ମୁମ୍ବାଇ, ୧୫ା୪:ଆସନ୍ତାବର୍ଷ ହୋମ୍-ଆଓ୍ବେ ଫର୍ମାଟ ସହ ବଡ଼ ଆକାରରେ ହେବ ଓମେନ୍ସ ପ୍ରିମିୟର ଲିଗ୍ (ଡବ୍ଲ୍ୟୁପିଏଲ୍)। ସମ୍ଭବତଃ ଏହା ଫେବୃୟାରୀରେ ଖେଳାଯିବ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଏକ ସୂତ୍ରରୁ ଜଣାପଡ଼ିିଛି। ଟୁର୍ନାମେଣ୍ଟର ଉଦ୍ଘାଟନୀ ସଂସ୍କରଣ ମୁମ୍ବାଇର ଦୁଇଟି ଭେନ୍ୟୁରେ ମାର୍ଚ୍ଚ ୪ରୁ ୨୬ ପର୍ଯ୍ୟନ୍ତ ଖେଳାଯାଇଥିଲା। ଚଳିତ ମାସ ପ୍ରାରମ୍ଭରେ ଆଇପିଏଲ ଚେୟାରମ୍ୟାନ ଅରୁଣ ଧୂମାଲ ସୂଚନା ଦେଇଥିଲେ ଯେ, ଡବ୍ଲ୍ୟୁପିଏଲ୍ର ଆସନ୍ତା ୩ ସିଜନ ୫ଟି ଦଳକୁ ନେଇ ଖେଳାଯିବ। ଅଧିକ ପ୍ରଶଂସକ ସୃଷ୍ଟି କରିବା ଉଦ୍ଦେଶ୍ୟରେ ଏହା ହୋମ୍-ଆଓ୍ବେ ଫର୍ମାଟରେ ଖେଳାଯିବ। ଯେଉଁ ସହର ନାମରେ ଫ୍ରାଞ୍ଚାଇଜ ନାହିଁ, ଯଥା ଇନ୍ଦୋର ଭଳି ଟିଅର-୨ ସହରରେ ଆୟୋଜନ ସହଜ ହେବ ନାହିଁ।
ଇଣ୍ଡୋ-ପାକ୍ ବିଶ୍ୱକପ୍ ଭେନ୍ୟୁ ଓ ଏସିଆ କପ୍ ସମ୍ପର୍କରେ ଆଲୋଚନା ଜାରି
ଏସିଆ କପ୍ ୨୦୨୩ରେ ଭାରତର ଅଂଶଗ୍ରହଣ ସମେତ ବିଶ୍ୱକପ୍ ବେଳେ ଭାରତରେ ପାକିସ୍ତାନ ମ୍ୟାଚକୁ ନେଇ ଭାରତ ସରକାରଙ୍କ ନିର୍ଦ୍ଦେଶାବଳୀଙ୍କୁ ଅପେକ୍ଷା କରିବ ବିସିସିଆଇ। ଖବର ଅନୁସାରେ ସମସ୍ତ ସଦସ୍ୟ, ଏହି ପ୍ରସଙ୍ଗରେ ଆଲୋଚନା ଚଳାଇଛନ୍ତି। ଏହା ସରିବା ପରେ ସ୍ପଷ୍ଟଚିତ୍ର ମିଳିଯିବ। ପୂର୍ବରୁ ଏକ ରିପୋର୍ଟରେ ପ୍ରକାଶ ପାଇଥିଲା ଯେ, ପାକିସ୍ତାନ ଯଥାସମ୍ଭବ ସେମାନଙ୍କର ବିଶ୍ୱକପ୍ ମ୍ୟାଚଗୁଡ଼ିକ ଚେନ୍ନାଇ ଓ କୋଲକାତାରେ ଖେଳିପାରନ୍ତି। କାରଣ ପୂର୍ବ ଟୁର୍ଗୁଡ଼ିକରେ ସେମାନେ ଏହି ଦୁଇଟି ଭେନ୍ୟୁରେ ଖେଳିବା ଲାଗି ନିଜକୁ ସୁରକ୍ଷିତ ମନେକରିଥିଲେ।
ଆଫଗାନିସ୍ତାନ ସିରିଜ ପୂର୍ବରୁ ସିଲେକ୍ସନ କମିଟି ଚେୟାରମ୍ୟାନ ଘୋଷଣା
ଜୁନ୍ରେ ଦି ଓଭାଲଠାରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପ୍ ପୂର୍ବରୁ ଆଫଗାନିସ୍ତାନ ବିପକ୍ଷ ୩ମ୍ୟାଚ ବିଶିଷ୍ଟ ଅନ୍ତର୍ଜାତୀୟ ଦିନିକିଆ ସିରିଜ ଖେଳାଯିବ। ଏଥିପାଇଁ ଭାରତୀୟ ଦଳ ଘୋଷଣା ପାଇଁ ସିଲେକ୍ସନ କମିଟି ଚେୟାରମ୍ୟାନ ବଛା ସରିଥିବ ବୋଲି ବିସିସିଆଇ ଆଶା ପ୍ରକାଶ କରି କହିଛି। ଗତ ଫେବୃୟାରୀରେ ଚେତନ ଶର୍ମାଙ୍କ ଇସ୍ତଫା ପରେ ଏହି ପଦବୀ ଖାଲିପଡ଼ିଥିଲା। ଏହି ପଦବୀ ସାଧାରଣତଃ ବରିଷ୍ଠତା ଭିତ୍ତିରେ ପୂରଣ କରାଯାଇଥାଏ। ଶର୍ମାଙ୍କ ଇସ୍ତଫା ପରେ ବର୍ତ୍ତମାନ ଏହି ପଦବୀରେ ଭାରତର ପୂର୍ବତନ ଓପନିଂ ବ୍ୟାଟର ଶିବ ସୁନ୍ଦର ଦାସ ଚେୟାରମ୍ୟାନ ପଦବୀରେ ଅସ୍ଥାୟୀ ଦାୟିତ୍ୱରେ ଅଛନ୍ତି।
ବିଶ୍ୱକପ୍ ବେଳକୁ ଫିଟ୍ ହୋଇଯାଇଥିବେ ବୁମ୍ରା
ପିଠିରେ ଇଞ୍ଜୁରି ଯୋଗୁ ବର୍ତ୍ତମାନ ଖେଳରୁ ଦୂରେଇ ରହିଥିବା ଭାରତର ପ୍ରମୁଖ ଫାଷ୍ଟ ବୋଲର ଯଶପ୍ରୀତ ବୁମ୍ରା ବିଶ୍ୱକପ୍ ୨୦୨୩ ବେଳକୁ ଠିକ୍ ହୋଇଯାଇଥିବେ ବୋଲି ବିସିସିଆଇ ଦୃଢ ନିଶ୍ଚିତ ଅଛି। ଭାରତ ଏହି ୫୦ଓଭର ଟୁର୍ନାମେଣ୍ଟ ଚଳିତବର୍ଷ ପରବର୍ତ୍ତୀ ଭାଗ ଅକ୍ଟୋବର-ନଭେମ୍ବରରେ ଆୟୋଜନ କରିବ। କାର୍ଯ୍ୟସୂଚୀ ଖୁବ୍ ଶୀଘ୍ର ଘୋଷଣା କରାଯିବ ବୋଲି ଆଶା କରାଯାଉଛି। ଖବର ଅନୁସାରେ ସାଉଦି ଆରବରେ ପ୍ରସ୍ତାବିତ ଟି୨୦ ଲିଗ୍ ସମେତ ସମଗ୍ର ବିଶ୍ୱରେ ଖେଳାଯାଉଥିବା ଅନ୍ୟ ଟି୨୦ ଲିଗ୍ରେ ଭାରତୀୟ ଖେଳାଳିଙ୍କୁ ଅନୁମତି ନ ଦେବା ଲାଗି ରହିଥିବା ନିୟମରେ ବିସିସିଆଇ ପରିବର୍ତ୍ତନ କରିବ ନାହିଁ। କିନ୍ତୁ ଫ୍ରାଞ୍ଚାଇଜ୍ଗୁଡ଼ିକ ସାଉଥ ଆଫ୍ରିକା ୨୦ ଏବଂ ଇଣ୍ଟରନ୍ୟାଶନାଲ ଲିଗ୍ ଟି୨୦ ଭଳି ଅନ୍ୟ ପ୍ରତିଯୋଗିତାରେ ସେମାନଙ୍କ ଉପସ୍ଥିତି ଜାହିର କରିପାରିବେ। ଖବର ଅନୁସାରେ ଦକ୍ଷିଣ ଆଫ୍ରିକାରେ ପରବର୍ତ୍ତୀ ବୈଠକରେ ଆଇସିସି ରେଭିନ୍ୟୁ ମଡେଲ ସମ୍ପର୍କରେ ନିଷ୍ପତ୍ତି ନିଆଯିବ। ହେଲେ ଏଥିଲାଗି ଦିନ ଧାର୍ଯ୍ୟ କରାଯାଇ ନାହିଁ।