ନୂଆଦିଲ୍ଲୀ,୬।୧୧: ଦୀର୍ଘ ବର୍ଷ ଧରି ଆଇନଗତ ପ୍ରତିବନ୍ଧକକୁ ସାମ୍ନା କରିବା ପରେ ଗୁରୁବାର ରାତିରେ ‘ହ୍ବାଟ୍ସଆପ୍’ ପେମେଣ୍ଟ ସର୍ଭିସ(ଟଙ୍କା ନେଣଦେଣ ସେବା)ରେ ପ୍ରବେଶ କରିବାର ସୁଯୋଗ ପାଇଛି। ପ୍ରାରମ୍ଭିକ ପର୍ଯ୍ୟାୟରେ ପ୍ରାୟ ୪୦୦ ନିୟୁତ ଉପଭୋକ୍ତାଙ୍କ ମଧ୍ୟରୁ ୨୦ ନିୟୁତ ଗ୍ରାହକଙ୍କୁ ସେବା ପ୍ରଦାନ କରିବାକୁ ଅନୁମତି ଦିଆଯାଇଛି। ନ୍ୟାଶନାଲ ପେମେଣ୍ଟ କର୍ପୋରେଶନ ଅଫ୍ ଇଣ୍ଡିଆ(ଏନ୍ପିସିଆଇ) ଫେସବୁକ୍ର ଏହି ମେସେଜିଂ ଆପ୍କୁ ଏଥିପାଇଁ ଅନୁମତି ଦେଇଛି। ତେବେ ଏହାକୁ ବ୍ୟବହାର କରିବା ସମୟରେ କିଛି ଜିନିଷ ପ୍ରତି ଦୃଷ୍ଟି ଦେବାକୁ ପଡ଼ିବ।
-ୟୁପିଆଇରେ କାମ କରିବ ‘ହ୍ବାଟ୍ସଆପ୍ ପେମେଣ୍ଟ ଆପ୍’
ଗୁଗୁଲ ପେ, ଫୋନ୍ ପେ, ଭିମ୍ ଆପ୍ ଏବଂ ବ୍ୟାଙ୍କଗୁଡ଼ିକର ବିଭିନ୍ନ ଆପ୍ରେ ବ୍ୟବହାର ହେଉଥିବା ୟୁନିଫାଏଡ୍ ପେମେଣ୍ଟ ଇଣ୍ଟରଫେସ୍(ୟୁପିଆଇ)ରେ ହ୍ବାଟ୍ସଆପ୍ ପେମେଣ୍ଟ ଆପ୍ କାମ କରିବ। ଏଥିପାଇଁ ଆପଣଙ୍କୁ ହ୍ବାଟ୍ସଆପ୍ ଓ୍ବାଲେଟ୍ରେ ଟଙ୍କା ରଖିବା ଆବଶ୍ୟକ ନାହିଁ। ବ୍ୟାଙ୍କ ଖାତାରେ ଥିବା ଟଙ୍କାକୁ ଅନ୍ୟ ଲୋକଙ୍କୁ ପଠାଇବାରେ ଏହି ଆପ୍ ସାହାଯ୍ୟ କରିବ। ଦେୟ ପାଇଁ ରେଜିଷ୍ଟ୍ରେଶନ(ପଞ୍ଜିକୃତ) କରିବା ପରେ ହ୍ବାଟ୍ସଆପ୍ ଏକ ନୂତନ ୟୁପିଆଇ ଆଇଡି ସୃଷ୍ଟି କରିବ। ଆପ୍ର ପେମେଣ୍ଟ ସିଷ୍ଟମକୁ ଯାଇ ଉପଭୋକ୍ତା ଏହି ଆଇଡି ପାଇପାରିବେ।
-ହ୍ବାଟ୍ସଆପ୍ ପେମେଣ୍ଟ ପାଇଁ ଏଭଳି କରିବେ ରେଜିଷ୍ଟେଶନ
ପେମେଣ୍ଟ ସୁବିଧା ପାଇଁ ଉପଭୋକ୍ତାଙ୍କ ବ୍ୟାଙ୍କ ଆକାଉଣ୍ଟ ଏବଂ ଫୋନ୍ ନଂ ଥିବା ଜରୁରୀ। ସ୍କ୍ରିନ୍ ତଳେ ଥିବା ‘ଆଟାଚ୍ମେଣ୍ଟ’ ଆଇକନ୍ ଉପରେ କ୍ଲିକ୍ କରି ପେମେଣ୍ଟ କରାଯାଇପାରିବ। ତେବେ ପ୍ରଥମେ ୟୁପିଆଇ ପାସ୍କୋଡ୍ ସେଟ୍ କରିବାକୁ ପଡ଼ିବ। ପୂର୍ବରୁ ଥିବା ପାସ୍କୋଡ୍କୁ ମଧ୍ୟ ଆପଣ ବ୍ୟବହାର କରିପାରିବେ।
-ଏହାଛଡ଼ା ଅନ୍ୟ ପେମେଣ୍ଟ ଆପ୍ ସହ ହ୍ବାଟ୍ସଆପ୍ର ଏହି ଆପ୍କୁ ବ୍ୟବହାର କରିପାରିବେ। ହେଲେ କେବଳ ଭାରତୀୟ ବ୍ୟାଙ୍କ ଆକାଉଣ୍ଟ ସହ ସଂଯୁକ୍ତ ଭାରତୀୟ ନମ୍ବର ପାଇଁ ବ୍ୟବହାର କରାଯାଇପାରିବ। ହ୍ବାଟ୍ସଆପ୍ରେ ଅନ୍ତର୍ଜାତୀୟ ନମ୍ବର ଥିଲେ ଏହି ସୁବିଧାକୁ ବ୍ୟବହାର କରିହେବ ନାହିଁ।
-ୟୁପିଆଇ ଏକ ମାଗଣା ସେବା। ଏହି କାରବାର ପାଇଁ ଆପଣଙ୍କୁ ଦେୟ ଦେବାକୁ ପଡ଼ିବ ନାହିଁ। କେବଳ ନେଣଦେଣର ସୀମା ୧ ଲକ୍ଷ ଟଙ୍କା ପର୍ଯ୍ୟନ୍ତ ରହିବ।