ଝରିଗାଁ,୩୧।୩(ସ୍ବ.ପ୍ର.): ନବରଙ୍ଗପୁର ଜିଲା ଉମରକୋଟ ଥାନା ଅଧୀନ ଅଞ୍ଚଳା ଗ୍ରାମରେ ଜଣେ ନିଶାସକ୍ତ ବ୍ୟକ୍ତି ରାତିରେ ଜଣଙ୍କ ଘରକୁ ଯାଇ ବନ୍ଧୁକ ମୁନରେ ଧମକାଇଛନ୍ତି। ଏହି ଘଟଣାରେ ପୋଲିସ ଅଭିଯୁକ୍ତଙ୍କୁ ଗିରଫ କରିବା ସହ ତାଙ୍କର ୨ ସହଯୋଗୀଙ୍କୁ ଅଟକ ରଖି ପଚରାଉଚରା କରୁଛି। ସୂଚନା ଅନୁଯାୟୀ, ୟୁଭି-୨୩(ଅଞ୍ଚଳା) ଗ୍ରାମର ଜଣେ ଯୁବକ ସୋମବାର ରାତି ସାଢ଼େ ୯ଟାରେ ଝରିଗାଁ ବ୍ଲକ ଭରଣ୍ଡିପାରା ଗ୍ରାମର ଜଣେ ପରିଚିତଙ୍କ ଘରକୁ ଯାଇ କବାଟ ଖୋଲିବାକୁ କହିଥିଲେ। କବାଟ ଖେଲିବା ପରେ ସେ ପିଇବା ପାଇଁ ପାଣି ମାଗିଥିଲେ। ସମ୍ପୃକ୍ତ ଯୁବକ ନିଶାସକ୍ତ ଅବସ୍ଥାରେ ଥିବା ଜାଣିପାରି ଘର ମାଲିକ ତାଙ୍କୁ ଘରୁ ବାହାରକୁ ଯିବାକୁ କହିଥିଲେ। କିନ୍ତୁ ଯୁବକ ଜଣକ ଘରୁ ବାହାରି ନ ଥିଲେ। ଘର ମାଲିକ ମୋବାଇଲରେ ଭିଡିଓ କରିବାକୁ ଚେଷ୍ଠା କରିଥିଲେ। ଏଥିରେ ଉତ୍ତ୍ୟକ୍ତ ହୋଇ ସମ୍ପୃକ୍ତ ଯୁବକ ପାଖରେ ରଖିଥିବା ବନ୍ଧୁକ ବାହାର କରି ଘର ମାଲିକଙ୍କ ମୁଣ୍ଡରେ ଲଗାଇ ମାରିଦେବାକୁ ଧମକ ଦେବା ସହ କାହାକୁ ନ ଜଣାଇବାକୁ ଚେତାବନି ଦେଇ ଚାଲିଯାଇଥିଲେ। ମଙ୍ଗଳବାର ଏ ନେଇ ଘର ମାଲିକ ଝରିଗାଁ ଥାନାରେ ଏତଲା ଦେଇଥିଲେ। ପୋଲିସ ୫୦/୨୨ରେ ଏକ ମାମଲା ରୁଜୁକରି ଅଞ୍ଚଳା ଗ୍ରାମର ଅଭିଯୁକ୍ତଙ୍କୁ ଗିରଫ କରିଛି। ଏଥିସହ ଘରଠାରୁ କିଛି ଦୂରରେ ଥିବା ଗଛ ନିକଟରେ ମାଟିତଳେ ପୋତିଥିବା ବନ୍ଧୁକ ମଧ୍ୟ ଜବତ କରାଯାଇଛି। ଏସ୍ଆଇ ପ୍ରମୋଦ କୁମାର ଖଣ୍ଡୁଆଳ ତଦନ୍ତ ଚଳାଇଛନ୍ତି। କିଛି ଦିନ ପୂର୍ବରୁ ଅଭିଯୁକ୍ତ ଜିଲା ବାହାରୁ ୯ ଏମ୍ଏମ୍ ପିସ୍ତଲ କିଣିଥିବା ଜଣାପଡ଼ିଛି। କିଣିଥିବା ମୂଲ୍ୟରୁ ଅଧିକରେ ବିକ୍ରି କରି ଲାଭବାନ ହେବାକୁ ଆଶା ରଖିଥିବା ଅଭିଯୁକ୍ତ ପୋଲିସ ନିକଟରେ ପ୍ରକାଶ କରିଛନ୍ତି। ତେବେ ଏଥିରେ କେତେ ସତ୍ୟତା ରହିଛି ସେ ନେଇ ତଦନ୍ତ ଚାଲିଛି। ପିସ୍ତଲର ମୂଲ୍ୟ ୪୫ ହଜାର ଟଙ୍କା ହୋଇଥିବା ବେଳେ ୨୮ ହଜାର ଟଙ୍କା ଦେଇ ଆଣିଥିଲେ। ବଳକା ୧୭ ହଜାର ଟଙ୍କା ଦେଲେ ୧୦ଟି ଗୁଳି ମିଳିବ ବୋଲି ଅଭିଯୁକ୍ତ କହିଛନ୍ତି। ଅନ୍ୟପକ୍ଷରେ ବନ୍ଧୁକ କିଣିବାରେ ସହେଯାଗ କରିଥିବା ଉମରକୋଟର ଦୁଇ ଯୁବକଙ୍କୁ ପୋଲିସ ଅଟକ ରଖ ପଚରାଉଚରା ଥାନା ଅଧିକାରୀ ନଟବର ନନ୍ଦ ପ୍ରକାଶ କରିଛନ୍ତି। ଅଭିଯୁକ୍ତ ଏବଂ ଅଟକ ବ୍ୟକ୍ତିଙ୍କ ବିଷୟରେ ପୋଲିସ ସୂଚନା ଦେଇନାହିଁ।