ମୁମ୍ବାଇ,୫ା୩: ଶନିବାର ମହିଳା ପ୍ରିମିୟର୍ ଲିଗ୍ (ଡବ୍ଲ୍ୟୁପିଏଲ୍) ଉଦ୍ଘାଟନୀ ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସର ବୃହତ ବିଜୟ। ଡି. ଓ୍ବାଇ ପାଟିଲ ଷ୍ଟାଡିୟମରେ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ୨୦୭ ରନ୍ କରିଥିବାବେଳେ ଗୁଜରାଟ ଜାଏଣ୍ଟ୍ସ ୬୪ ରନ୍ରେ ଅଲଆଉଟ ହୋଇ ୧୪୩ ରନରେ ହାରିଥିଲା। ଓପନର ହିଲି ମାଥ୍ୟୁସ୍ ୪୭ ରନ୍ କରିଥିଲେ। ନାଟାଲି ସ୍କିଭର ବ୍ରଣ୍ଟ(୨୩) ଓ ମାଥ୍ୟୁସ୍ ୨ୟ ଉଇକେଟରେ ୫୪ ରନ୍ ଯୋଡ଼ିଥିଲେ। ଉଭୟ ଖେଳାଳି ମାତ୍ର ୮ ରନ୍ ବ୍ୟବଧାନରେ ପ୍ୟାଭିଲିୟନ୍ ଫେରିଥିଲେ। ମାଥ୍ୟୁସ୍ ୩୧ ବଲ୍ ଖେଳି ୩ ଚୌକା ଓ ୪ ଛକା ମାରିଥିଲେ। ପରେ ହରମନ୍ପ୍ରୀତ କୌର(୬୫) ଓ ଆମେଲିଆ କେର୍ (୪୫*) ଇନିଂସ ସମ୍ଭାଳିଥିଲେ। ହରମନ୍ପ୍ରୀତ ୩୦ ବଲ ଖେଳି ୧୪ ଚୌକା ମାରିଥିଲେ। ଶେଷ ଯାଏ ଅପରାଜିତ ରହିଥିବା ଆମେଲିଆ ୨୪ ବଲ୍ ଖେଳି ୬ ଚୌକା ଓ ୧ ଛକା ମାରିଥିଲେ। ସ୍ନେହ ରାଣା ୨ ଉଇକେଟ ନେଇଥିଲେ। ଗୁଜରାଟ ଜାଏଣ୍ଟ୍ସର ଆରମ୍ଭ ଅତ୍ୟନ୍ତ ଦୟନୀୟ ରହିଥିଲା। ଦଳ ୨୩ ରନରେ ୭ ବ୍ୟାଟର ଆଉଟ ହୋଇଥିବାବେଳେ କେବଳ ଦୁଇ ଜଣ ବ୍ୟାଟର ଦୁଇ ଅଙ୍କ ଛୁଇଁ ପାରିଥିଲେ। ଡି. ହେମଲତା ୨୯* ଓ ମୋନିକା ପଟେଲ ୧୦ ରନ୍ କରିଥିଲେ। ମୁମ୍ବାଇ ପକ୍ଷରୁ ସାଇକା ଇଶାକ୍ ୪, ନାଟାଲି ସ୍କିଭର୍ ବ୍ରଣ୍ଟ ଓ ଆମେଲିଆ କେର୍ ୨ ଉଇକେଟ ନେଇଥିଲେ। ହରମନ୍ପ୍ରୀତ୍ କୌର ପ୍ଲେୟର୍ ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ।
ସଂକ୍ଷିପ୍ତ ସ୍କୋର
ମୁମ୍ବାଇ ଇଣ୍ଡିଆନ୍ସ: ୨୦ ଓଭରରେ ୨୦୭/୫(ହରମନ୍ପ୍ରୀତ କୌର-୬୫, ହିଲି ମାଥ୍ୟୁସ୍-୪୭, ଆମେଲିଆ କେର୍-୪୫, ସ୍ନେହ ରାଣା-୨/୪୩, ତନୁଜା କଓ୍ବଁର-୧/୧୨।
ଗୁଜରାଟ ଜାଏଣ୍ଟ୍ସ: ୧୫.୧ ଓଭରରେ ୬୪/୧୦ (ଡି. ହେମଲତା-୨୯*, ସାଇକା ଇଶାକ୍-୪/୧୧, ନାଟାଲି ସ୍କିଭର ବ୍ରଣ୍ଟ-୨/୫, ଆମେଲିଆ କେର୍-୨/୧୨)।