ଭଣ୍ଡାରିପୋଖରୀ,୧୬।୩(ଡି.ଏନ.ଏ) – ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକର ଐତିହାସିକ ଗଣପର୍ବ ମୁନ୍ସୀ ମେଳଣ ପାଇଁ ଥାନା ପରିସର ଶୀତକଣ୍ଠେଶ୍ୱର ଶିବ ମନ୍ଦିରରେ ମଙ୍ଗଳବାର ଘଟ ସ୍ଥାପନା ପରେ ପୀଠ ଦେବତାଙ୍କ ପୂଜାର୍ଚ୍ଚନା କରାଯାଇଛି। ପ୍ରଥମେ ସୂର୍ଯ୍ୟ ପୂଜା, ଦ୍ୱାରପାଳ ପୂଜା, ଇଷ୍ଟ ଦେବତାଙ୍କ ପୂଜା ସହିତ ମହାଦେବଙ୍କୁ ୧୦୮ବେଲପତ୍ର ଅର୍ପଣ କରାଯାଇଥିଲା। ପରେ ଆଳତୀ ସହିତ ରାଧାକୃଷ୍ଣଙ୍କ ଷୋଡ଼ଶ ଉପଚାର ପୂଜା ଅନୁଷ୍ଠିତ ହୋଇଥିଲା। ମୁଖ୍ୟ ପୂଜକ ରାଜକିଶୋର ପଣ୍ଡାଙ୍କ ସହିତ ଗୟାଧର ଦାସ, ଜଗବନ୍ଧୁ ପଣ୍ଡା, ମଧୁସୂଦନ ନାୟକ ବୈଦିକ ବିଧି ଅନୁଯାୟୀ ମୁନସୀ ମେଳଣ ପୂଜାକାର୍ଯ୍ୟ ସମ୍ପନ୍ନ କରିଥିଲେ। ଏଥିରେ କର୍ତ୍ତୀକର୍ତ୍ତା ଭାବେ ବିଶ୍ୱକେଶନ ପରିଡ଼ା ଓ ମଧୁସ୍ମିତା ପରିଡ଼ା ଦାୟିତ୍ୱ ନିର୍ବାହ କରିଥିବା ବେଳେ ମେଳଣ କମିଟି କୋଷାଧ୍ୟକ୍ଷ ପ୍ରଭାତ କୁମାର ସାହୁ ଏହାକୁ ପରିଚାଳନା କରିଥିଲେ। ଭଣ୍ଡାରିପୋଖରୀ କଲେଜ ଅଧ୍ୟକ୍ଷ ଭରତ କରଣଙ୍କ ଅଧ୍ୟକ୍ଷତାରେ ମେଳଣ ଉତ୍ସବକୁ ଭଦ୍ରକ ଏସ୍ପି ଚରଣ ସିଂ ମିନା ଉଦ୍ଘାଟନ କରିଥିବା ବେଳେ ତହସିଲଦାର ସରୋଜକାନ୍ତ ନାୟକ, ଥାନା ଅଧିକାରୀ ଅମିତାଭ ଦାସ, ଅତିରିକ୍ତ ତହସିଲଦାର ସତ୍ୟନାରାୟଣ ଧଳ, ଅନନ୍ତ ତ୍ରିପାଠୀଙ୍କ ସମେତ ମେଳଣ କମିଟି କର୍ମକର୍ତ୍ତାମାନେ ଉପସ୍ଥିତ ଥିଲେ। ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଶ୍ୟାମ ସୁନ୍ଦର ମହାପାତ୍ର ଅତିଥି ପରିଚୟ ଓ ଲଳିତ ରାଉତ ଧନ୍ୟବାଦ ଅର୍ପଣ କରିଥିଲେ।