ନୂଆଦିଲ୍ଲୀ,୨୭ା୪ : କେନ୍ଦ୍ରର ମୁଣ୍ଡବ୍ୟଥା ସାଜିଥିବା ଜମ୍ମୁ-କଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଲ ମଲିକ ବୁଧବାର ନୂଆଦିଲ୍ଲୀର ଯନ୍ତରମନ୍ତରରେ ଧାରଣାରତ କୁସ୍ତିଯୋଦ୍ଧାଙ୍କ ସହ ସାମିଲ ହୋଇଛନ୍ତି। ଭାଜପା ଏମ୍ପି ତଥା ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫ୍ଆଇ) ଅଧ୍ୟକ୍ଷ ବ୍ରିଜ୍ଭୂଷଣ ଶରଣ ସିଂଙ୍କ ବିରୋଧରେ ଆଗତ ଯୌନ ଉତ୍ପୀଡ଼ନ ମାମଲାରେ ମହିଳା କୁସ୍ତିଯୋଦ୍ଧାମାନେ ବିଜୟୀ ହେବେ ବୋଲି ସେ କହିଛନ୍ତି। ଏଥିସହ ସେମାନଙ୍କ ପ୍ରତି ନିଜ ସମର୍ଥନ ଜଣାଇଛନ୍ତି। ବିକ୍ଷୋଭ ବେଳେ ସତ୍ୟପାଲ କହିଛନ୍ତି, କୁସ୍ତିଯୋଦ୍ଧାମାନେ ଆଣିଥିବା ଅଭିଯୋଗର ତଦନ୍ତ ହେବା ଆବଶ୍ୟକ। ଏହି ଲଢ଼େଇ କେବଳ କୁସ୍ତିଯୋଦ୍ଧାଙ୍କର ନୁହେଁ, ବରଂ ଦେଶର ସମସ୍ତ ମହିଳାଙ୍କ ସଂଗ୍ରାମ। ସେମାନଙ୍କ ପଛରେ ସାରା ଦେଶ ଛିଡ଼ା ହୋଇଛି। ରେସ୍ଲିଂ ଜଗତରେ ଦୁର୍ନୀତିର ମୂଳୋତ୍ପାଟନ କଲେ ସେମାନଙ୍କୁ ଇତିହାସ ମନେରଖିବ। ଜଣେ ଝିଅ ମେଡାଲ ଜିତିଲେ ଚା’ ପାଇଁ ଡାକି ତାଙ୍କ ସହ ଅତି ନିଲ୍ଲଜ ଭାବେ ଫଟୋ ଉଠାଇଥାଉ। ଆଜି ସେମାନେ ରାସ୍ତାକୁ ଓହ୍ଲାଇଛନ୍ତି। ତେଣୁ ଏହି ବିକ୍ଷୋଭରେ ଅଧିକରୁ ଅଧିକ ଲୋକ ସାମିଲ ହେବା ଉଚିତ ବୋଲି ସତ୍ୟପାଲ କହିଛନ୍ତି। ଅନ୍ୟପକ୍ଷେ ଏହି ମାମଲାରେ କାହିଁକି ଏଫ୍ଆଇଆର୍ କରାଯାଉନାହିଁ ବୋଲି ସୁପ୍ରିମକୋର୍ଟ ଜବାବ ମାଗିଥିବାବେଳେ ଏହାର ତଦନ୍ତ ଆବଶ୍ୟକ ରହିଛି ବୋଲି ଦିଲ୍ଲୀ ପୋଲିସ ପକ୍ଷରୁ ଅଦାଲତଙ୍କୁ ବୁଧବାର ଅବଗତ କରାଯାଇଛି।
ସତ୍ୟପାଲ ‘ଦି ଓ୍ବେର୍’କୁ ଦେଇଥିବା ସାକ୍ଷାତ୍କାରରେ ପୁଲ୍ଓ୍ବାମା ଆକ୍ରମଣ ପାଇଁ କେନ୍ଦ୍ରକୁ ଦାୟୀ କରିବା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କୁ ଚୁପ୍ ରହିବା ପାଇଁ ତାଗିଦ୍ କରିଥିବା କହିଥିଲେ। ସତ୍ୟପାଲଙ୍କ ମନ୍ତବ୍ୟ ଭାଇରାଲ ହୋଇଥିବାବେଳେ ତାଙ୍କର ନୂଆ ଅଭିଯୋଗ ମୋଦିଙ୍କ ମୁଣ୍ଡବ୍ୟଥା ବଢ଼ାଇ ଦେଇଛି। ସତ୍ୟପାଲଙ୍କ ମତରେ ବର୍ତ୍ତମାନ ଦେଶ ଅତି ବିପଜ୍ଜନକ ବ୍ୟକ୍ତିମାନଙ୍କ ହାତରେ ରହିଛି। ଏହାର ନେତୃତ୍ୱ ଜଣେ ଭୁଲ୍ ବ୍ୟକ୍ତି ନେଉଛନ୍ତି। ତେଣୁ ୨୦୨୪ ସାଧାରଣ ନିର୍ବାଚନ ଭାଜପା ପାଇଁ ଶେଷ ସୁଯୋଗ ହେବାକୁ ଯାଉଛି।