ସମ୍ବଲପୁର,୨୫ା୯(ବ୍ୟୁରୋ): ଯୁବତୀଙ୍କ ନକଲି ଫେସ୍ବୁକ ଆକାଉଣ୍ଟ ଖୋଲି ଫଟୋ ଭାଇରାଲ କରିଥିବା ଅଭିଯୋଗରେ ସମ୍ବଲପୁର ଜିଲା ସାଇବର ଥାନା ପୋଲିସ ଧନୁପାଲି ଥାନା ଅଞ୍ଚଳରୁ ଜଣେ ଯୁବକଙ୍କୁ ଗିରଫ କରିଛି। ସେ ହେଲେ ବରଗଡ଼ ଜିଲା ଭେଡନ ଥାନା ଯୋଗିପାଲିର କ୍ଷୀରସିନ୍ଧୁ ପ୍ରଧାନ(୨୨)।
ଅଭିଯୋଗ ମୁତାବକ, କ୍ଷୀରସିନ୍ଧୁଙ୍କ ସହ ଯୁଯୁମୁରା ଅଞ୍ଚଳର ଜଣେ ଯୁବତୀଙ୍କ ଫେସ୍ବୁକରେ ପରିଚିତ ହୋଇଥିଲା। କିଛିଦିନ ଫେସ୍ବୁକ ସାଙ୍ଗ ରହିବା ପରେ ଯୁବତୀ ଜଣକ ତାଙ୍କୁ ଅନ୍ଫ୍ରେଣ୍ଡ କରିଦେଇଥିଲେ। ଏହାକୁ ନେଇ କ୍ଷୀରସିନ୍ଧୁ ପ୍ରତିଶୋଧ ନେବାକୁ ଯୋଜନା କରିଥିଲେ।
ଯୁବତୀଙ୍କ ଫଟୋ ଦେଇ ଏକ ନକଲି ଫେସ୍ବୁକ ଆକାଉଣ୍ଟ ଖୋଲିଥିଲେ। ପରବର୍ତ୍ତି ସମୟରେ ଯୁବତୀଙ୍କ ଫଟୋକୁ ଏଡିଟିଂ କରି ନଗ୍ନ ଫଟୋ ଭାଇରାଲ କରିଥିଲେ। ଭୁବନେଶ୍ୱରରେ କାର୍ଯ୍ୟରତ ଥିବା ଯୁବତୀ ଜଣଙ୍କ ଏହା ଜାଣିବା ପରେ ତାଙ୍କର ବଡ ଭଉଣୀଙ୍କୁ କହିଥିଲେ। ଏନେଇ ବଡ ଭଉଣୀ ସାଇବର ଥାନାରେ ଅଭିଯୋଗ କରିଥିଲେ। ସାଇବର ଥାନା ଅଧିକାରୀଣୀ ପି. ମେହେର ଏକ ମାମଲା ରୁଜୁ କରିବା ତଦନ୍ତ ଆରମ୍ଭ କରିଥିଲେ।