ବ୍ରହ୍ମପୁର ଅଫିସ, ୧୭।୩: ଗଞ୍ଜାମ ଜିଲା ବୈଦ୍ୟନାଥପୁର ଥାନା ଅନ୍ତର୍ଗତ ଖୋଡ଼ସିଂ ଧୋବା ସାହିରେ ମଙ୍ଗଳବାର ମଧ୍ୟରାତିରେ ଯୁବକଙ୍କୁ ଗୁଳିମାଡ଼ ହୋଇଛି। ପୋଲିସ ଏହି ଘଟଣାରେ ବୁଧବାର ମାଷ୍ଟରମାଇଣ୍ଡ ସମେତ ୩ ଜଣଙ୍କୁ ଗିରଫ କରିଛି । ସେମାନେ ହେଲେ ଖୋଡାସିଂ ତୋଟା ସାହିର ଦିବାକର ନାୟକ(୪୪), ପ୍ରଦୀପ ହାତୀ(୨୭) ଓ କୁନା ନାୟକ (୩୯) । ପୋଲିସ ଦିବାକରଙ୍କ ନିକଟରୁ ଏକ ବନ୍ଧୁକ ଜବତ କରିଛି । ସେହିପରି ଗୁଳିମାଡ଼ର ଶିକାର ଯୁବକଜଣଙ୍କ ହେଲେ ଖୋଡାସିଂଙ୍କ ସହ ସୁରଜ କୁମାର ଦଳାଇ।
ପ୍ରକାଶ ଯେ, କୌଣସି କାରଣକୁ ନେଇ ସୁରଜ ଏବଂ ଦିବାକରଙ୍କ ମଧ୍ୟରେ ପାଟିତୁଣ୍ଡ ଲାଗିରହିଥିଲା । ଏଣୁ ସୁରଜଙ୍କୁ ପାନେ ଦେବା ପାଇଁ ଦିବାକର ଯୋଜନା କରିଥିଲେ। ମଙ୍ଗଳବାର ରାତିରେ ସୁରଜ ଏକାକୀ ଘରକୁ ଫେରୁଥିବା ଦେଖି ଦିବାକର ଅନ୍ୟ ଦୁଇ ସହଯୋଗୀଙ୍କ ସହ ତାଙ୍କୁ ରାସ୍ତାରେ ଅଟକାଇ ପାଟିତୁଣ୍ଡ କରିଥିଲେ। ପରେ ଦିବାକର ଏକ ବନ୍ଧୁକ ବାହାର କରି ସୁରଜଙ୍କ ଉପରକୁ ଗୁଳିମାଡ଼ କରିଥିଲେ। ସୁରଜଙ୍କ ଡାହାଣ ହାତ ଆଙ୍ଗୁଠିରେ ଗୁଳି ବାଜିଥିଲା। ଘଟଣା ପରେ ଅଭିଯୁକ୍ତମାନେ ସେଠାରୁ ଚମ୍ପଟ ମାରିଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଆହତ ସୁରଜକୁ ଉଦ୍ଧାରକରି ଏମ୍କେସିଜି ମେଡିକାଲରେ ଭର୍ତ୍ତି କରିଥିଲା। ବିଳମ୍ବିତ ରାତିରେ ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ମାଷ୍ଟରମାଇଣ୍ଡ ଦିବାକର ଓ ତାଙ୍କ ଅନ୍ୟ ଦୁଇ ସହଯୋଗୀଙ୍କୁ କାବୁ କରିଥିଲା। ଏ ନେଇ ପୋଲିସ ଏକ ମାମଲା(କେସ୍ ନଂ. ୭୦/୨୧ ) ରୁଜୁ କରି ଅଭିଯୁକ୍ତଙ୍କୁ ବୁଧବାର କୋର୍ଟ ଚାଲାଣ କରିଥିବା ଜଣାପଡ଼ିଛି।