ନୂଆଦିଲ୍ଲୀ,୧୦।୬: ଭାରତୀୟ ରେସଲିଂ ଫେଡେରେଶନ (ଡବ୍ଲ୍ୟୁଏଫଆଇ) ପୂର୍ବତନ ସଭାପତି ତଥା ଭାଜପା ଏମ୍ପି ବ୍ରିଜ୍ଭୂଷଣ ସିଂଙ୍କ ବିରୋଧରେ ଯୌନ ନିର୍ଯ୍ୟାତନା ମାମଲାରେ ତଦନ୍ତ ଚାଲିଛି। ଶୁକ୍ରବାର କ୍ରାଇମ ସିନ ରିକ୍ରିଏଟ୍ କରିବା ପାଇଁ ଦିଲ୍ଲୀ ପୋଲିସ ରେସଲର ସଂଗୀତା ଫୋଗାଟଙ୍କୁ ବ୍ରିଜ୍ଭୂଷଣଙ୍କ ଘରକୁ ନେଇଥିଲା। ଏହା ଉପରେ ବର୍ତ୍ତମାନ ତୃଳମୂଳ କଂଗ୍ରେସ (ଟିଏମସି) ଦିଲ୍ଲୀ ପୋଲିସକୁ ସମାଲୋଚନା କରିଛି।
ଟିଏମସି ମୁଖପାତ୍ର ସାକେତ ଗୋଖଲେ ଦିଲ୍ଲୀ କମିଶନ ଫର ମହିଳା (ଡିସିଡବ୍ଲୁ) ଅଧ୍ୟକ୍ଷ ସ୍ବାତୀ ମାଲିୱାଲଙ୍କୁ ଏହି ଘଟଣାର ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛନ୍ତି। ଏହି ଘଟଣାରେ ସମ୍ପୃକ୍ତ ପୋଲିସ କର୍ମଚାରୀଙ୍କ ବିରୋଧରେ ତଦନ୍ତ ଆରମ୍ଭ କରିବାକୁ ମଧ୍ୟ ଅନୁରୋଧ କରାଯାଇଛି।
ସ୍ବାତୀ ମାଲିୱାଲଙ୍କୁ ଲେଖିଥିବା ଏକ ପତ୍ରରେ ଗୋଖଲେ କହିଛନ୍ତି ଯେ, କ୍ରାଇମ ସିନ ରିକ୍ରିଏଟ୍ କରିବା ପାଇଁ ଯୌନ ଅଭିଯୋଗ ହୋଇଥିବା ଅଭିଯୁକ୍ତଙ୍କ ଘରକୁ ନିଆଯିବା ଆଶ୍ଚର୍ଯ୍ୟଜନକ। ଟିଏମସି ନେତା ଅଭିଯୋଗ କରିଛନ୍ତି ଯେ, ଏହା କରି ଦିଲ୍ଲୀ ପୋଲିସ ଅଭିଯୋଗକାରୀଙ୍କ ମନରେ ଭୟର ବାତାବରଣ ସୃଷ୍ଟି କରିବାକୁ ସ୍ପଷ୍ଟ ଚେଷ୍ଟା କରିଛି।
