ନୂଆଦିଲ୍ଲୀ,୧୩ା୧୦:ଆମେ ଜଣେ ଶିଶୁକୁ ହତ୍ୟା କରିପାରିବୁ ନାହିଁ ବୋଲି ଗୁରୁବାର ସୁପ୍ରିମକୋର୍ଟ ଗୁରୁତ୍ୱପୂର୍ଣ୍ଣ ଟିପ୍ପଣୀ ଦେଇଛନ୍ତି। ଅଜନ୍ମିତ ପିଲା ତଥା ଜୀବନ୍ତ ଭ୍ରୂଣ ଏବଂ ନିଜ ଶରୀର ଉପରେ ମା’ର ନିଷ୍ପତ୍ତି ସ୍ବାୟତ୍ତତା ଅଧିକାର ମଧ୍ୟରେ ସନ୍ତୁଳନ ବଜାୟ ରଖାଯିବା ଜରୁରୀ ବୋଲି ଶୀର୍ଷ ଅଦାଲତ କହିଛନ୍ତି। ଏଥିସହ ଗର୍ଭ ନଷ୍ଟ ଅନୁମତି ଉପରେ ଆପତ୍ତି ଜଣାଇଥିବା କେନ୍ଦ୍ରକୁ ମହିଳାଙ୍କ ଓକିଲଙ୍କ ଜରିଆରେ ତାଙ୍କ ସହ ଆଲୋଚନା କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ଶୁଣାଣି ବେଳେ ଖଣ୍ଡପୀଠ ଗର୍ଭବତୀ ମହିଳାଙ୍କ ଓକିଲଙ୍କୁ କହିଥିଲେ, ଗର୍ଭସ୍ଥ ଶିଶୁର ହୃଦ୍ସ୍ପନ୍ଦନ ବନ୍ଦ କରିବା ପାଇଁ ଆମ ଜରିଆରେ ନୂଆଦିଲ୍ଲୀସ୍ଥିତ ଅଲ୍ ଇଣ୍ଡିଆ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସେସ୍ (ଏମ୍ସ) ଡାକ୍ତରମାନଙ୍କୁ କୁହାଇବାକୁ ଆପଣ ଚାହୁଁଛନ୍ତି କି? ମହିଳାଙ୍କ ଓକିଲ ‘ନା’ କହିବାରୁ ଖଣ୍ଡପୀଠ କହିଥିଲେ, ଯଦି ମହିଳା ଜଣକ ୨୪ ସପ୍ତାହ ଅପେକ୍ଷା କରିପାରିଲେ ଆଉ କିଛି ସପ୍ତାହ ପାଇଁ ଭ୍ରୂଣକୁ ଗର୍ଭରେ ରଖିପାରିବେ ନାହିଁ? କାରଣ ଏକ ସୁସ୍ଥ ଶିଶୁ ଜନ୍ମ ନେବାର ସମ୍ଭାବନା ରହିଛି। କେନ୍ଦ୍ର ପକ୍ଷରୁ ପ୍ରତିନିଧିତ୍ୱ କରୁଥିବା ଅତିରିକ୍ତ ସଲିସିଟର ଜେନେରାଲ ଐଶ୍ୱର୍ଯ୍ୟା ଭଟି କହିଥିଲେ, ଆବେଦନକାରୀଙ୍କ ଓକିଲ ଜଣେ ବଳାତ୍କାର ପୀଡ଼ିତାଙ୍କୁ ଗର୍ଭ ନଷ୍ଟ ପାଇଁ କୋର୍ଟ ଦେଇଥିବା ଅନୁମତିର ଅବତାରଣା କରିଛନ୍ତି। କିନ୍ତୁ ସଦ୍ୟ ମାମଲାର ଆବେଦନକାରୀ ଜଣେ ବଳାତ୍କାର ପୀଡ଼ିତା ନୁହନ୍ତି। ସେ ନାବାଳିକା ମଧ୍ୟ ନୁହନ୍ତି। ଗତ ୨୬ ସପ୍ତାହ ଧରି ସେ କ’ଣ କରୁଥିଲେ? ଜଷ୍ଟିସ୍ ଜେ.ବି. ପରଦିଓ୍ବାଲା ଏବଂ ମନୋଜ ମିଶ୍ର ସାମିଲ ଥିବା ଏହି ଖଣ୍ଡପୀଠ ଶୁକ୍ରବାର ପୂର୍ବାହ୍ନ ୧୦ଟା ୩୦ରେ ପରବର୍ତ୍ତୀ ଶୁଣାଣି କରାଯିବା ପୂର୍ବରୁ ମହିଳାଙ୍କ ସହ ଆଲୋଚନା କରିବା ନିମନ୍ତେ ତାଙ୍କ ଓକିଲ ଓ କେନ୍ଦ୍ରର ପ୍ରତିନିଧିଙ୍କୁ ନିର୍ଦ୍ଦେଶ ଦେଇଛନ୍ତି।
ମାମଲା କ’ଣ
ଜଣେ ୨୭ ବର୍ଷୀୟା ବିବାହିତା ମହିଳାଙ୍କ ୨ ସନ୍ତାନ ଥିବାବେଳେ ସେ ତୃତୀୟ ପିଲାକୁ ଗର୍ଭରେ ଧାରଣ କରିଛନ୍ତି। କିନ୍ତୁ ସ୍ବାସ୍ଥ୍ୟଗତ, ଆର୍ଥିକ ଓ ମାନସିକ ସମସ୍ୟା ଯୋଗୁ ଗର୍ଭସ୍ଥ ଶିଶୁର ଲାଳନପାଳନ କରିବାରେ ଅସମର୍ଥ ଥିବା ଦର୍ଶାଇ ୨୬ ସପ୍ତାହର ଗର୍ଭ ନଷ୍ଟ ପାଇଁ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ୨ ମହିଳା ବିଚାରପତି ଜଷ୍ଟିସ୍ ହିମା କୋହଲି ଏବଂ ବି.ଭି. ନାଗରତ୍ନାଙ୍କୁ ନେଇ ଗଠିତ ଖଣ୍ଡପୀଠ ସୋମବାର ଏନେଇ ତାଙ୍କୁ ଅନୁମତି ଦେଇଥିବାବେଳେ କେନ୍ଦ୍ର ସରକାର ମଙ୍ଗଳବାର ଏକ ଡାକ୍ତରୀ ରିପୋର୍ଟ ସହ ରିକଲ୍ ଆପ୍ଲିକେଶନ୍ ଦାଖଲକରି ରାୟ ବଦଳାଇବାକୁ ନିବେଦନ କରିଥିଲେ। ବୁଧବାର ୨ ବିଚାରପତି ଏହା ଉପରେ ବିଭାଜିତ ରାୟ ଦେବା ସହ ଉଚିତ ବିଚାର ପାଇଁ ମାମଲାକୁ ବୃହତ୍ ପୀଠ ନିକଟକୁ ପଠାଇଥିଲେ। ଭାରତର ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ ଗୁରୁବାର ଆବେଦନର ଶୁଣାଣି କରି ଅଜନ୍ମିତ ଶିଶୁ ଓ ସମ୍ପୃକ୍ତ ମହିଳାଙ୍କ ନିଜ ଶରୀର ସମ୍ପର୍କିତ ନିଷ୍ପତ୍ତି ନେବା ଅଧିକାର ମଧ୍ୟରେ ସନ୍ତୁଳନ ରକ୍ଷା ଉପରେ ଗୁରୁତ୍ୱାରୋପ କରିଛନ୍ତି।