ନୂଆଦିଲ୍ଲୀ,୨୦।୧୨ : ପ୍ରୋଜେକ୍ଟ ୭୫ର, ୟାର୍ଡ-୧୧୮୭୯ ର ପଞ୍ଚମ କାଲଭାରୀ ଶ୍ରେଣୀ ବୁଡ଼ାଜାହାଜ ନୌସେନାକୁ ହସ୍ତାନ୍ତର କରାଯାଇଛି ବୋଲି ଭାରତୀୟ ନୌସେନା ପକ୍ଷରୁ ମଙ୍ଗଳବାର କୁହାଯାଇଛି। ଅଧିକାରୀ କହିଛନ୍ତି ଯେ ପ୍ରୋଜେକ୍ଟ ୭୫ ଅନୁଯାୟୀ ସ୍କର୍ପିନ ଡିଜାଇନର ୬ଟି ବୁଡ଼ାଜାହାଜ ସ୍ବଦେଶୀ ଜ୍ଞାନକୌଶଳରେ ନିର୍ମାଣ କାର୍ଯ୍ୟ ଜାରି ରହିଛି।
ଫ୍ରାନ୍ସର ଏମ/ଏସ ନାଭାଲ ଗ୍ରୁପ ସହଯୋଗରେ ମାଜାଗାଓଁ ଡକ ଶିପବିଲ୍ଡର୍ସ ଲିମିଟେଡ ମୁମ୍ବାଇରେ ଏହି ବୁଡ଼ାଜାହାଜ ନିର୍ମାଣ କରାଯାଉଛି। ନୌସେନା ଅଧିକାରୀମାନେ କହିଛନ୍ତି ଯେ ଖୁବ ଶୀଘ୍ର ଏହି ବୁଡ଼ାଜାହାଜକୁ ଭାରତୀୟ ନୌସେନାରେ ସାମିଲ କରାଯିବ। ଏହାଦ୍ୱାରା ଭାରତୀୟ ନୌସେନାର ଶକ୍ତି ଆହୁରି ବୃଦ୍ଧି ପାଇବ।
ଆଇକେ ଗୁଜରାଲ ସରକାର ୨୫ ଟି ବୁଡ଼ାଜାହାଜ ହାସଲ କରିବାକୁ ନିଷ୍ପତ୍ତି ନେଇଥିଲେ। ପି-୭୫ ବୁଡ଼ାଜାହାଜ ନିର୍ମାଣ ପାଇଁ ୩୦ ବର୍ଷର ଯୋଜନା ପ୍ରସ୍ତୁତ କରାଯାଇଥିଲା। ୨୦୦୫ ରେ, ଭାରତ ଏବଂ ଫ୍ରାନ୍ସ ୬ ଟି ସ୍କର୍ପିନ ଶ୍ରେଣୀର ବୁଡ଼ାଜାହାଜ ନିର୍ମାଣ ପାଇଁ ୩.୭୫ ବିଲିୟନ ଡ଼ଲାର ଚୁକ୍ତି ସ୍ବାକ୍ଷର କରିଥିଲେ। ଭାରତରେ ମାଜାଗାଓଁ ଡକ ଶିପବିଲ୍ଡର୍ସ ଲିମିଟେଡ ଏବଂ ଫ୍ରାନ୍ସର ଡିସିଏନସି ଏହାର କାର୍ଯ୍ୟର ତଦାରଖ କରୁଛନ୍ତି। ୬ଟି ମଧ୍ୟରୁ ପ୍ରଥମ ଆଇଏନଏସ କାଲଭାରୀ, କାର୍ଯ୍ୟସୂଚୀର ପାଞ୍ଚ ବର୍ଷ ପଛରେ ୨୦୧୭ ରେ କାର୍ଯ୍ୟକ୍ଷମ ହୋଇଥିଲା ।