ନୂଆଦିଲ୍ଲୀ, ୧୪।୧୦: ଉତ୍ତରପ୍ରଦେଶ ହାଥରସ୍ ବଳାତ୍କାର ମାମଲାରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସରକାରଙ୍କ ପକ୍ଷରୁ ସୁପ୍ରିମ୍କୋର୍ଟରେ ସତ୍ୟପାଠ ଦାଖଲ କରାଯାଇଛି। ଗୁରୁବାର ଏହି ମାମଲାର ଶୁଣାଣି ହେବାର ଗୋଟିଏ ଦିନ ପୂର୍ବରୁ ରାଜ୍ୟ ସରକାର ସତ୍ୟପାଠ ବୁଧବାର ଦାଖଲ କରିଛନ୍ତି। ସତ୍ୟପାଠରେ ଯୋଗୀ ସରକାର ଉଲ୍ଲେଖ କରିଛନ୍ତି ଯେ, ସୁପ୍ରିମ୍କୋର୍ଟ ଏହି ମାମଲାର ଯାଞ୍ଚ୍ର ତଦାରଖ କରନ୍ତୁ। ସେହିପରି ସିବିଆଇ ପକ୍ଷରୁ କରାଯାଉଥିବା ଯାଞ୍ଚ୍ର ସମୟସୀମା ଧାର୍ଯ୍ୟ କରିବା ଲାଗି ସତ୍ୟପାଠରେ ଦର୍ଶାଯାଇଛି। ରାଜ୍ୟ ସରକାରଙ୍କୁ ପ୍ରତି ୧୫ ଦିନରେ ଯାଞ୍ଚ୍ର ସ୍ଥିତି ସମ୍ପର୍କରେ ସୂଚନା ଦେବାଲାଗି ନିର୍ଦ୍ଦେଶ ଦେବାକୁ ଯୋଗୀ ସରକାର ସତ୍ୟପାଠରେ ଅନୁରୋଧ କରିଛନ୍ତି। ପୀଡ଼ିତା ପରିବାରଙ୍କ ପାଇଁ ଆବଶ୍ୟକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ପୀଡ଼ିତା ପରିବାରଙ୍କ ଘର ବାହାରେ ୮ଟି ସିସିଟିଭି କ୍ୟାମେରା ଲଗାଯାଇଛି। ସେହିପରି ଗାଁରେ ପୋଲିସ ଏବଂ ଅର୍ଦ୍ଧସାମରିକ ବାହିନୀଙ୍କୁ ମଧ୍ୟ ମୁତୟନ କରାଯାଇଥିବା ସତ୍ୟପାଠରେ କୁହାଯାଇଛି।
