କୋଲକାତା,୨୮।୫: ରାଜଧାନୀ ଦିଲ୍ଲୀରେ ରବିବାର ଦୁଇଟି ବଡ ଘଟଣା ଦେଖିବାକୁ ମିଳିଛି। ପ୍ରଥମଟି ହେଉଛି ଲୋକତନ୍ତ୍ରର ନୂଆ ମନ୍ଦିର ଅର୍ଥାତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନୂଆ ସଂସଦ ଭବନର ଉଦଘାଟନ କରିଛନ୍ତି। ଅନ୍ୟଟି ହେଉଛି ଜନ୍ତର ମନ୍ତରରେ ଭାରତୀୟ ଜନତା ପାର୍ଟି(ଭାଜପା) ଏମପି ତଥା ଭାରତୀୟ କୁସ୍ତି ମହାସଂଘର ଅଧ୍ୟକ୍ଷ ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ ପ୍ରଦର୍ଶନ କରୁଥିବା କୁସ୍ତିଯୋଦ୍ଧାମାନେ ସଂସଦ ଭବନ ଆଡକୁ ପ୍ରବେଶ କରିବାକୁ ଚେଷ୍ଟା କରିବା। ଏହି ସମୟରେ ଦିଲ୍ଲୀ ପୋଲିସ ସେମାନଙ୍କୁ ଅଟକ ରଖିଛି।
ନୂଆ ସଂସଦ ଭବନ ଅଭିମୁଖେ ଯିବା ପାଇଁ ଚେଷ୍ଟା କରିଥିବା ମହିଳା କୁସ୍ତିଯୋଦ୍ଧା ସାକ୍ଷୀ ମଲିକ କହିଛନ୍ତି ଯେ ଆମେ ଶାନ୍ତିପୂର୍ଣ୍ଣ ଭାବେ ପଦଯାତ୍ରା କରୁଛୁ, କିନ୍ତୁ ସେମାନେ ବଳପୂର୍ବକ ଆମକୁ ଟାଣି ନେଇଥିଲେ। ଏ ସମ୍ପର୍କରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଟୁଇଟ କରି ଏହି ଘଟଣାକୁ ନିନ୍ଦା କରିଛନ୍ତି। ସେ କହିଛନ୍ତି ଯେ ଆମ ଚାମ୍ପିୟନଙ୍କ ପ୍ରତି ଯେଉଁଭଳି ବ୍ୟବହାର କରାଯାଇଛି ତାହା ଅତ୍ୟନ୍ତ ଲଜ୍ଜାଜନକ।
ମୁଖ୍ୟମନ୍ତ୍ରୀ ମମତା ବାନାର୍ଜୀ ଟୁଇଟ କରି ଲେଖିଛନ୍ତି, ଦିଲ୍ଲୀ ପୋଲିସ ସାକ୍ଷୀ ମଲିକ, ଭିନେଶ ଫୋଗାଟ ଏବଂ ଅନ୍ୟ କୁସ୍ତିଯୋଦ୍ଧାଙ୍କୁ ଯେଉଁଭଳି ଭାବେ ଆକ୍ରମଣ କରିଛି ମୁଁ ଏହାକୁ ଦୃଢ ନିନ୍ଦା କରୁଛି। ଆମ ଚାମ୍ପିୟାନମାନଙ୍କୁ ଏହିପରି ବ୍ୟବହାର କରାଯିବା ଲଜ୍ଜାଜନକ ବିଷୟ । ଗଣତନ୍ତ୍ର ସହନଶୀଳତା ମଧ୍ୟରେ ଅଛି କିନ୍ତୁ ସ୍ବାଧୀନତାବାଦୀ ଶକ୍ତି ଅସହିଷ୍ଣୁତା ଏବଂ ଅସନ୍ତୋଷକୁ ଦମନ କରିବାରେ ଲାଗିଛନ୍ତି। କୁସ୍ତିଯୋଦ୍ଧାମାନଙ୍କୁ ତୁରନ୍ତ ପୋଲିସ ହେପାଜତରୁ ମୁକ୍ତ କରିବାକୁ ମୁଁ ଦାବି କରୁଛି। ମୁଁ କୁସ୍ତିଯୋଦ୍ଧାମାନଙ୍କ ସହିତ ଛିଡା ହୋଇଛି।