ପ୍ରେମରେ ପଡ଼ିଥିବା ପ୍ରେମୀଯୁଗଳ ସବୁକିଛି କରିବାକୁ ପ୍ରସ୍ତୁତ ରହିଥାନ୍ତି। ଯେତେବେଳେ ପ୍ରେମିକ ଜଣକ ତାଙ୍କ ପ୍ରେମିକାଙ୍କୁ ପ୍ରପୋଜ କରିଥାନ୍ତି ସେତେବେଳେ ପ୍ରେମିକାଙ୍କ ପାଦ ତଳେ ଲାଗେନି। କିନ୍ତୁ ଅଷ୍ଟ୍ରିଆର ଜଣେ ପ୍ରେମିକ ତାଙ୍କ ପ୍ରେମିକାଙ୍କୁ ପ୍ରପୋଜ କରିବା ଭାରି ପଡ଼ିଛି। ପ୍ରେମିକ ପ୍ରପୋଜ କରିବା ପରେ ଖୁସିରେ ତାଙ୍କ ପ୍ରେମିକାଙ୍କ ଗୋଡ଼ ଖସିଗଲା ଏବଂ ସେ ପାହାଡ଼ ଉପରୁ ୬୫୦ ଫୁଟ ଗଭୀରକୁ ଖସିପଡ଼ିଲେ।
ଏହି ଘଟଣା ଅଷ୍ଟ୍ରିଆର କାରିନ୍ଥିଆ ଅଞ୍ଚଳରୁ ଆସିଛି। ଯେଉଁଠାରେ ପ୍ରେମୀଯୁଗଳ ପ୍ରେମର ଏହି ବିଶେଷ ମୁହୂର୍ତ୍ତକୁ ଖୁସିରେ ଉପଭୋଗ କରିବାକୁ ଯାଇଥିଲେ। ମାତ୍ର ତାହା ଦୁଃସ୍ବପ୍ନରେ ପରିଣତ ହେଲା। ପ୍ରେମିକ ଜଣକ ପ୍ରେମିକାଙ୍କୁ ପ୍ରପୋଜ କରିବା ମାତ୍ରେ ସେ ଖୁସିରେ ଆତ୍ମବିଭୋର ହୋଇଯାଇଥିଲେ। ଏହି ସମୟରେ ତାଙ୍କ ପାଦ ଖସି ଯାଇଥିଲା। ଫଳରେ ସେ ୬୫୦ ଫୁଟ ତଳକୁ ଖସିପଡ଼ିଲେ।
ଏତେ ଉଚ୍ଚରୁ ଖସି ପଡ଼ିବା ପରେ ମଧ୍ୟ ପ୍ରେମିକା ଜଣକ ବଞ୍ଚି ଯାଇଛନ୍ତି। କାରଣ ତଳେ ପ୍ରବଳ ତୁଷାରପାତ ହୋଇଥିଲା। ଫଳରେ ତାଙ୍କୁ ଆଘାତ ଲାଗି ନ ଥିଲା। ପ୍ରେମିକ ଜଣକ ମଧ୍ୟ ତାଙ୍କ ପ୍ରେମିକାକୁ ବଞ୍ଚାଇବାକୁ ଡେଇଁ ପଡ଼ିଥିଲେ। ତେବେ ତାଙ୍କର ଗୋଡ଼ ଭାଙ୍ଗି ଯାଇଛି। ଏହି ଘଟଣା ଗତ ୨୭ ତାରିଖରେ ଘଟିଥିଲା।
ପ୍ରେମିକା ଚେତାଶୂନ୍ୟ ଅବସ୍ଥାରେ ପଡ଼ିଥିଲେ। ଜଣେ ପର୍ଯ୍ୟଟକ ତାଙ୍କୁ ଦେଖିବା ପରେ ସୁରକ୍ଷାକର୍ମୀଙ୍କୁ ସୂଚନା ଦେଇଥିଲେ। ଏହା ପରେ ଉଭୟଙ୍କୁ ହେଲିକପ୍ଟର ଯୋଗେ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଦୁହେଁ ସୌଭାଗ୍ୟ ବଶତଃ ବଞ୍ଚି ଯାଇଛନ୍ତି। ଘଟଣାସ୍ଥଳରେ ଉପସ୍ଥିତ ଜଣେ ପୋଲିସ ଅଧିକାରୀ କହିଛନ୍ତି, ‘ଦୁହେଁ ଅତ୍ୟନ୍ତ ଭାଗ୍ୟବାନ’ ଯଦି ପଥର ଉପରେ ତୁଷାରପାତ ନ ଥାନ୍ତା, ତେବେ ପରିଣାମ ଅଲଗା ହୋଇଥାନ୍ତା।
