଦନ କରିଥିବା ପରୀକ୍ଷାର୍ଥୀଙ୍କ ଆଡମିଟ କାର୍ଡ ଆସିଯାଇଛି। ହେଲେ ଆଡମିଟ କାର୍ଡରେ ଯେଉଁ ଯେଉଁ ସ୍ଥାନରେ ପରୀକ୍ଷା ସେଣ୍ଟର ହେଇଥିବା ଉଲ୍ଲେଖ ରହିଛି ତାକୁ ନେଇ ହିଁ ବିଦ୍ୟାର୍ଥୀଙ୍କ ଚିନ୍ତା ବଢିଯାଉଛି। ପାରଳାଖେମୁଣ୍ଡିର ଗୌରଚନ୍ଦ୍ର ସାହିର ସାଗରୀକା ମିଶ୍ର ଚଳିତ ଥର ଓଟିଇଟି ପରୀକ୍ଷାର ପେପର ୧ ଓ ପେପର ୨ ପରୀକ୍ଷା ଦେବା ପାଇଁ ଆବେଦନ କରିଥିଲେ । ହେଲେ ପେପର ୧ ପାଇଁ ଛତ୍ରପୁରରେ ସେଣ୍ଟର ପଡ଼ିଥିବା ବେଳେ ପେପର ୨ ପାଇଁ ବ୍ରହ୍ମପୁର ସହରରେ ପରୀକ୍ଷା ସେଣ୍ଟର ପଡ଼ିଛି। କମ ସମୟ ଭିତରେ ସାଗରିକା ଦୁଇଟି ସହରରେ ୨ଟି ପରୀକ୍ଷା କିଭଳି ଉପସ୍ଥିତ ରହିବେ ତାକୁ ନେଇ ଚିନ୍ତାରେ ପଡ଼ିଛନ୍ତି । ତେବେ କେବଳ ସାଗରିକା ନୁହଁନ୍ତ, ଗଜପତି ଜିଲାରେ ଏଭଳି ଅନେକ ପରୀକ୍ଷାର୍ଥୀଙ୍କ ଦୂର ସ୍ଥାନରେ ପରୀକ୍ଷା କେନ୍ଦ୍ର ପଡ଼ିଥିବାରୁ ସେମାନେ କ’ଣ କରିବେ ଜାଣି ପାରୁନାହାନ୍ତି ।
