ସୋନିଆ ଗାନ୍ଧୀଙ୍କୁ ବିଷକନ୍ୟା କହିଲେ ୟତନାଲ
ବେଙ୍ଗାଲୁରୁ,୨୮।୪: କର୍ନାଟକ ବିଧାନସଭା ନିର୍ବାଚନକୁ ନେଇ ସରଗରମ ହେଉଛି ଜାତୀୟ ରାଜନୀତି। ପରସ୍ପର ମଧ୍ୟରେ ଆରୋପ ପ୍ରତ୍ୟାରୋପ ବି ହେଉଛି ଜୋରଦାର। ଏହି କ୍ରମରେ ଗୁରୁବାର କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ମୋଦିଙ୍କ ଉପରେ ଖୁବ୍ ବର୍ଷିଥିଲେ। ସେ କହିଥିଲେ ଯେ, ମୋଦି ହେଉଛନ୍ତି ବିଷଧର ସାପ। ଏହାର ଜବାବରେ ଭାଜପା ବିଧାୟକ ବସନଗୌଡା ୟତନାଲ ସୋନିଆ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ହେଉଛନ୍ତି ବିଷକନ୍ୟା।
ତେବେ ଭାଜପା ବିଧାୟକ ବସନଗୌଡା ସୋନିଆ ଗାନ୍ଧୀଙ୍କ ଉପରେ ଦେଇଥିବା ଟିପ୍ପଣୀକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବଘେଲା। ସେ କହିଛନ୍ତି, ଭାଜପା ବିଧାୟକ ସୋନିଆ ଗାନ୍ଧୀଙ୍କୁ ବିଷକନ୍ୟା କହିଛନ୍ତି। ଗତକାଲି ଖାର୍ଗେଙ୍କ ବୟାନକୁ ନେଇ ଭାଜପା ଦେଶ ବ୍ୟାପୀ ବିରୋଧ କରିଥିଲା। କିନ୍ତୁ ସମ୍ମାନ ଦୃଷ୍ଟିରୁ ଖାର୍ଗେ ତାଙ୍କ ବୟାନକୁ ଫେରେଇ ନେଇଥିଲେ। କିନ୍ତୁ ଆଜି ଭାଜପା ବିଧାୟକଙ୍କ ଦ୍ୱାରା ଏପରି ଟିପ୍ପଣୀ ଦିଆଯାଇଛି। ତେବେ ଏ ବିଷୟରେ ମୋଦି ଏବଂ ଅମିତ୍ ଶାହା କ’ଣ ମନ୍ତବ୍ୟ ଦେବେ ତାହାକୁ ଦେଶ ଅପେକ୍ଷା କରିଛି ବୋଲି କହିଛନ୍ତି ଭୂପେଶ।
ଖାର୍ଗେଙ୍କ ବୟାନରେ କେନ୍ଦ୍ର ମନ୍ତ୍ରୀ ସ୍ମୃତି ଇରାନୀ କହିଛନ୍ତି ଯେ, ଆଜି ବି କିପରି କଂଗ୍ରେସ ବିଷ ଓକାଳୁଛି ତାକୁ ସାରା ଦେଶ ଦେଖୁଛି। ଏହି ଟିପ୍ପଣୀ ଦେଇ କଂଗ୍ରେସ ନିର୍ବାଚନରେ ହାରିଯିବ ବୋଲି ସୁନିଶ୍ଚିତ କରିସାରିଛି।