ଖଇରା,୧୦।୬(ଡି.ଏନ୍.ଏ): ବାଲେଶ୍ବର ଜିଲା ଖଇରା ଥାନା ଅଧୀନ ତୁଟୋ ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ପ୍ରେମ ନିବେଦନରେ ବିଫଳ ହେବା ପରେ ଜଣେ ଯୁବକ ଜଣକ ଏକ ଧାରୁଆ ଛୁରିରେ ଉକ୍ତ ଗ୍ରାମର ଜନୈକ ନାବାଳିକାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି। ଏନେଇ ଖଇରା ପୋଲିସ ତୁଟୋ ଗ୍ରାମର ସଂପୃକ୍ତ ଯୁବକ ରଶ୍ମିରଞ୍ଜନ ଦାସ(୨୪)ଙ୍କୁ ଧରି ଥାନାରେ ଅଟକ ରଖିଛି। ସୂଚନାଯୋଗ୍ୟ, ରବିନ୍ଦ୍ର ଦାସଙ୍କ ପୁଅ ରଶ୍ମି କିଛି ଦିନ ତଳେ ସେହି ଗ୍ରାମର ୯ମ ଶ୍ରେଣୀରେ ପଢୁଥିବା ନାବାଳିକାଙ୍କୁ ପ୍ରେମ ନିବେଦନ କରିଥିଲେ। ଏନେଇ ନାବାଳିକା ଜଣକ ଘରେ ଜଣାଇବା ପରେ ଗ୍ରାମରେ ଏକ ବୈଠକ ଡକାଯାଇଥିଲା। ରଶ୍ମି ଉକ୍ତ ବୈଠକରେ ଭୁଲ ମାଗିଥିଲେ। ଏହାକୁ ନେଇ ରଶ୍ମି ପ୍ରତିଶୋଧ ପରାୟଣ ହୋଇପଡ଼ିଥିଲେ। ଗୁରୁବାର ସକାଳେ ନାବାଳିକା ଜଣକ ସମ୍ପେଇ ଗ୍ରାମକୁ ଟ୍ୟୁସନ ଯାଉଥିବା ବେଳେ ଏହାର ସୁଯୋଗ ଉଠାଇ ଅନ୍ୟ ୪ଜଣ ସାଙ୍ଗଙ୍କ ସହ ମିଶି ରଶ୍ମି ଉକ୍ତ ନାବାଳିକାକୁ ଆକ୍ରମଣ କରିଥିଲେ। ତେବେ ନାବାଳିକାଙ୍କ ଅନ୍ୟ ସାଙ୍ଗମାନଙ୍କୁ ଆକ୍ରମଣର ଭୟ ଦେଖାଇବାରୁ ସେମାନେ ପାଖକୁ ନ ଯାଇ ସେଠାରୁ ପଳାଇଯାଇଥିଲେ। ପରେ ଏନେଇ ସେମାନେ ପରିବାର ଓ ଗାଁଲୋକଙ୍କୁ ଖବର ଦେଇଥିଲେ। ଘଟଣାସ୍ଥଳରେ ଗ୍ରାମବାସୀ ପହଞ୍ଚିବା ପରେ ରଶ୍ମି ଉକ୍ତ ନାବାଳିକାଙ୍କୁ ମୁର୍ମୁଷ ଅବସ୍ଥାରେ ଛାଡ଼ି ପଳାଇଥିଲେ। ରଶ୍ମି ଅତି ନିର୍ମମ ଭାବେ ନାବାଳିକାଙ୍କ କାନ, ମୁହଁ ତଥା ଶରୀରର ବିଭିନ୍ନ ଅଂଶକୁ କାଟି ରକ୍ତାକ୍ତ କରିଦେଇଥିବା ଜଣାପଡ଼ିଛି। ପରେ ଉକ୍ତ ନାବାଳିକାଙ୍କୁ ଉଦ୍ଧାର କରାଯାଇ ପ୍ରଥମେ ଖଇରା ଓ ପରେ ଗୁରୁତର ଅବସ୍ଥାରେ ଭଦ୍ରକ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।