ନୂଆଦିଲ୍ଲୀ,୧୬।୧୦: ପୂର୍ବତନ ଭାରତ ଅଣ୍ଡର-୧୯ ଅଧିନାୟକ ତଥା ସୌରାଷ୍ଟ୍ର ପକ୍ଷରୁ ଘରୋଇ ଟୁର୍ନାମେଣ୍ଟ ଖେଳୁଥିବା ଅଭି ବାରୋତଙ୍କ ଅକାଳ ବିୟୋଗ ଘଟିଛି। ମାତ୍ର ୨୯ ବର୍ଷ ବୟସରେ ହୃଦଘାତ ଯୋଗୁ ଏହି କ୍ରିକେଟରଙ୍କ ଦେହାନ୍ତ ହୋଇଛି।
ଶୁକ୍ରବାର ଘରେ ଥିବା ବେଳେ ଅସୁସ୍ଥ ଅନୁଭବ କରିଥିଲେ ଅଭି। ପରେ ତାଙ୍କୁ ଆମ୍ବୁଲାନ୍ସ ଯୋଗେ ଡାକ୍ତରଖାନା ନିଆଯାଉଥିଲା। ହେଲେ ବାଟରେ ତାଙ୍କର ମୃତ୍ୟୁ ଘଟିଥିଲା। ଅଭିଙ୍କ ମୃତ୍ୟୁ ପରେ ସୌରାଷ୍ଟ୍ର କ୍ରିକେଟ ଆସୋସିଏଶନ (ଏସ୍ସିଏ) ସ୍ତବ୍ଧ ହୋଇଯାଇଛି।
ଏସ୍ସିଏର ଅଧ୍ୟକ୍ଷ ଜୟଦେବ ଶାହ ଶୋକବ୍ୟକ୍ତ କରିବା ସହ ହରିୟାଣାରୁ ତାଙ୍କୁ ସୌରାଷ୍ଟ୍ର ଆଣିଥିବା କହିଛନ୍ତି। ଅଭି ତାଙ୍କର କ୍ୟାରିୟର ପାଇଁ ସର୍ବଦା ମନେ ରହିବେ। ୪୨ ବର୍ଷରେ ଅଭିଙ୍କ ବାପାଙ୍କ ଦେହାନ୍ତ ହୋଇଥିଲା। ଏଣୁ ତାଙ୍କ ପରେ ମା’ ଏବଂ ସ୍ତ୍ରୀଙ୍କ ଦୁନିଆ ଥିଲେ ସେ। ସ୍ତ୍ରୀ ଗର୍ଭବତୀ ଥିବାରୁ ଏବେ ତାଙ୍କର ସନ୍ତାନ ହୋଇଥାନ୍ତା। ହେଲେ ଭାରତ ପାଇଁ ଖେଳିବା ଏବଂ ବାପା ହେବାର ଖୁସି ସେ ଅନୁଭବ କରିପାରିଲେ ନାହିଁ ବୋଲି ଶାହ କହିଛନ୍ତି। ପରିବାରକୁ ଏଭଳି ଦୁଃଖରୁ ମୁକୁଳିବାକୁ ସମୟ ଲାଗିବ ବୋଲି ସେ ମଧ୍ୟ କହିଛନ୍ତି।
କହିରଖୁଛୁ, ଡାହାଣହାତୀ ବ୍ୟାଟ୍ସମ୍ୟାନ୍ ଅଭି ୩୮ ପ୍ରଥମ ଶ୍ରେଣୀ, ୩୮ ଲିଷ୍ଟ ଏ ଓ ୨୦ ଘରୋଇ ଟି-୨୦ ମ୍ୟାଚ୍ ଖେଳିଛନ୍ତି। ସେ ୨୦୧୧ରେ ଭାରତର ଅଣ୍ଡର-୧୯ ଟିମ୍ର ଅଧିନାୟକ ଥିଲେ। ନିକଟରେ ଶେଷ ହୋଇଥିବା ସୟିଦ ମୁସ୍ତାକ ଅଲ୍ଲୀ ଟ୍ରଫିରେ ସେ ୫୩ ବଲ୍ରେ ବିସ୍ଫୋରକ ୧୨୨ ରନ୍ କରି ଚର୍ଚ୍ଚାର ପରିସରକୁ ଆସିଥିଲେ। ଏବେ ଏହି କ୍ରିକେଟରଙ୍କ ବିୟୋଗରେ ବିଶିଷ୍ଟ କ୍ରିକେଟରମାନେ ଶୋକବ୍ୟକ୍ତ କରିବା ସହ ପରିବାରକୁ ସମବେଦନା ଜଣାଉଛନ୍ତି।
