ବେଙ୍ଗାଲୁର,୯।୧ : ସୋସିଆଲ ମିଡିଆରେ ଲୋକପ୍ରିୟ ହେବା ପାଇଁ ଲୋକମାନେ ବିଭିନ୍ନ କୌଶଳ ଅବଲମ୍ବନ କରୁଛନ୍ତି। କେତେକ ମେଟ୍ରୋରେ ନାଚୁଛନ୍ତି ଏବଂ କେହି କେହି ଷ୍ଟଣ୍ଟ କରୁଛନ୍ତି। କିନ୍ତୁ ଜଣେ ଯୁବକଙ୍କ ପାଇଁ ଏହା କରିବା ମହଙ୍ଗାହୋଇଛି। ଏହି ଯୁବକ ଜଣକ ବେଙ୍ଗାଲୁରୁ ମେଟ୍ରୋରେ ଯାତ୍ରୀଙ୍କୁ ଧମକାଇ ଭୟଭୀତ କରାଇ ସେମାନଙ୍କ ଭିଡିଓ ରେକର୍ଡିଂ କରି ସୋସିଆଲ ମିଡ଼ିଆରେ ପୋଷ୍ଟ କରିଥିଲେ। ଯେତେବେଳେ ଭିଡିଓ ଭାଇରାଲ ହେଲା ସେତେବେଳେ ସେ ଅସୁବିଧାରେ ପଡ଼ିଲେ।
୩୦ ବର୍ଷିୟ ଇନଷ୍ଟାଗ୍ରାମ ଇନଫ୍ଲଏନ୍ସର ସନ୍ତୋଷ କୁମାର ମେଟ୍ରୋରେ ଯାତ୍ରୀଙ୍କ ଭିଡ ରେ ପହଞ୍ଚି ଭିଡିଓ ରେକର୍ଡ କରିଛନ୍ତି । ତାଙ୍କୁ ଇନଷ୍ଟାଗ୍ରାମରେ ୧.୬୨ ଲକ୍ଷ ଲୋକ ଫଲୋ କରୁଛନ୍ତି ।
ତେବେ ତାଙ୍କର ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଲୋକମାନେ କାର୍ଯ୍ୟାନୁଷ୍ଠାନ ଦାବି କରିଥିଲେ। ଏହା ପରେ, ବେଙ୍ଗାଲୁରୁ ମେଟ୍ରୋ ରେଲଓ୍ବେ ତାଙ୍କ ଉପରେ ନଜର ରଖିଲା ଏବଂ ତାଙ୍କର ସମ୍ପୂର୍ଣ୍ଣ ବିବରଣୀ ସଂଗ୍ରହ କଲା । ମେଟ୍ରୋ ଅଧିକାରୀମାନେ ତାଙ୍କ ଗାଡି ନମ୍ବର ପାଇ ପୋଲିସକୁ ଏହା ବିଷୟରେ ଜଣାଇଥିଲେ।
ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ନ ଥିବା ଅଭିଯୋଗ ହୋଇଛି । କିନ୍ତୁ ଅଭିଯୋଗ ଆସିବା ପରେ ପୋଲିସ ଘଟଣାର ଅନୁସନ୍ଧାନ କରିଥିଲେ ଏବଂ ପରେ ଉକ୍ତ ଯୁବକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ପୋଲିସ ଇନଷ୍ଟାଗ୍ରାମ ଇନଫ୍ଲୁଏନ୍ସରକୁ ପୋଲିସ ଷ୍ଟେଶନକୁ ଡାକିଥିଲା। ଏକ ରିପୋର୍ଟ ଅନୁଯାୟୀ, ଅଭିଯୁକ୍ତଙ୍କ ମା କାନ୍ଦି କାନ୍ଦି ତାଙ୍କ ପୁଅ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ନ କରିବାକୁ ନିବେଦନ କରିଥିଲେ।
ଏହା ପରେ ବ୍ୟକ୍ତି ଜଣକ ଏକ ଲିଖିତ କ୍ଷମା ପ୍ରାର୍ଥନା କରିଥିଲେ ଏବଂ ସୋସିଆଲ ମିଡିଆରୁ ଏହିପରି ସମସ୍ତ ଭିଡିଓ ହଟାଇବାକୁ ରାଜି ହୋଇଥିଲେ। ମେଟ୍ରୋ ଆକ୍ଟର ଧାରା ୫୯ (୧) ଅନୁଯାୟୀ ତାଙ୍କ ବିରୋଧରେ ପୋଲିସ ଏକ ମାମଲା ରୁଜୁ କରିଥିଲା। ୫୦୦ ଟଙ୍କା ଜୋରିମାନା ଲାଗୁ କରାଯାଇଥିଲା ଏବଂ ବେଙ୍ଗାଲୁରୁ ମେଟ୍ରୋ ରେଲଓ୍ବେ ଦ୍ୱାରା କଡା ଚେତାବନୀ ଦିଆଯାଇଥିଲା। ବେଙ୍ଗାଲୁରୁ ମେଟ୍ରୋ ରେଲଓ୍ବେ ଦ୍ୱାରା ଏପରି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପ୍ରଥମ ଘଟଣା ନୁହେଁ, ଏହା ପୂର୍ବରୁ ମଧ୍ୟ ମେଟ୍ରୋରେ ଲୋକଙ୍କୁ ହଇରାଣ କରୁଥିବା କିମ୍ବା ଆଇନ ଭାଙ୍ଗୁଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।