ଭୁବନେଶ୍ୱର, ୨୧।୯ (ବ୍ୟୁରୋ): ରାଜଧାନୀରେ ଏକ ଅଭାବନୀୟ ଘଟଣା ଘଟିଛି। ସାନଭାଇକୁ ଆକଟ କରି ମାଡ଼ ମାରିବାରୁ ତାଙ୍କର ମୃତ୍ୟୁ ହୋଇଛି। ମୃତକ ହେଲେ ରାଜମୋହନ ସେନାପତି (୨୧)। ନୟାପଲ୍ଲୀ ଥାନା ପୋଲିସ ଏହି ଘଟଣାରେ ଏକ ହତ୍ୟା ମାମଲା (ନଂ.୬୨୯/୨୦୨୨) ରୁଜୁ କରି ଅଭିଯୁକ୍ତ ବଡ଼ଭାଇ ବିଶ୍ୱମୋହନ ସେନାପତି (୨୪)ଙ୍କୁ ମଙ୍ଗଳବାର ଗିରଫ କରିଛି। ତାଙ୍କ ଘର ନୟାଗଡ଼ ଜିଲା ଇଟାମାଟି ଥାନା ଅନ୍ତର୍ଗତ ବାରୁଡ଼ ଗ୍ରାମରେ ହୋଇଥିବାବେଳେ ସେ ନୟାପଲ୍ଲୀ ନୂଆସାହିରେ ରହୁଥିଲେ। ଅପରପକ୍ଷରେ ରାଜମୋହନଙ୍କ ମୃତଦେହକୁ କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଥାନାଧିକାରୀ ବିଶ୍ୱରଞ୍ଜନ ସାହୁ କହିଛନ୍ତି, ମାଡ଼ରେ ବ୍ୟବହୃତ ଏକ ଆଲୁମିନିୟମ୍ ପ୍ଲେଟ୍ ଜବତ ହୋଇଛି। ଅଭିଯୁକ୍ତ ବଡ଼ଭାଇ ବିଶ୍ୱମୋହନଙ୍କୁ ବୁଧବାର କୋର୍ଟଚାଲାଣ କରାଯିବ ବୋଲି ସେ କହିଛନ୍ତି।
ସୂଚନା ଅନୁଯାୟୀ, ବଡ଼ଭାଇ ବିଶ୍ୱମୋହନ ତାଙ୍କ ୨ ସାଙ୍ଗଙ୍କ ସହ ନୂଆସାହିରେ ରହୁଛନ୍ତି। ସେ ଏମ୍ବିଏ ପଢ଼ିଥିଲେ। କିଛିଦିନ ତଳେ ସେ ବ୍ୟାଙ୍କରେ ଏକ ସ୍ବତନ୍ତ୍ର ପଦବୀରେ ଚାକିରି ପାଇଁ ପ୍ରିଲିମ୍ ଓ ମେନ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ। ତାଙ୍କର କେବଳ ବ୍ୟକ୍ତିଗତ ସାକ୍ଷାତ୍କାର ବାକି ଥିଲା। ଏପଟେ ସାନ ଭାଇ ରାଜମୋହନ ଆନ୍ଧ୍ର ବିଶ୍ୱବିଦ୍ୟାଳୟରେ ବି.ଇଡି କରିବା ସହ ପ୍ରତିଯୋଗିତାମୂଳକ(କମ୍ପିଟେଟିଭ) ପରୀକ୍ଷା ପାଇଁ ପ୍ରସ୍ତୁତି କରୁଥିଲେ। ସେ ୨ସାଙ୍ଗଙ୍କ ସହ ବରମୁଣ୍ଡାରେ ରହୁଥିଲେ। ତେବେ ରାଜମୋହନ ପାଠ ଠିକ୍ ଭାବେ ପଢ଼ୁ ନ ଥିଲେ। ସେ ପ୍ରାୟ ସମୟରେ ଘରକୁ ପଳାଇଯାଇ ଟଙ୍କା ଚୋରି କରି ଆଣି ଏଠାରେ ବ୍ୟାପକ ଖର୍ଚ୍ଚ କରୁଥିଲେ। ଏଥିପାଇଁ ପରିବାର ସଦସ୍ୟ ମଧ୍ୟ ମାନସିକ ଚିନ୍ତାରେ ରହୁଥିଲେ। ତେଣୁ ରାଜମୋହନଙ୍କୁ ସୋମବାର ସନ୍ଧ୍ୟାରେ ବିଶ୍ୱମୋହନ ନୂଆସାହିସ୍ଥିତ ଭଡ଼ାଘରକୁ ନେଇ ଆସିଥିଲେ। ସେଠାରେ ରାଜମୋହନଙ୍କୁ ଠିକ୍ରେ ପାଠ ପଢ଼ିବା ସହ ଅଯଥା ଖର୍ଚ୍ଚ ନ କରିବାକୁ ତାଗିଦ କରିଥିଲେ, ଯାହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ପରେ ଏକ ଆଲୁମିନିୟମ୍ ପ୍ଲେଟ୍ରେ ରାଜମୋହନଙ୍କୁ ବିଶ୍ୱମୋହନ ମାଡ଼ ମାରିଥିଲେ। ଫଳରେ ରାଜମୋହନଙ୍କ ଶରୀରର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଥିଲା। ଏହାପରେ ରାଜମୋହନଙ୍କୁ ତାଙ୍କ ସାଙ୍ଗ ଆସି ବରମୁଣ୍ଡା ନେଇଯାଇଥିଲେ। ତେବେ କିଛି ସମୟ ପରେ ବଡ଼ ଭାଇ ବରମୁଣ୍ଡା ଯାଇ ମେଡିସିନ୍ ଦେଇଥିଲେ। ଦେହ ଠିକ୍ ନ ହେବାରୁ ସାଙ୍ଗଙ୍କ ସହ ସାନଙ୍କୁ ବିଶ୍ୱମୋହନ କ୍ୟାପିଟାଲ ହସ୍ପିଟାଲ ନେଇଯାଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ କ୍ୟାପିଟାଲ ହସ୍ପିଟାଲ ଫାଣ୍ଡି ନୟାପଲ୍ଲୀ ଥାନାକୁ ଖବର ଦେବା ପରେ ଘଟଣା ପଦାକୁ ଆସିଥିଲା।
