ଭେଡ଼େନ,୨୬।୬(ସୁଦନ ମହାକୁର): ବରଗଡ଼ ଜିଲା ଭେଡ଼େନ ଥାନା ତାଲମେଣ୍ଡା ପଞ୍ଚାୟତ ଅନ୍ତର୍ଗତ ସାନପିପିଲିପାଲି ଗ୍ରାମରେ ନିଜ ବଡ଼ ଭାଇକୁ ହତ୍ୟା ଅଭିଯୋଗରେ ରବି ପଧାନ (୩୬)ଙ୍କୁ ପୋଲିସ ଗିରଫ କରି ସୋମବାର କୋର୍ଟଚାଲାଣ କରିଛି । ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।
ପ୍ରକାଶ ଯେ, ଭେଡ଼େନ ଥାନା ଅନ୍ତର୍ଗତ ସାନପିପିଲିପାଲି ଗ୍ରାମର ଏକ ବନ୍ଦ କୋଠରୀରୁ ମଣ୍ଟୁ ପଧାନ(୪୦)ଙ୍କ ରକ୍ତାକ୍ତ ମୃତଦେହକୁ ପୋଲିସ ରବିବାର ଜବତ କରିଥିଲା। ଏହାସହ ମାଜିଷ୍ଟ୍ରେଟଙ୍କ ଉପସ୍ଥିତରେ ସାଇଣ୍ଟିଫିକ୍ ଟିମ୍ ଏବଂ ଅନୁସନ୍ଧାନୀ କୁକୁର ସାହାଯ୍ୟରେ ଘଟଣାର ଛାନଭିନ୍ କରିଥିଲା। ପାରିପାର୍ଶ୍ୱିକ ସ୍ଥିତି ଏବଂ ମୃତକଙ୍କ ମୁଣ୍ଡରେ ରହିଥିବା ଗଭୀର କ୍ଷତଚିହ୍ନରୁ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାରିଥିଲା। ଘଟଣାସ୍ଥଳରୁ ପୋଲିସ ଏକ ରକ୍ତଲଗା କାଠ ଫାଳିଆ ଜବତ କରିବା ସହ ଭେଡ଼େନ ଥାନାରେ ଏକ ମାମଲା (ନଂ.୧୯୮।୨୩) ରୁଜୁ କରିଥିଲା। ମୃତକଙ୍କ ସାନ ଭାଇ ରବିଙ୍କୁ ଥାନାରେ ଅଟକ ରଖି ପଚରାଉଚରା କରିବାରୁ ସେ ହତ୍ୟା କରିଥିବା ସ୍ବୀକାର କରିଛନ୍ତି ବୋଲି ଥାନାଧିକାରୀ ପ୍ରେମଜିତ ଦାଶ ସୂଚନା ଦେଇଛନ୍ତି ।
ଥାନାଧିକାରୀ ଦାଶଙ୍କ ସୂଚନା ଅନୁସାରେ, ମୃତକଙ୍କ ସ୍ତ୍ରୀ ବାପଘରକୁ ଚାଲିଯିବା ପରେ ମଣ୍ଟୁ ଓ ରବି ଏକାଠି ରହୁଥିଲେ। ଶନିବାର ସନ୍ଧ୍ୟାରେ ରବି ପ୍ରଚୁର ମଦ୍ୟପାନ କରି ଘରକୁ ଆସିଥିଲେ। ଏହି ସମୟରେ ମଣ୍ଟୁ ଏତେବେଳେ ଘରକୁ ଫେରୁଛୁ କହି ରୋଷେଇ ପାଇଁ ରବିଙ୍କୁ ପାଣି ଆଣିବାକୁ କହିବାରୁ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ରବି ଏକ କାଠ ଫାଳିଆରେ ମଣ୍ଟୁଙ୍କ ମୁଣ୍ଡରେ ପ୍ରହାର କରିଥିଲା । ଫଳରେ ଘଟଣାସ୍ଥଳରେ ମଣ୍ଟୁଙ୍କ ମୃତ୍ୟୁ ହୋଇଥିଲା ବୋଲି ଥାନାଧିକାରୀ ଦାଶ କହିଛନ୍ତି।