ଭୁବନେଶ୍ୱର,୩।୪ (ବ୍ୟୁରୋ) : ଦିନକୁ ଦିନ ସାଇବର ଠକଙ୍କ ଉତ୍ପାତ ଉପରମୁହାଁ ହେଉଛି । ନାନା ସୋସିଆଲ ମିଡିଆକୁ ଅସ୍ତ୍ର କରି ସାଇବର ଠକ ହଜାର ହଜାର ଲୋକଙ୍କୁ ଫସାଇ ଆଖି ପିଛୁଳାଖେ କୋଟି କୋଟି ଟଙ୍କା ଲୁଟି ନେଉଛନ୍ତି । ଯାହାକି ପୋଲିସ ଓ ଲୋକଙ୍କ ପାଇଁ ଚିନ୍ତାର କାରଣ ପାଲଟଛି । ମାର୍ଚ୍ଚରେ ଭୁବନେଶ୍ୱରରୁ ୨ କୋଟି ୨୦ ଲକ୍ଷ ୧୭ ହଜାର ୮୬୯ ଲକ୍ଷ ଟଙ୍କା ଠକି ନେଇଛନ୍ତି ଅଦୃଶ୍ୟ ଠକ । ଯାହା ଭିତରେ ଅନ୍ଲାଇନ ଟ୍ରେଡିଂ ଓ ଇନଭେଷ୍ଟମେଣ୍ଟ ନାଁରେ ୧ କୋଟି ୫୪ ଲକ୍ଷ ୫୮ ହଜାର ୧୨୯ ଟଙ୍କା ଠକେଇ ହୋଇଥିବା ବେଳେ ଓଟିପି, କେୱାଇସି ଓ ଲିଙ୍କ ଜନିତ ୬୫ ଲକ୍ଷ ୫୯ ହଜାର ୭୪୦ ଟଙ୍କା ଚଳୁ ହୋଇଥିବା ଜଣାପଡିଛି । ତେବେ ଠକେଇ ଟଙ୍କାରୁ ମାତ୍ର ୨ ଲକ୍ଷ ୯୪ ହଜାର ୯୯୬ ଟଙ୍କା ସାଇବର କ୍ରାଇମ ଓ ଅର୍ଥନୈତିକ ଅପରାଧ ହେଲ୍ପ ଡେସ୍କର ମିଳିତ ଉଦ୍ୟମରେ ଅଭିଯୋଗକାରୀ ମାନଙ୍କୁ ଫେରସ୍ତ କରାଯାଇଥିବା ବେଳେ ୩୦ ଲକ୍ଷ ୫୫ ହଜାର ୨୮୧ ଟଙ୍କାକୁ ବ୍ଲକ କରାଯାଇ ପାରିଛି । ଏନେଇ ଭୁବନେଶ୍ୱର ସାଇବାର ଥାନା ପକ୍ଷରୁ ସୂଚନା ଦିଆଯାଇଛି ଯେ ଏଥର ଟେଲିଗ୍ରାମ ବ୍ୟବହାର ଜରିଆରେ ଠକେଇ କରାଯାଉଥିବା ନୂଆ ତରିକା ସାମ୍ନାକୁ ଆସିଥିବା ବେଳେ ଅନେକ ଶିକ୍ଷିତ ଲୋକଙ୍କୁ ୱାର୍କ ଫମ ହୋମ ବା ଘରୁ କାମ କରି ରୋଜଗାର କରିବାର ଲୋଭ ଦେଖାଇ ସାଇବର ଠକମାନେ ଠକିଥିବା ଜଣାପଡିଛି ।