ତାଳଚେର,୧୪ା୪(ନି.ପ୍ର.): ଟ୍ରେନ୍ ଓ୍ବାଗନରେ କୋଇଲା ବୋଝେଇ ବେଳେ ପୋତି ହୋଇଯାଇଥିବା ଜଣେ ଯୁବକଙ୍କୁ ଉଦ୍ଧାର କରାଯାଇଛି। ଘଟଣା ଘଟିଛି ଅନୁଗୋଳ ଜିଲା ତାଳଚେରସ୍ଥିତ ଏମ୍ସିଏଲ୍ର ଅନନ୍ତ କୋଇଲା ଖଣିରେ। ଉଦ୍ଧାର ଯୁବକଙ୍କୁ ଚିକିତ୍ସା ପାଇଁ ସେଣ୍ଟ୍ରାଲ ହସ୍ପିଟାଲରେ ଭର୍ତ୍ତି କରାଯାଇଛି। ସୂଚନା ଅନୁଯାୟୀ, ମଙ୍ଗଳବାର ସକାଳେ ଅନନ୍ତ କୋଇଲା ଖଣି ଅଞ୍ଚଳରେ ଟ୍ରେନ୍ରେ କୋଇଲା ଲୋଡ୍ କରାଯାଉଥିଲା। ଓ୍ବାଗନଗୁଡ଼ିକ ତନଖି କରା ନ ଯାଇ ଲୋଡର ମାଧ୍ୟମରେ କୋଇଲା ଭରାଯାଉଥିବା ବେଳେ ହଠାତ୍ ଏକ ଓ୍ବାଗନ ମଧ୍ୟରୁ ଚିତ୍କାର ଶୁଭିଥିଲା। ସେଠାରେ ଥିବା ଶ୍ରମିକ ଓ କର୍ମଚାରୀମାନେ ତୁରନ୍ତ କାର୍ଯ୍ୟ ବନ୍ଦ କରି ଓ୍ବାଗନ ମଧ୍ୟକୁ ପଶି କୋଇଲା ଗଦା ତଳୁ ଜଣେ ଯୁବକଙ୍କୁ ଉଦ୍ଧାର କରିଥିଲେ। ସମ୍ପୃକ୍ତ ଯୁବକଙ୍କ ନାମ ସନ୍ତୋଷ କୁମାର ମୁଖୀ ଓ ଘର ଜଗତସିଂହପୁର ଅଞ୍ଚଳରେ ବୋଲି ଜଣାପଡିଛି। ତେବେ ସନ୍ତୋଷ କିପରି ଅନନ୍ତ କୋଇଲା ଖଣି ମଧ୍ୟରେ ଥିବା ରେଳ ୱାଗନ ଭିତରକୁ ଗଲେ ତାହା ଜଣାପଡ଼ି ନାହିଁ। ଖଣି ଭିତରେ ସୁରକ୍ଷା କର୍ମଚାରୀମାନେ ନିୟୋଜିତ ଥିବାବେଳେ ବାହାର ଲୋକ ସେଠାକୁ ଯିବା ଓ କୋଇଲା ଲୋଡ୍ ପୂର୍ବରୁ ଓ୍ବାଗନଗୁଡ଼ିକ ତନଖି କରା ନ ଯିବା ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଏ ସମ୍ପର୍କରେ ଖଣି କର୍ତ୍ତୃପକ୍ଷଙ୍କ ମତାମତ ମିଳିପାରି ନାହିଁ।
