ରାୟଗଡ଼ା ଅଫିସ,୨୪ା୪: ଚଳନ୍ତା ଟ୍ରେନ୍ରେ ହଠାତ ଚଢ଼ିଗଲେ ଯୁବକ। ଏହା ଦେଖି ତାଙ୍କୁ ବଞ୍ଚାଇବାକୁ ଉଦ୍ୟମ କରିବାରୁ ଟ୍ରେନ୍ ଉପର ଦେଇ ଯାଇଥିବା ଉଚ୍ଚ କ୍ଷମତା ସମ୍ପନ୍ନ ବିଦ୍ୟୁତ୍ ତାରକୁ ଧରି ଜଳିଗଲେ ଯୁବକ। ରାୟଗଡ଼ା ଜିଲା ଜେମାଦେଇପେଣ୍ଠ ଷ୍ଟେଶନ ନିକଟରେ ରବିବାର ଏଭଳି ଅଭାବନୀୟ ଘଟଣା ଘଟିଛି।
ସୂଚନା ଅନୁଯାୟୀ, ତାମ୍ବ୍ରମ-ଜସିଡିହ ସାପ୍ତାହିକ ସୁପରଫାଷ୍ଟ ଟ୍ରେନ୍ ଜେମାଦେଇପେଣ୍ଠ ଷ୍ଟେଶନ ଅଭିମୁଖେ ଯାଉଥିବାବେଳେ ଜଣେ ଯୁବକ ଟ୍ରେନ୍ ବଗି ଉପରେ ଚଢ଼ିଥିବା ଷ୍ଟେଶନରେ ଥିବା ରେଲ୍ଓ୍ବେ କର୍ମଚାରୀ ଦେଖିଥିଲେ। ତୁରନ୍ତ ଲୋକେ ପାଇଲଟଙ୍କୁ ଯୋଗାଯୋଗ କରି ଟ୍ରେନ୍ ଅଟକାଇବାକୁ କହିଥିଲେ। ଟ୍ରେନ୍ ଅଟକାଇ ପାଇଲଟ ଏବଂ ରେଲ୍ଓ୍ବେ କର୍ମଚାରୀ ଯୁବକଙ୍କୁ ଓହ୍ଲାଇଯିବାକୁ ଅନୁରୋଧ କରିଥିଲେ। ହେଲେ ଯୁବକ ଜଣକ ଓହ୍ଲାଇବା ବଦଳରେ ଉପର ଦେଇ ଯାଇଥିବା ବିଦ୍ୟୁତ୍ ତାରକୁ ଧରିଦେଇଥିଲେ। ଘଟଣାସ୍ଥଳରେ ସେ ଜଳି ଯାଇଥିଲେ। ଜିଆର୍ପି ଏବଂ ଆର୍ପିଏଫ୍ ଟିମ୍ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟକୁ ପଠାଇଦେଇଛି। ଯୁବକଙ୍କ ପରିଚୟ ମିଳି ପାରିନାହିଁ। ସେ ଏଭଳି ଚରମ ନିଷ୍ପତ୍ତି କାହିଁକି ନେଲେ ତାହା ମଧ୍ୟ ସ୍ପଷ୍ଟ ହୋଇନାହିଁ। ଯୁବକ ଜଣକ ପୂର୍ବ ଷ୍ଟେଶନ ପାର୍ବତୀପୁରମ୍ କିମ୍ବା ବୋବ୍ବିଲିରେ ଚଢ଼ିଥିବା ଅନୁମାନ କରାଯାଉଛି ବୋଲି ରାୟଗଡ଼ା ଆର୍ପିଏଫ୍ ଆଇଆଇସି ପଙ୍କଜ କୁମାର କହିଛନ୍ତି। ଘଟଣାର ଅଧିକ ତଦନ୍ତ ଚାଲିଥିବା ସେ କହିଛନ୍ତି।