ଟିକିରି, ୧୩।୮( ପ୍ରଫୁଲ କୁମାର ବେହେରା)ରାୟଗଡା ଜିଲା କାଶୀପୁର ବ୍ଲକ ଡଙ୍ଗାସିଲ ପଞ୍ଚାୟତ ବଦଲିଝରଣ ଗ୍ରାମର ଯମୁନା ନାଏକ। ଅର୍ଥ ବାଧକ ଯୋଗୁ ତାଙ୍କ ଉଚ୍ଚଶିକ୍ଷାରେ ଡୋରି ବନ୍ଧା ହେବାକୁ ଯାଉଛି। କୋରାପୁଟ ଜିଲା ଦଶମନ୍ତପୁର କଲେଜରେ ଯୁକ୍ତ ୨ ଶେଷ କରିଥିବା ଯମୁନାଙ୍କ ବାପା ଭାଇଙ୍କ ମୃତ୍ୟୁ ହୋଇଯାଇଛି। ମା’ ପରଘରେ କାମ କରି ଓ ମଜୁରି ଲାଗି ପରିବାର ଚଳାଉଛନ୍ତି। ଭତ୍ତା ଟଙ୍କାରେ ଝିଅମାନଙ୍କୁ ପାଠ ପଢାଇଛନ୍ତି ସେ। ପରିସ୍ଥିତି ଏପରି ହୋଇଛି ଯମୁନାଙ୍କ ଜଣେ ବିବାହିତ ଭଉଣୀ ଆସି ଘରେ ଅଛନ୍ତି। ମା’ଙ୍କୁ ସହାୟତା କରିବାକୁ ଯମୁନା ରାୟଗଡା ଯାଇ ସେଠାରେ ଜଣେ ଠିକାଦାରଙ୍କ ପାଖରେ କୁଲି କାମ କରି ମାଙ୍କୁ ଅର୍ଥତ୍କ ସାହାଯ୍ୟ କରୁଥିଲେ। ଏବେ ବର୍ଷା ଦିନେ କୁଲି କାମ ଠିକ୍ ରୂପେ ମିଳୁ ନ ଥିବାରୁ ସେ ଗାଁକୁ ଚାଲିଆସି ଗ୍ରାମର ବିଭିନ୍ନ ଲୋକଙ୍କ ଜମିରେ କାମ କରି ନିଜ ପରିବାରକୁ ସହାୟତା କରୁଛନ୍ତି ଯମୁନା। ଏପରି ସ୍ଥଳେ ତାଙ୍କର ଯୁକ୍ତ ୩ ପଢିବାକୁ ବହୁତ ଇଛା ଥିଲେ ମଧ୍ୟ ଏଥିପାଇଁ ଆବଶ୍ୟକ ଅର୍ଥ ନାହିଁ ତାଙ୍କ ପରିବାର ପାଖରେ। ଫଳରେ ଉଚ୍ଚଶିକ୍ଷା ନେଇ ତାଙ୍କ ସ୍ବପ୍ନ ମଉଳିବାରେ ଲାଗିଛି। ଯଦି ସରକାର କିମ୍ବା କୌଣସି ସହଦୃଦୟ ବ୍ୟକ୍ତି ତାଙ୍କୁ ପଢିବା ପାଇଁ ସହାୟତା କଲେ ବେଶ୍ ଉପକୃତ ହୁଅନ୍ତେ ବୋଳି କହିଛନ୍ତି ଯମୁନା। ଏ ସମ୍ପର୍କରେ ଗ୍ରାମବାସୀ କହନ୍ତି, ଯମୁନାଙ୍କ ପରିବାର ଖୁବ୍ ଗରିବ। ଦିନେ ଖାଇଲେ ଦିନେ ଭୋକରେ ରୁହନ୍ତି। ପ୍ରଶାସନ ଯଦି ସହଯୋଗ କରନ୍ତା ତେବେ ତାଙ୍କ ସାନଝିଅ ଯମୁନା ଅଧିକ ପଢିବାର ସୁଯୋଗ ପାଆନ୍ତା ବୋଲି କହିଛନ୍ତି କେତେ ଜଣ ଗ୍ରାମବାସୀ।