କୋକସରା,୧୧ା୫(ଡି.ଏନ୍.ଏ.): ପ୍ରଥମେ ଯୁବକଙ୍କୁ ହତ୍ୟା କରି ବେକରେ ଫାଶ ଦେଇ ଏକ ଶାଗୁଆନ ଗଛରେ ଝୁଲାଇ ଆତ୍ମହତ୍ୟାର ନାଟକ ରଚିଥିଲେ ଅଭିଯୁକ୍ତ । ହେଲେ ପରିବାରର ଅଭିଯୋଗ ପରେ ୪ ଜଣିଆ ସାଇଣ୍ଟିଫିକ୍ ଟିମ୍ର ତଦନ୍ତ, ପାରିପାଶର୍ବିକ ଅବସ୍ଥା ଓ ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ଏହା ଆତ୍ମହତ୍ୟା ନୁହେଁ ବରଂ ସୁପରିକଳ୍ପିତ ହତ୍ୟାକାଣ୍ଡ ବୋଲି ସ୍ପଷ୍ଟ ହୋଇଛି। ଏହି ଘଟଣାରେ ଧର୍ମଗଡ଼ ଉପଖଣ୍ଡ ପୋଲିସ ଅଧିକାରୀ ଧିରଜ ଚୋପଦାରଙ୍କ ନେତୃତ୍ୱରେ ଆମପାଣି ପୋଲିସର ଛାନଭିନ ଓ ଅଟକ ରଖିଥିବା ଅଭିଯୁକ୍ତଙ୍କ ଠାରୁ ସତ କଥା ବାହାରିଛି।
ସୂଚନାଅନୁସାରେ ଆମପାଣି ଥାନା ଅନ୍ତର୍ଗତ ବରାଡଙ୍ଗା ପଞ୍ଚାୟତ କେନ୍ଦୁଡଙ୍ଗରି ଗ୍ରାମର ଦ୍ୱାରିକା ଦାସ (୨୨)ଙ୍କ ଝୁଲନ୍ତା ମୃତଦେହକୁ ଗତ ୩ ତାରିଖରେ ଗ୍ରାମ ନିକଟରେ ଥିବା ଏକ ପୋଖରୀ ହୁଡାର ଶାଗୁଆନ ଗଛରୁ ଜବତ କରିଥିଲା ଆମପାଣି ପୋଲିସ। ଏ ନେଇ ମୃତକଙ୍କ ବାପା ଟିକେଶ୍ୱର ଦାସ ହତ୍ୟା ଅଭିଯୋଗ ଓ ବିଭିନ୍ନ ଦିଗକୁ ତଦନ୍ତ ପରେ ପୋଲିସ ଏକ ମାମଲା ରୁଜୁ କରି ସନ୍ଦେହରେ ପ୍ରଥମେ କିଛି ଯୁବକଙ୍କୁ ଆମପାଣି ଓ କୋକସରା ଥାନାରେ ଅଟକ ରଖି ପଚରାଉଚରା କରିଥିଲା। ଏହା ପରେ ହତ୍ୟାକାଣ୍ଡର ପର୍ଦାଫାଶ ହୋଇଥିଲା। ଅଭିଯୁକ୍ତ ହତ୍ୟା ଘଟାଇଥିବା ସ୍ବୀକାର କରିବା ପରେ ପୋଲିସ ଏହି ଘଟଣାରେ ୩ ଯୁବକଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଥିବା ନେଇ ସୂଚନା ଦେଇଛି। ଦ୍ୱାରିକାଙ୍କୁ ହତ୍ୟା କରିଥିବା ଅଭିଯୋଗରେ ପୋଲିସ ଧର୍ମଗଡ଼ ବ୍ଲକ ପର୍ଲା ଗ୍ରାମର ପ୍ରଦୀପ କୁମାର ଦାସ (୩୯) କେନ୍ଦୁଡଙ୍ଗରି ଗ୍ରାମର ଯତୀନ ଦାସ(୩୯) ଓ ମହେନ୍ଦ୍ର ନାଏକ(୩୦)ଙ୍କୁ କୋର୍ଟ ଚାଲାଣ କରିଥିବା ନେଇ ଆମପାଣି ପୋଲିସ ଅଧିକାରୀ ଚତୁର୍ଭୁଜ ନାଏକ ସୂଚନା ଦେଇଛନ୍ତି। ଏନେଇ ଆମପାଣି ଥାନାରେ କେସ୍ ନମ୍ବର ୪୮/୨୨ରେ ଏକ ମାମଲା ରୁଜୁ ହୋଇ ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ତେବେ ପାରିବାରିକ କଳହ ଓ ଦ୍ୱାରିକାଙ୍କ ମୃତ୍ୟୁରେ ସମ୍ପର୍କୟ ଭଉଣୀଙ୍କ ସହ ପ୍ରେମ ସମ୍ପର୍କକୁ ନେଇ ହତ୍ୟାକାଣ୍ଡ ହୋଇଥିବା ସୂଚନା ମିଳିଛି। ପୋଲିସର ତଦନ୍ତ ପ୍ରକ୍ରିୟାକୁ ପ୍ରତିବାଦ କରି ହତ୍ୟାରେ ଜଡ଼ିତ ଥିବା ଯୁବକଙ୍କୁ ଖସାଇ ଦିଆଯାଇଥିବା ଅଭିଯୋଗରେ ଆମପାଣି ଥାନା ସମ୍ମୁଖରେ ମୃତକ ଯୁବକଙ୍କ ପରିବାର ଓ ମହିଳାମାନେ ଧାରଣା ଦେଇଥିବା ଜଣାପଡ଼ିଛି। ଖବର ଲେଖାଯିବା ପର୍ଯ୍ୟନ୍ତ ଏ ନେଇ ପୋଲିସ ପକ୍ଷରୁ କୌଣସି ସ୍ପଷ୍ଟୀକରଣ ମିଳିନାହିଁ।
