ବ୍ରହ୍ମପୁର ଅଫିସ, ୩୦।୧୦: ଏକ ଆକ୍ରମଣ ମାମଲାରେ ଟାଉନ ଥାନା ପୋଲିସ ଜଣେ ଯୁବକଙ୍କୁ ଗିରଫ କରିଛି। ଅଭିଯୁକ୍ତ ଜଣଙ୍କ ଜାଗିଲିସାହିର ଶିବ ନାୟକ(୨୯)। ପୋଲିସ ଅଭିଯୁକ୍ତଙ୍କଠାରୁ ବ୍ୟବହୃତ ଏକ ଖଣ୍ଡା ଜବତ କରିଛି। ଏନେଇ ପୋଲିସ ଏକ ମାମଲା(ନଂ.୩୧୭/୨୨) ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି। କୋର୍ଟ ନିର୍ଦ୍ଦେଶ ଅନୁସାରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ଘଟଣାରୁ ପ୍ରକାଶ ଯେ, ଜରଡ଼ା ଥାନା ଅନ୍ତର୍ଗତ ସୁରଙ୍ଗୀ ଶାସନର ଶଙ୍କର ପାଢ଼ୀ କୌଣସି କାମରେ ଶୁକ୍ରବାର ବ୍ରହ୍ମପୁର ଆସିଥିଲେ। ପରେ ସେ ଜାଗିଲି ସାହିରେ ଥିବା ଏକ ପାନ ଦୋକାନରୁ ପାନ କିଣୁ ଥିଲେ। ନିଶାସକ୍ତ ଅବସ୍ଥାରେ ଥିବା ଶିବ ନାୟକ ସେଠାରେ ପହଞ୍ଚି ଶଙ୍କରଙ୍କୁ ଟଙ୍କା ମାଗିଥିଲେ। ସେ ଟଙ୍କା ଦେବାକୁ ମନା କରିଦେଇଥିଲେ। ଫଳରେ ଶିବ ଧରିଥିବା ଏକ ଖଣ୍ଡାରେ ଶଙ୍କରଙ୍କ ମୁଣ୍ଡ ଉପରେ ଚୋଟ ପକାଇବା ବେଳେ ଖଣ୍ଡା ଚୋଟ ତାଙ୍କ ହାତରେ ବାଜିଥିଲା। ସ୍ଥାନୀୟ ଲୋକ ତାଙ୍କୁ ଉଦ୍ଧାର କରି ହସ୍ପିଟାଲ ପଠାଇଥିଲେ। ଏନେଇ ଶଙ୍କର ଟାଉନ ଥାନାରେ ଅଭିଯୋଗ କରିଥିଲେ। ପୋଲିସ ଘଟଣାର ତଦନ୍ତ ପରେ ଶିବଙ୍କୁ ଗିରଫ କରିଥିଲା।