ନୂଆଦିଲ୍ଲୀ, ୮।୧୦: ମହିଳା ରେସଲିଂରେ ପ୍ରଥମ ଭାରତୀୟ ଭାବେ ବିଶ୍ୱ ଚାମ୍ପିୟନ ହେବାର ସଫଳତାଠାରୁ ହାତେ ଦୂରରେ ରହିଯାଇଛନ୍ତି ଅଂଶୁ ମଲିକ। ଗୁରୁବାର ନରଓ୍ବେର ଓସଲୋଠାରେ ଖେଳାଯାଇଥିବା ଫାଇନାଲରେ ତାଙ୍କୁ ପରାଜୟର ସମ୍ମୁଖୀନ ହେବାକୁ ପଡ଼ିଛି। ୫୭ କେଜି ବର୍ଗର ଫାଇନାଲରେ ତାଙ୍କୁ ହରାଇ ଦେଇଛନ୍ତି ୨୦୧୬ ରିଓ ଅଲିମ୍ପିକ୍ ଚାମ୍ପିୟନ ହେଲେନ ଲୋସି ମାରଲି। ତେବେ ମହିଳା ବିଶ୍ୱ ରେସଲିଂ ଚାମ୍ପିୟନପ୍ରେ ରୌପ୍ୟ ପଦକ ଜିତିବାରେ ଅଂଶୁ ପ୍ରଥମ ଭାରତୀୟ।
ପ୍ରଥମ ରାଉଣ୍ଡରେ ଅଂଶୁ ଏକ ପଏଣ୍ଟର ଲିଡ୍ ନେଇଥିଲେ। କିନ୍ତୁ ଦ୍ୱିତୀୟ ରାଉଣ୍ଡରେ ସବୁ କିଛି ବଦଳି ଯାଇଥିଲା। ମାରଲିଙ୍କ ଆଟାକିଂ ଖେଳ ଯୋଗୁ ଅଂଶୁ ମ୍ୟାଚ୍ ବେଳେ ଯନ୍ତ୍ରଣାରେ ଚିତ୍କାର କରିଥିଲେ। ଏହାସତ୍ତ୍ୱେ ପଏଣ୍ଟ ଛାଡ଼ି ନ ଥିଲେ ଆମେରିକୀୟ ପ୍ରତିଦ୍ୱନ୍ଦ୍ୱୀ। ମାରଲି ୪-୧ରେ ମ୍ୟାଚ୍ ଜିତିବା ପରେ ଅଂଶୁଙ୍କୁ ତୁରନ୍ତ ମେଡିକାଲ ସହାୟତା ଦିଆଯାଇଥିଲା। ଉଲ୍ଲେଖଯୋଗ୍ୟ, ବବିତା ଓ ଗୀତା ଫୋଗଟ (୨୦୧୨), ପୂଜା ଧାଙ୍କର (୨୦୧୮) ଏବଂ ଭିନେଶ ଫୋଗଟ (୨୦୧୯) ବିଶ୍ୱ ରେସଲିଂରେ ବ୍ରୋଞ୍ଜ ପଦକ ଜିତିଥିଲେ।