ଚଣ୍ଡିଗଡ଼, ୭।୧୦: ଜଣାଶୁଣା ରେସ୍ଲର ବବିତା ଫୋଗତ୍ ବୁଧବାର ହରିୟାଣା ସରକାରଙ୍କ କ୍ରୀଡ଼ା ବିଭାଗ ଉପନିର୍ଦ୍ଦେଶକ ପଦରୁ ଇସ୍ତଫା ଦେଇଛନ୍ତି। ଗତ ଜୁଲାଇ ୩୦ରେ ହରିୟାଣା ସରକାର ବବିତାଙ୍କ ସମେତ କବାଡ଼ି ଖେଳାଳି କବିତା ଦେବୀଙ୍କୁ ରାଜ୍ୟ କ୍ରୀଡ଼ା ବିଭାଗରେ ଉପନିର୍ଦ୍ଦେଶକ ଭାବେ ନିଯୁକ୍ତି ଦେଇଥିଲେ। ସକ୍ରିୟ ରାଜନୀତିରେ ସମୟ ଦେବାକୁ ଚାହୁଁଥିବାରୁ ଇସ୍ତଫା ଦେଇଥିବା ବବିତା କହିଛନ୍ତି। ମୁଁ ବିହାର ବିଧାନସଭା ନିର୍ବାଚନରେ ଏବଂ ହରିୟାଣାର ବରୋଦା ଉପନିର୍ବାଚନରେ ଭାଜପା ପାଇଁ ପ୍ରଚାର କରିବାକୁ ନିଷ୍ପତ୍ତି ନେଇଛି। ଆମ ପରିବାର ପାଇଁ ରାଜନୀତି ନୂଆ ନୁହେଁ। ମୋ ମା’ ସରପଞ୍ଚ ଭାବେ କାର୍ଯ୍ୟ କରିଥିଲେ। ମୁଁ ପିଲାଦିନୁ ରାଜନୀତି ଓ କୁସ୍ତି ଖେଳିବା ଶିଖିଥିଲି ବୋଲି ବବିତା ପ୍ରକାଶ କରିଛନ୍ତି। ଶୁକ୍ରବାର ବବିତା ମୁଖ୍ୟମନ୍ତ୍ରୀ ମନୋହର ଲାଲ୍ ଖଟ୍ଟରଙ୍କୁ ଭେଟିବାର କାର୍ଯ୍ୟସୂଚୀ ରହିଛି। ଏଠାରେ ସୂଚନାଯୋଗ୍ୟ, ବବିତା ପୂର୍ବରୁ ହରିୟାଣା ପୋଲିସରେ ସବ୍ଇନ୍ସପେକ୍ଟର ଭାବେ ଚାକିରି କରିଥିଲେ। କିନ୍ତୁ ଗତ ବିଧାନସଭା ନିର୍ବାଚନ ପୂର୍ବରୁ ସେ ସବ୍ଇନସପେକ୍ଟର ପଦରୁ ଇସ୍ତଫା ଦେଇ ବାପା ମହାବୀର ସିଂଙ୍କ ସହ ବିଜେପିରେ ଯୋଗ ଦେଇଥିଲେ। କିନ୍ତୁ ଦାଦ୍ରି ଆସନରେ ଲଢ଼ି ସେ ୩ୟ ସ୍ଥାନରେ ରହିଥିଲେ।
