ସିଓଲ,୧୦ା୧୦: ଦକ୍ଷିଣ କୋରିଆ ଲେଖିକା ହାନ୍ କାଙ୍ଗ୍ଙ୍କୁ ୨୦୨୪ ସାହିତ୍ୟରେ ନୋବେଲ ପୁରସ୍କାର ପ୍ରଦାନ ପାଇଁ ମନୋନୀତ କରାଯାଇଛି। ତାଙ୍କ ରଚିତ କାବ୍ୟାତ୍ମକ ଗଦ୍ୟ ଐତିହାସିକ ଆଘାତର ସାମ୍ନା କରିବା ସହ ମାନବ ଜୀବନର ଭଙ୍ଗୁରତାକୁ ପଦାରେ ପକାଇଥାଏ ବୋଲି ନୋବେଲ କମିଟି କହିଛି। ସୁଇଡିସ୍ ଏକାଡେମୀର ନୋବେଲ କମିଟି ସ୍ଥାୟୀ ସଚିବ ମାଟ୍ସ ମାଲ୍ମ ସାହିତ୍ୟରେ ନୋବେଲ ପୁରସ୍କାର ପାଇଁ ହାନ୍ କାଙ୍ଗ୍ଙ୍କ ନାମ ଘୋଷଣା କରିଛନ୍ତି। ଏହି ୫୩ ବର୍ଷୀୟ ସାହିତି୍ୟକା ତାଙ୍କ ଉପନ୍ୟାସ ‘ଦି ଭେଜିଟେରିଆନ’ ପାଇଁ ୨୦୧୬ରେ ଅନ୍ତର୍ଜାତୀୟ ବୁକର ପୁରସ୍କାର ପାଇଥିଲେ। ୨୦୧୮ରେ ତାଙ୍କ ଉପନ୍ୟାସ ‘ହ୍ୟୁମାନ ଆକ୍ଟସ୍’ ଅନ୍ତର୍ଜାତୀୟ ବୁକର ପ୍ରାଇଜ୍ ଫାଇନାଲରେ ପହଞ୍ଚତ୍ଥିଲା। ସାହିତ୍ୟରେ ନୋବେଲ ପୁରସ୍କାର ପ୍ରଦାନରେ ସବୁବେଳେ ୟୁରୋପ ଏବଂ ଉତ୍ତର ଆମେରିକୀୟ ସାହିତି୍ୟକମାନଙ୍କୁ ପ୍ରାଧାନ୍ୟ ଦିଆଯାଉଥିବା ଏବଂ ପୁରୁଷକୈନ୍ଦ୍ରିକ ହୋଇଥିବା ନେଇ ସମାଲୋଚନା କରାଯାଇଥିଲା। ସାହିତ୍ୟରେ ବର୍ତ୍ତମାସ ସୁଦ୍ଧା ୧୧୯ ଜଣ ନୋବେଲ ପାଇଥିବାବେଳେ ସେଥିରୁ ମହିଳାଙ୍କ ସଂଖ୍ୟା ମାତ୍ର ୧୭। ଶେଷ ମହିଳା ଭାବେ ଫ୍ରାନ୍ସର ଆନି ଏର୍ନକ୍ସ ୨୦୨୨ରେ ସାହିତ୍ୟ ପାଇଁ ନୋବେଲ ପାଇଥିଲେ।
ଚଳିତ ବର୍ଷର ନୋବେଲ ପୁରସ୍କାର ଘୋଷଣା ସୋମବାରଠାରୁ ଆରମ୍ଭ ହୋଇଛି। ପ୍ରଥମ ଦିନରେ ମେଡିସିନରେ ଏହି ସର୍ବୋଚ୍ଚ ପୁରସ୍କାର ପାଇଁ ଆମେରିକୀୟ ବୈଜ୍ଞାନିକ ଭିକ୍ଟର ଆମ୍ବ୍ରୋସ୍ ଏବଂ ଗାରି ରୁଭ୍କୁନ୍ଙ୍କୁ ମନୋନୀତ କରାଯାଇଥିବାବେଳେ ମଙ୍ଗଳବାର ଫିଜିକ୍ସ ପାଇଁ ଜନ୍ ହୋପ୍ଫିଲ୍ଡ ଏବଂ ଜିଓଫ୍ରେ ହିଣ୍ଟନଙ୍କ ନାଁ ଘୋଷଣା କରାଯାଇଥିଲା। ବୁଧବାର ରସାୟନ ବିଜ୍ଞାନରେ ନୋବେଲ ପୁରସ୍କାର ନିମନ୍ତେ ୩ ଜଣ ବୈଜ୍ଞାନିକଙ୍କ ନାଁ ଘୋଷଣା ହୋଇଥିଲା। ଶୁକ୍ରବାର ନୋବେଲ ଶାନ୍ତି ପୁରସ୍କାର ଏବଂ ୧୪ ତାରିଖରେ ଅର୍ଥନୀତିରେ ନୋବେଲ ପୁରସ୍କାର ଘୋଷଣା କରାଯିବ। ଏହି ପୁରସ୍କାର ବାବଦରେ ବିଜେତାଙ୍କୁ ୧ ନିୟୁତ ସୁଇଡିସ୍ କ୍ରୋନୋର (୧ ନିୟୁତ ଡଲାର) ଅର୍ଥରାଶି ପ୍ରଦାନ କରାଯାଇଥାଏ।