ମୁମ୍ବାଇ,୨ା୧(ପି.ଟି.): ବିସିସିଆଇ ପକ୍ଷରୁ ଏହାର ଖେଳାଳି ଚୟନ ନିୟମରେ କରାଯାଇଛି ବଡ଼ ପରିବର୍ତ୍ତନ। ରବିବାରର ସମୀକ୍ଷା ବୈଠକ ପରେ ୟୋ ୟୋ ଟେଷ୍ଟ ଓ ଡେକ୍ସା(ବୋନ୍ ମ୍ୟାରୋ) ଟେଷ୍ଟକୁ ବାଧ୍ୟତାମୂଳକ କରାଯାଇଛି। ଭାରତର ଟି୨୦ ବିଶ୍ୱକପ ପରାଜୟ ସମୀକ୍ଷାକୁ ନେଇ ଏହି ବୈଠକ ଅନୁଷ୍ଠିତ ହୋଇଥିଲା। ବିସିସିଆଇ ସମ୍ପାଦକ ଜୟ ଶାହ, ସଭାପତି ରୋଜର ବିନ୍ନି, ଅଧିନାୟକ ରୋହିତ ଶର୍ମା, କୋଚ୍ ରାହୁଲ ଡ୍ରାଭିଡ୍, ଏନ୍ସିଏ ମୁଖ୍ୟ ଭିଭିଏସ୍ ଲକ୍ଷ୍ମଣ ଏବଂ ଚୟନକର୍ତ୍ତା ଚେତନ ଶର୍ମା ଏହି ସମୀକ୍ଷା ବୈଠକରେ ଅଂଶଗ୍ରହଣ କରିଥିଲେ। ୟୋ ୟୋ ଟେଷ୍ଟ ସହିତ ଯୁବ ଖେଳାଳିଙ୍କ ଜାତୀୟ ଦଳକୁ ଚୟନ ପ୍ରକ୍ରିୟା ପୂର୍ବରୁ ବୟସ ନିର୍ଦ୍ଧାରଣ ପାଇଁ ଡେକ୍ସା ଟେଷ୍ଟ ବା ବୋନ୍ ମ୍ୟାରୋ ଟେଷ୍ଟକୁ ବାଧ୍ୟତାମୂଳକ କରାଯାଇଛି। ୟୋ ୟୋ ଓ ଡେକ୍ସା ଟେଷ୍ଟକୁ କେନ୍ଦ୍ରୀୟ ଚୁକ୍ତିରେ ସାମିଲ କରି ସମସ୍ତ ଖେଳାଳିଙ୍କ ପାଇଁ ବାଧ୍ୟତାମୂଳକ କରାଯାଇଛି।
ଏହାକୁ ଦୃଷ୍ଟିରେ ରଖି କ୍ରିକେଟ ବିଶ୍ୱକପ ୨୦୨୩ ପାଇଁ ରୋଡ୍ମ୍ୟାପ୍ ପ୍ରସ୍ତୁତ କରାଯିବ ଏବଂ ଏନ୍ସିଏ ସମସ୍ତ ଆଇପିଏଲ୍ ଫ୍ରାଞ୍ଚାଇଜ୍ ସହିତ ସମନ୍ବୟ ରକ୍ଷାକରି କାର୍ଯ୍ୟ କରିବ। ବିରାଟ କୋହଲିଙ୍କ ଅଧିନାୟକତ୍ୱ ସମୟରେ ଭାରତର ୟୋ ୟୋ ପାସ୍ ସ୍କୋର ୧୬.୧ ରହିଥିବା ବେଳେ ବର୍ତ୍ତମାନ ଏହାକୁ ୧୬.୫କୁ ବୃଦ୍ଧି କରାଯାଇଛି। ଖେଳାଳିଙ୍କ ଉପଲବ୍ଧତା, କାର୍ଯ୍ୟଭାର ମ୍ୟାନେଜ୍ମେଣ୍ଟ ଓ ଫିଟ୍ନେସ୍ ପରି ମାନକକୁ ଗୁରୁତ୍ୱ ଦିଆଯିବା ସହିତ ୨୦୨୩ ଦିନିକିଆ ବିଶ୍ୱକପ୍ ପାଇଁ ରୋଡ୍ମ୍ୟାପ୍ ପ୍ରସ୍ତୁତି ଉପରେ ଆଲୋଚନା ହୋଇଥିଲା। ନିକଟ ଅତୀତରେ ଭାରତୀୟ ଖେଳାଳିଙ୍କ ଫିଟ୍ନେସ୍ ଦଳ ପାଇଁ ଚିନ୍ତାର କାରଣ ପାଲଟିଛି। ପେସ୍ ବୋଲିଂ ଅଲ୍ରାଉଣ୍ଡର ଦୀପକ ଚହର ବାରମ୍ବାର ଆହତ ହେଉଥିବା ବେଳେ ଯଶ୍ପ୍ରୀତ ବୁମ୍ରା ମଧ୍ୟ ଆହତ ହୋଇ ଆକ୍ସନରୁ ଦୂରରେ ରହିଛନ୍ତି।
ଅଧିନାୟକ ରହିବେ ରୋହିତ ଶର୍ମା
ରୋହିତ ଶର୍ମାଙ୍କ ଅଧିନାୟକତ୍ୱ ପ୍ରତି କୌଣସି ବିପଦ ନାହିଁ। ସେ ଏବେ ବି ଭାରତୀୟ ଟେଷ୍ଟ ଓ ଦିନିକିଆ ଦଳର ଦାୟିତ୍ୱ ନିର୍ବାହ କରୁଛନ୍ତି। ଏହି ଦୁଇ ଫର୍ମାଟ୍ରେ ବିସିସିଆଇ ଅଧିକାରୀଙ୍କୁ କୌଣସି ସମସ୍ୟା ନ ଥିବା ବୋର୍ଡ ସୂତ୍ରରୁ ପ୍ରକାଶ। ଅଧିନାୟକ ରୋହିତ ଶର୍ମା ଓ ମୁଖ୍ୟ କୋଚ୍ ରାହୁଲ ଡ୍ରାଭିଡ୍ଙ୍କ ସମେତ ବିସିସିଆଇ ସମ୍ପାଦକ ଜୟ ଶାହ, ସଭାପତି ରୋଜର ବିନ୍ନି, ଏନ୍ସିଏ ମୁଖ୍ୟ ଭିଭିଏସ୍ ଲକ୍ଷ୍ମଣ ଏବଂ ଚୟନକର୍ତ୍ତା ଚେତନ ଶର୍ମା ମଧ୍ୟ ଏହି ବୈଠକରେ ଅଂଶଗ୍ରହଣ କରିଥିଲେ। ଭାରତ ବର୍ତ୍ତମାନ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଓ ଦିନିକିଆ ବିଶ୍ୱକପ୍ ଉପରେ ଧ୍ୟାନ କେନ୍ଦ୍ରିତ କରୁଛି। ଦିନିକିଆ ବିଶ୍ୱକପ୍କୁ ଧ୍ୟାନରେ ରଖି ୨୦ ଜଣ ଖେଳାଳିଙ୍କୁ ଶର୍ଟଲିଷ୍ଟ କରାଯାଇଛି। ଅକ୍ଟୋବର-ନଭେମ୍ବରର ବିଶ୍ୱକପ୍ ପୂର୍ବରୁ ଏହି ଖେଳାଳିମାନଙ୍କୁ ରୋଟେଟ୍ କରାଯିବା ସହିତ ଏକ କୋର ଗ୍ରୁପ୍ ଗଠନ କରାଯିବ ବୋଲି ବିସିସିଆଇ ସମ୍ପାଦକ ଜୟ ଶାହ କହିଛନ୍ତି।
ସେହିପରି ବିସିସିଆଇ ପକ୍ଷରୁ ଚୟନ କମିଟିକୁ ବରଖାସ୍ତ କରାଯାଇଥିବା ବେଳେ ଚେତନ ଶର୍ମା ଏହି ବୈଠକରେ ଉପସ୍ଥିତ ଥିବାରୁ ସେ ଆଉଥରେ ଦାୟିତ୍ୱ ଗ୍ରହଣ କରିବା ସମ୍ଭାବନା ସୃଷ୍ଟି କରିଛି। ଚୟନ କମିଟି ପାଇଁ ପୂର୍ବାଞ୍ଚଳରୁ ୨୧ ଟେଷ୍ଟ ଖେଳିଥିବା ଶିବସୁନ୍ଦର ଦାସଙ୍କୁ ଫେବରିଟ୍ ଭାବେ ବିବେଚନା କରାଯାଉଛି। ଦକ୍ଷିଣାଞ୍ଚଳରୁ ପେସର୍ ଭେଙ୍କଟେଶ ପ୍ରସାଦଙ୍କ ନାମକୁ ସର୍ବାଧିକ ଗୁରୁତ୍ୱ ଦିଆଯାଉଛି। ସେହିପରି ୨୦୨୩ ବିଶ୍ୱକପ୍ ପ୍ରସ୍ତୁତି ଆଧାରରେ ଚେତନ ଶର୍ମାଙ୍କୁ ଆଉ ଏକ ସୁଯୋଗ ପ୍ରଦାନ କରାଯିବା ସମ୍ଭାବନା ରହିଛି। ତେବେ ପଶ୍ଚିମାଞ୍ଚଳ ଜୋନ୍ ଲାଗି ଭେଟେରାନ୍ ଗୁଜରାଟ ଖେଳାଳି ମୁକୁନ୍ଦ ପର୍ମାର, ସଲିଲ ଅଙ୍କୋଲା ଓ ସମୀର ଦୀଘେଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ଲାଗି ରହିବ।