ନୂଆଦିଲ୍ଲୀ,୧୯ ।୧: ଦେଶର ଷ୍ଟାର ମହିଳା ରେସଲର ବିନେଶ ଫୋଗାଟ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ସହ ହୋଇଥିବା କଥାବାର୍ତ୍ତା ପରେ ଏକ ବଡ ବୟାନ ଦେଇଛନ୍ତି । ଏହି ବୈଠକ ପରେ ଖବରଦାତାଙ୍କ ସହ କଥା ହୋଇ ବିନେଶ ଫୋଗାଟ କହିଛନ୍ତି, ଆମର ଲଢେଇ ସରକାର ଅବା ସରକାର ଲୋକଙ୍କ ସହ ନୁହେଁ । ଆମର ଲଢେଇ ଜଣେ ବ୍ୟକ୍ତିଙ୍କ ସହ । ଆମେ ସେପର୍ଯ୍ୟନ୍ତ ଏଠି ରହିବୁ ଯେପର୍ଯ୍ୟନ୍ତ ଆମକୁ ନ୍ୟାୟ ମିଳିନାହିଁ ।
ମିଡିଆ ସହ କଥାବାର୍ତ୍ତା ବେଳେ ବିନେଶ ଫୋଗାଟ କହିଛନ୍ତି, ଆମେ ଆମର କୁସ୍ତି ଛାଡି ଆସିପାରିବୁ , ଅଧ୍ୟକ୍ଷ ତାଙ୍କ ପଦ ଛାଡି ଆସିପାରିବେନି? ଦେଶର ଏହା ହେଉଛି ରେସଲିଂ ଫେଡେରେଶନ ଯାହା ଆପଣଙ୍କ ସାମ୍ନାରେ ବସିଛି ଏବଂ ଏହା ବାହାରେ ଅନ୍ୟ ଫେଡେରେଶନ ନାହିଁ । ଯେପର୍ଯ୍ୟନ୍ତ ଆମକୁ ନ୍ୟାୟ ମିଳିନାହିଁ ସେପର୍ଯ୍ୟନ୍ତ ଧାରଣା ଜାରି ରହିବ । ଆସନ୍ତାକାଲି ଅର୍ଥାତ୍ ଶୁକ୍ରବାର ୧୦ଟାରୁ ଆମେ ଧାରଣରେ ବସିବୁ ଆମେ କ୍ରୀଡା ମନ୍ତ୍ରୀ ଅନୁରାଗ ଠାକୁରଙ୍କୁ ଅପେକ୍ଷା କରିଛୁ ।
ବିନେଶ ଆହୁରି ମଧ୍ୟ କହିଛନ୍ତି, ଆମ ଜୀବନ ପ୍ରତି ବିପଦ ରହିଛି । ଆମେ ପୋଲିସର ସୁରକ୍ଷା ବି ନେଇନାହୁଁ । ଅଧ୍ୟକ୍ଷଙ୍କ ଘର ତାଲା ପଡିଛି । ଯେତେବେଳେ ଶୋଷଣ ହୁଏ ତାହା କୋଠରୀ ଭିତରେ ହୋଇଥାଏ ଏବଂ ସେଠାରେ କ୍ୟାମେରା ନ ଥାଏ । ଯେଉଁ ଝିଅମାନେ ଶୋଷଣର ଶିକାର ହୋଇଛନ୍ତି ସେମାନେ ନିଜେ ହିଁ ତା’ର ପ୍ରମାଣ ।
ସରକାରଙ୍କ ସହ ବୈଠକ ପରେ ଦେଶର ମହିଳା ରେସଲର ସାକ୍ଷି ମଲିକ କହିଛନ୍ତି, ବୈଠକରେ ସେମିତି କିଛି କୁହାଗଲା ନାହିଁ, କେବଳ ଆଶ୍ୱସନା ଦିଆଗଲା, କୌଣସି ପଦକ୍ଷେପ କଥା କୁହାଗଲା ନାହିଁ । ଏଥିରେ ଆମେ ଖୁସି ନୁହେଁ । ଆମେ ରେସଲିଂ ଫେଡେରେସନକୁ ଭାଙ୍ଗିବାକୁ ଚାହୁଁଛୁ । ସବୁ ରାଜ୍ୟରେ ଫେଡେରେଶନ ଭାଙ୍ଗି ଦିଆଯାଉ । କାରଣ ସବୁ ରାଜ୍ୟରେ ତାଙ୍କର ଲୋକ ରହିଛନ୍ତି ।