ଲକ୍ଷ୍ୟ ସେମାନେ ହାସଲ କରିପାରନ୍ତି, ଯେଉଁମାନଙ୍କ ସ୍ବପ୍ନରେ ଜୀବନ ଥାଏ। ପଙ୍ଖ ଥିଲେ ବି ଅନେକେ ଲକ୍ଷ୍ୟସ୍ଥଳରେ ପହଞ୍ଚତ୍ପାରନ୍ତି ନାହିଁ। କାରଣ ସେମାନଙ୍କର ସ୍ବପ୍ନକୁ ସାକାର କରିବାର ଝୁଙ୍କ୍ ନ ଥାଏ। ଅନେକେ ତ ନିଜର ଅସଫଳତା ପାଇଁ ଅନେକ କାରଣ ଦର୍ଶାନ୍ତି ଓ ଅନ୍ୟଙ୍କୁ ଦାୟୀ କରନ୍ତି। ହେଲେ ନିକୋଲସ୍ ଓ୍ବିଜିସିକ୍ ସେଭଳି ମଣିଷ ନୁହେଁ। ତାଙ୍କର ଜନ୍ମରୁ ହାତ କି ଗୋଡ଼ ନାହିଁ। ହେଲେ ସେ କେବେ ନିଜ ଭାଗ୍ୟକୁ ଦାୟୀ କରି ନାହାନ୍ତି। ବରଂ ନିଜର ଅବସ୍ଥାକୁ ଗ୍ରହଣ କରିନେଇ ଆଗକୁ ବଢିବାକୁ ଚେଷ୍ଟା କରିଛନ୍ତି। ହାତ ଗୋଡ଼ ନ ଥିଲେ ବି ତାଙ୍କର ସ୍ବପ୍ନକୁ ସାକାର କରିବାର ଝୁଙ୍କ ଥିଲା। ତେଣୁ ସେ ସାରା ପୃଥିବୀରେ ଜଣେ ପରିଚିତ ମୁହଁ ପାଲଟି ପାରିଛନ୍ତି। ଆଜି ସମସ୍ତେ ତାଙ୍କୁ ଜଣେ ମୋଟିଭେସନାଲ ସ୍ପିକର୍ ଭାବେ ଜାଣନ୍ତି। କେବଳ ସେତିକି ନୁହେଁ ସେ ଜଣେ ଲେଖକ, ସଙ୍ଗୀତକାର, କଳାକାର ଭାବେ ମଧ୍ୟ ବେଶ୍ ପରିଚିତ। ୧୯ ବର୍ଷ ବୟସରେ ସେ ପ୍ରଥମ ମୋଟିଭେସନାଲ୍ ସ୍ପିଚ୍ ଦେଇଥିଲେ। ଏହାପରେ ସେ ପୃଥିବୀର ଅନେକ ସ୍ଥାନରେ ତାଙ୍କର ପ୍ରେରଣାଦାୟକ ସମ୍ଭାଷଣ ପ୍ରଦାନ କରିଛନ୍ତି। ଆଉ ତାଙ୍କର ଅନେକ ଫଲୋଅର୍ ଅଛନ୍ତି। ତାଙ୍କର ଫିଶିଂ ଓ ପେଣ୍ଟିଂ କରିବାର ସଉକ ଅଛି। ଏହାବାଦ୍ ସାଧାରଣ ଲୋକଙ୍କ ଭଳି ସେ ଫୁଟବଲ୍ ଓ ଗଲ୍ଫ ଖେଳିପାରନ୍ତି। ଏମିତିକି ସର୍ଫିଂ ଓ ସୁଇମିଂ ବି କରିପାରନ୍ତି। ସେ ବିବାହ କରିଛନ୍ତି ଏବଂ ତାଙ୍କର ଦୁଇ ସନ୍ତାନ ବି ଅଛନ୍ତି। ତାଙ୍କର ଏହି ଜୀବନ ଅନେକଙ୍କୁ ପ୍ରେରଣା ଦେଇଥାଏ।