ଖୋର୍ଦ୍ଧା ଅଫିସ/ନିରାକାରପୁର,୧୨।୧୦(ଡି.ଏନ୍.ଏ.): ଖୋର୍ଦ୍ଧା ଜିଲା ନିରାକାରପୁର ଥାନା ଅନ୍ତର୍ଗତ ଡ଼ିଆ ଗ୍ରାମର ବିକାଶ ସାହୁ(୨୯)ଙ୍କୁ ହତ୍ୟା କରାଯାଇଛି। ତାଙ୍କ ମୃତଦେହକୁ ଜଙ୍କିଆ ଥାନା ରମାବିଲି ଗ୍ରାମର ଏକ ପରିତ୍ୟକ୍ତ କୂଅରୁ ଶୁକ୍ରବାର ପୋଲିସ ଜବତ କରିଛି। ଶନିବାର ବିକାଶଙ୍କ ନିର୍ବନ୍ଧ ହେବାକୁ ଥିବାବେଳେ ଏହାପୂର୍ବରୁ ତାଙ୍କର ମୃତ୍ୟୁକୁ କେହି ସହଜରେ ଗ୍ରହଣ କରିପାରୁ ନାହାନ୍ତି। ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ ସହ ଜଙ୍କିଆ ଥାନାଧିକାରୀଙ୍କ ବଦଳି ଦାବିରେ ପରିବାର ଓ ଗ୍ରାମବାସୀ ୫ଘଣ୍ଟା ଧରି ରମାବିଲି ଗଁା ମୁଣ୍ଡରେ ନୂଆ ଜଗନ୍ନାଥ ସଡ଼କ ରାସ୍ତା ଅବରୋଧ କରିଥିଲେ। ଅନ୍ୟପକ୍ଷରେ ବାପା କେଦାରନାଥଙ୍କ ଅଭିଯୋଗ ପରେ ପୋଲିସ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହ ୫ ଜଣଙ୍କୁ ଅଟକ ରଖାଯାଇଥିବା ଏସ୍ପି ଅଜୟ ପ୍ରତାପ ସ୍ବାଇଁ କହିଛନ୍ତି।
ଗତ ୯ ତାରିଖରେ ବିକାଶ ଗ୍ରାମର ଜଣେ ଯୁବକଙ୍କ ବାହାଘରରେ ରମାବିଲି ଗାଁକୁ ଅନ୍ୟମାନଙ୍କ ସହ ବରଯାତ୍ରୀ ଯାଇଥିଲେ। ଶୋଭାଯାତ୍ରା ଯାଉଥିବାବେଳେ ବର ବସିଥିବା କାର ଭିତର ଅନ୍ଧାର ଥିବାରୁ ସ୍ଥାନୀୟ ଜଣେ ଯୁବକ ଚାଳକଙ୍କୁ ଏକ ଚାପୁଡ଼ା ମାରିଥିଲେ। ଏହାକୁ ନେଇ ପାଟିତୁଣ୍ଡ ହୋଇଥିଲା। ପରେ ରମାବିଲି ଗ୍ରାମର ମାଡ଼ ମାରିଥିବା ଯୁବକଙ୍କ ସହ ୨୦ରୁ ୩୦ଜଣ ବରଯାତ୍ରୀଙ୍କୁ ଆକ୍ରମଣ କରିଥିଲେ। ସମସ୍ତ ବରଯାତ୍ରୀ ସେଠାରୁ ଛତ୍ରଭଙ୍ଗ ଦେଇ ଘରକୁ ଫେରିଥିବା ବେଳେ ବିକାଶ ଫେରି ନ ଥିଲେ। ଗ୍ରାମବାସୀ ଓ ପରିବାର ଲୋକେ ରମାବିଲିରେ ପହଞ୍ଚତ୍ ବିକାଶଙ୍କୁ ଖୋଜାଖୋଜି କରି ପାଇ ନ ଥିଲେ। କନ୍ୟା ଘର ନିକଟରେ ବିକାଶଙ୍କ ବାଇକ୍ (ଏପି ୨୮ବିୟୁ ୬୪୦୧)ଥିବା ଦେଖିବା ପରେ ପରିବାରଲୋକେ ଜଙ୍କିଆ ଥାନାରେ ଅଭିଯୋଗ କରିଥିଲେ। ମାତ୍ର ଜଙ୍କିଆ ପୋଲିସ ନିରାକାରପୁର ଥାନାରେ ଅଭିଯୋଗ କରିବାକୁ କହି ଫେରାଇ ଦେଇଥିଲା। ନିରାକାରପୁର ପୋଲିସ ମଧ୍ୟ ଅଭିଯୋଗପତ୍ର ରଖିବାକୁ ମନା କରିଦେଇଥିଲା। ଏସ୍ପିଙ୍କ ନିର୍ଦ୍ଦେଶକ୍ରମେ ଗୁରୁବାର ସନ୍ଧ୍ୟାରେ ଜଙ୍କିଆ ପୋଲିସ ନିଖୋଜ ମାମଲା ରୁଜୁ କରିଥିଲା। ଶୁକ୍ରବାର ପୋଲିସ ତଦନ୍ତ ବେଳେ ରମାବିଲି ମଠସାହି କୂଅରୁ ବିକାଶଙ୍କ ମୃତଦେହ ମିଳିବା ପରେ ରାସ୍ତାରୋକୋ ହୋଇଥିଲା। ଏସ୍ପି ସ୍ବାଇଁ ଓ ଉପଜିଲାପାଳ ଅଶୋକ ବେହେୁରିଆ,ଏସ୍ଡିପିଓ ସୁଶିଲ ମିଶ୍ର ପ୍ରମୁଖ ଘଟଣାସ୍ଥଳରେ ପହଞ୍ଚତ୍ ବୁଝାଶୁଝା କରିବା ସହ ଅଭିଯୁକ୍ତଙ୍କୁ ଗିରଫ ପ୍ରତଶ୍ରୁତି ଦେଇଥିଲେ।
