ହିଞ୍ଜିଳିକାଟୁ,୪।୪(ଡି.ଏନ୍.ଏ.): ଗଞ୍ଜାମ ଜିଲା ହିଞ୍ଜିଳି ଥାନା ଅଧୀନ ଗୋପୀନାଥପୁର ନିକଟ ଜାତୀୟ ରାଜପଥ ନଂ.୫୯ରେ ଥିବା ଏକ ଗ୍ୟାରେଜରେ ରବିବାର ଜଣେ ଯୁବକ ଗୁଳି ଫୁଟାଇ ଆତ୍ମହତ୍ୟା କରିଛନ୍ତି। ସେ ହେଲେ ଇପିଲି ଜଗନ୍ନାଥ ( ୩୫)।
ଜଗନ୍ନାଥ ଓ ତାଙ୍କ ସ୍ତ୍ରୀ ସରିତାଙ୍କ ମଧ୍ୟରେ ପୂର୍ବରୁ ପାରିବାରିକ ଅଶାନ୍ତି ଲାଗି ରହିଥିଲା। ଏଥିପାଇଁ ସରିତା କିଛିଦିନ ହେଲା ଦୁଇ ପୁଅଙ୍କୁ ନେଇ ବାପଘର କୁକୁଡ଼ାଖଣ୍ଡିରେ ରହୁଥିଲେ। ଅପରାହ୍ନରେ କୌଣସି କଥାକୁ ନେଇ ଜଗନ୍ନାଥ ଶ୍ୱଶୁର ଘରକୁ ଯାଇ ଗଣ୍ଡଗୋଳ କରିଥିଲେ। ପରେ ଶାଶୁ ଓ ସ୍ତ୍ରୀଙ୍କୁ ମାରପିଟ୍ କରିଥିଲେ। ଏ ନେଇ ଶାଶୁ ଓ ସ୍ତ୍ରୀ ସରିତା ବ୍ରହ୍ମପୁର ସଦର ଥାନାକୁ ଅଭିଯୋଗ କରିବାକୁ ଯାଇଥିଲେ। ଏହି ସମୟରେ ଜଗନ୍ନାଥ ଗୋପୀନାଥପୁର ଛକରେ ଥିବା ଏକ ଗ୍ୟାରେଜକୁ ଆସିଥିଲେ। ସେଠାରେ ଭିତରପଟୁ କବାଟ ବନ୍ଦ କରି ଏକ ପିସ୍ତଲରୁ ନିଜ ବେକକୁ ଗୁଳି ଚଳାଇଥିଲେ। ଖବର ପାଇ ହିଞ୍ଜିଳି ଥାନା ଆଇଆଇସି ଅଭିମନ୍ୟୁ ଦାସ ଓ ପୋଲିସ ଟିମ୍ ତହସିଲଦାର ପ୍ରଭାତ କୁମାର ପରିଡ଼ାଙ୍କ ଉପସ୍ଥିତିରେ ବନ୍ଦ ଥିବା ଗ୍ୟାରେଜର କବାଟ ଭାଙ୍ଗି ମୃତଦେହକୁ ବାହାର କରିଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ଡାକ୍ତରଖାନା ପଠାଇଛି। ତେବେ ପାରିବାରିକ ଅଶାନ୍ତିରୁ ଜଗନ୍ନାଥ ଆତ୍ମହତ୍ୟା କରିଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି। ଏ ନେଇ ଥାନାରେ କୌଣସି ମାମଲା ରୁଜୁ ହୋଇନାହିଁ।