କୋକସରା,୨୫ା୧୨(ଡି.ଏନ.ଏ.): କଥାରେ ଅଛି ଇଚ୍ଛାଶକ୍ତି ଆଗରେ ସବୁ ସମ୍ଭବ। ମନରେ ଦୃଢ ଆତ୍ମବିଶ୍ବାସକୁ ପାଥେୟ କରି ସ୍ବଳ୍ପ ଜମାପୁଞ୍ଜିରେ ବିନା ସରକାରୀ ସହାୟତାରେ ଜଣେ ସଫଳ ଯୁବଚାଷୀ ହୋଇ ସ୍ବାବଲମ୍ବୀ ହୋଇ ପାରିଛନ୍ତି ରୋମାଞ୍ଚଳ ପୂଝାରି (୪୫)। ତାଙ୍କ ଘର କୋକସରା ବ୍ଲକ ଗମ୍ଭାରୀଗୁଡା ପଞ୍ଚାୟତ ବଙ୍ଗୋମୁଣ୍ଡା ଗ୍ରାମରେ। ବିଗତ ୮ ବର୍ଷ ହେବ ଛତୁ ଚାଷ କରି ଆସୁଛନ୍ତି। ସେ ଛତୁ ଚାଷ ପାଇଁ ୨୦୧୩ ମସିହାରେ ସରକାରୀ ତାଲିମ କେନ୍ଦ୍ର ଭୁବନେଶ୍ୱର ଓୟୁଏଟିରୁ ପ୍ରଶିକ୍ଷଣ ନେଇଛନ୍ତି। ତାଲିମ ନେଇ ଫେରିବା ପରେ ସେ ଭୁବନେଶ୍ୱରରୁ ଛତୁ ମଞ୍ଜି ମଗାଇ ନିଜର ଛୋଟ ଏକ ଘରେ ଛତୁ ଚାଷ ପାଇଁ ଆବଶ୍ୟକ ହେଉଥିବା ସାମଗ୍ରୀ ସଂଗ୍ରହ କରି ଚାଷ ଆରମ୍ଭ କରିଥିଲେ। ତାଙ୍କୁ ଏହି କାମରେ ତାଙ୍କ ସ୍ତ୍ରୀ କମଳିନୀ ପୁଝାରି(୪୦), ଝିଅ ମିନତୀ ପୁଝାରି(୨୨) ସାହାଯ୍ୟ କରନ୍ତି। ବଡଝିଅ ରେଖା ପୁଝାରି(୨୪) ଭବାନୀପାଟଣା ସରକାରୀ ମହାବିଦ୍ୟାଳୟରେ ଯୁକ୍ତ ଦୁଇ ଓ ସାନ ଝିଅ ମିନତୀ କୋକସରା କଲେଜରେ ଯୁକ୍ତ ଦୁଇ ଶ୍ରେଣୀରେ ପଢୁଛନ୍ତି। ତାଙ୍କର ଦୁଇ ପୁଅ ଆଲୋକ ଓ ଶ୍ଳୋକ ରହିଛନ୍ତି। ଛତୁ ଚାଷ କରି ସେ ନିଜର ଦୁଇ ଝିଅଙ୍କୁ ଉଚ୍ଚ ଶିକ୍ଷା ଦେବା ସହ ସୱାବଲମ୍ବୀ ହୋଇଛନ୍ତି। ଦୈନିକ ୨୦ରୁ ୩୦ କେଜି ଛତୁ ତାଙ୍କ ବେଡ଼ରୁ ବାହାରୁଥିବା ବେଳେ ସ୍ଥାନୀୟ ଅଞ୍ଚଳର ବେପାରୀମାନେ ଆସି ଛତୁ ନିଅନ୍ତି। କେଜି ପ୍ରତି ୧୬୦ ଟଙ୍କାରେ ସେ ଛତୁ ବିକ୍ରି କରୁଛନ୍ତି। ଅଭାବ ଅନାଟନ ଯୋଗୁ ଦିନେ ସେ ପରିବାର ଚଳାଇବା ପାଇଁ ବହୁ ଅସୁବିଧାର ସମ୍ମୁଖୀନ ହେଉଥିଲେ। ଏହାସତ୍ତ୍ୱେ ବାହାର ରାଜ୍ୟକୁ ଦାଦାନ ଖଟିବାକୁ ନ ଯାଇ ଆତ୍ମବିଶ୍ବାସର ସହ ଛତୁ ଚାଷ କରି ଆଜି ସଫଳ ହୋଇ ପାରିଛନ୍ତି। ତେବେ ଛତୁ ଚାଷ ପାଇଁ ତାଙ୍କୁ କୌଣସି ସରକାରୀ ସାହାଯ୍ୟ ମିଳିନାହିଁ। ଯଦି ସରକାରୀ ସହାୟତା ମିଳେ ତାହେଲେ ସେ ଛତୁ ଚାଷକୁ ବ୍ୟାପକ ମାତ୍ରାରେ କରିବା ସହ ଅନେକ ଶ୍ରମିକଙ୍କୁ ରୋଜଗାର ଦେଇ ପାରିବେ ବୋଲି କହିଛନ୍ତି।