ଭଦ୍ରକ ଅଫିସ,୨୨।୮: ଭଦ୍ରକ ପୁରୁଣା ବଜାରରେ ଏକ ଅଭାବନୀୟ କାଣ୍ଡ ଘଟିଛି। ପୋଲିସ ଅଭିଯୋଗ ନ ଶୁଣିବାରୁ ଥାନା ସମ୍ମୁଖରେ ଆତ୍ମହତ୍ୟା ଉଦ୍ୟମ କଲେ ଯୁବକ। ଗୁରୁତର ଅବସ୍ଥାରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ସୂଚନାଯୋଗ୍ୟ, ପୁରୁଣା ବଜାରରେ ରହୁଥିବା ସେକ ଫୟାଜଙ୍କ ନାଁରେ ପାରିବାରିକ କଳହକୁ ନେଇ ଏକ ଏତଲା ଦିଆଯାଇଥିଲା। ପରେ ସେ ମଧ୍ୟ ପାଲଟା ଅଭିଯୋଗ କରିଥିଲେ। ହେଲେ ଥାନାକୁ ଅଭିଯୋଗ ନେଇ ବାରମ୍ବାର ଦୌଡୁଥିଲେ ମଧ୍ୟ ଥାନାବାବୁ ଅଭିଯୋଗକୁ ଗୁରୁତ୍ୱ ଦେଉ ନ ଥିଲେ। ଫଳରେ ଶୁକ୍ରବାର ରାତି ପ୍ରାୟ ୧୦ଟାରେ ଅଭିଯୋଗକାରୀ ଯୁବକ ଫୟାଜ ଥାନା ସମ୍ମୁଖରେ ନିଜ ଦେହରେ ସାନିଟାଇଜର ପକାଇ ନିଆଁ ଲଗାଇ ଆତ୍ମହତ୍ୟା ଉଦ୍ୟମ କରିଥିଲେ। ସଙ୍ଗେ ସଙ୍ଗେ ପୋଲିସ ତାଙ୍କୁ ଉଦ୍ଧାର କରି ଗୁରୁତର ଅବସ୍ଥାରେ ଭଦ୍ରକ ଜିଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ। ଫୟାଜଙ୍କ ହାତ, ଗୋଡ଼ ଓ ବିଭିନ୍ନ ସ୍ଥାନ ପୋଡ଼ିଯାଇଥିବା ସୂଚନା ରହିଛି।