ତେହରାନ,୨୮ା୧୦: ଇରାନର ରାଜଧାନୀ ତେହରାନରେ ମେଟ୍ରୋ ଟ୍ରେନ୍ରେ ଯାତ୍ରା କରୁଥିବା ସମୟରେ ସନ୍ଦେହଜନକ ଅବସ୍ଥାରେ ଆହତ ହୋଇଥିବା ଯୁବତୀ ଅରମିତା ଗେରାବନ୍ଦଙ୍କର ମୃତ୍ୟୁ ଘଟିଛି। ସେ ବିନା ହିଜାବରେ ମେଟ୍ରୋରେ ଯାତ୍ରା କରୁଥିଲେ। ଅରମିତା କିଛି ସପ୍ତାହ ହେଲା କୋମାରେ ଥିବା ବେଳେ ଶନିବାର ତାଙ୍କର ମୃତ୍ୟୁ ଘଟିଛି।
ଏହାକୁ ନେଇ ଦେଶରେ ପୁଣିଥରେ ବିରୋଧ ପ୍ରଦର୍ଶନ ହେବାର ଆଶଙ୍କା ରହିଛି। ହିଜାବ ବିନା ଧରାଯାଇଥିବା ୨୨ ବର୍ଷୀୟ ମହସା ଆମିନୀଙ୍କ ପୋଲିସ ହେପାଜତରେ ମୃତ୍ୟୁର ଏକ ବର୍ଷ ପରେ ଏହି ଘଟଣା ଘଟିଛି। ଏହି ଘଟଣା ପରେ ଦେଶବ୍ୟାପୀ ହିଂସାତ୍ମକ ବିରୋଧ ପ୍ରଦର୍ଶନ କରାଯାଇଥିଲା।
ଅକ୍ଟୋବର ୧ରେ ମେଟ୍ରୋ ଟ୍ରେନ୍ରେ ଅରମିତାଙ୍କ ସହ କ’ଣ ଘଟିଛି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ତାଙ୍କର ଜଣେ ବନ୍ଧୁ କହିଛନ୍ତି, ତାଙ୍କ ମୁଣ୍ଡ ପ୍ଲାଟଫର୍ମରେ ପିଟି ହୋଇଯାଇଥିଲା। ତେବେ ମାନବାଧିକାର କର୍ମୀମାନେ ତାଙ୍କୁ ହିଜାବ ନ ପିନ୍ଧି ଠେଲି ଦିଆଯାଇଥିବା ଅଭିଯୋଗ କରିଛନ୍ତି। ମିଳିତ ଜାତିସଂଘରୁ ନିରପେକ୍ଷ ତଦନ୍ତ ଦାବି ହୋଇଛି।