ବ୍ରହ୍ମପୁର ଅଫିସ,୧୯ା୧: ବେଆଇନ ଭାବେ ବିରଳ ପ୍ରଜାତିର ପ୍ରାଣୀ କିମ୍ବା ପକ୍ଷୀଙ୍କୁ ରଖିବା ଦଣ୍ଡନୀୟ ଅପରାଧ। ଏଭଳି ପରିସ୍ଥିତିରେ ଏକ କଇଁଛକୁ ଧରି ପାଳିବା ପାଇଁ ଘରକୁ ନେଉଥିବା ବେଳେ ପଶ୍ଚିମବଙ୍ଗ ଛବିଶପ୍ରଗଣା ଜିଲାର ତପନ ମଣ୍ଡଳଙ୍କୁ ମହଙ୍ଗା ପଡିଛି। ଟ୍ରେନ୍ରେ ତପନ ଆନ୍ଧ୍ରପ୍ରଦେଶର ରାଜମହେନ୍ଦ୍ରିରୁ ପଶ୍ଚିମବଙ୍ଗ ଘରକୁ ଯାଉଥିବା ବେଳେ ବ୍ରହ୍ମପୁର ଆରପିଏଫ୍ ତାଙ୍କୁ କାବୁ କରି ବନ ବିଭାଗକୁ ହସ୍ତାନ୍ତର କରିଛିି। କଇଁଛକୁ ବନ ବିଭାଗ ଜବତ କରିଥିବା ବେଳେ ତପନଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି। ଚଳିତ ମାସ ୨୭ତାରିଖରେ ତାଙ୍କ ଜାମିନ ଆବେଦନର ଶୁଣାଣି ହେବ। ଏନେଇ ମୁଦାଲାଙ୍କ ପକ୍ଷରୁ ଜାମିନ ଆବେଦନ କରାଯାଇଥିବା ତାଙ୍କ ଓକିଲ ଅନିରୁଦ୍ଧ ପାତ୍ର ସୂଚନା ଦେଇଛନ୍ତି।
ପ୍ରକାଶ ଯେ, ପଶ୍ଚିମବଙ୍ଗ ଅଞ୍ଚଳର ତପନ ଦୀର୍ଘ ବର୍ଷ ଧରି ଆନ୍ଧ୍ରପ୍ରଦେଶର ରାଜମହେନ୍ଦ୍ରିରେ ଦାଦନ ଶ୍ରମିକ ଭାବେ କାର୍ଯ୍ୟ କରୁଥିଲେ। ସେଠାରେ ଏକ ବିଲରୁ ଏକ କଇଁଛ ପାଇଥିଲେ। ତାହାକୁ ସେ ଟ୍ରେନ୍ରେ ଧରି ପଶ୍ଚିମବଙ୍ଗ ବାହାରିଥିଲେ। ଟ୍ରେନ୍ରେ ଯାଉଥିବା ବେଳେ ଯୁବକଙ୍କୁ କଇଁଛ ଦେଖାଇ ଫଟୋ ଉଠାଇଥିଲେ। ହେଲେ ଜଣେ ଯୁବକ କଇଁଛ ସହ ଫଟୋ ଉଠାଇ ଟୁଇଟରରେ ପୋଷ୍ଟ କରିବା ସହ ଟ୍ରେନ୍ ଓ ବଗି ନମ୍ବର ମଧ୍ୟ ଲେଖି ଥିଲେ। ଟୁଇଟରରେ କଇଁଛ ପୋଷ୍ଟ ଦେଖି ବନ୍ୟଯନ୍ତୁ ପ୍ରେମୀ ଉଦ୍ବେଗ ପ୍ରକାଶ କରିଥିଲେ। ଟୁଇଟ୍ କେନ୍ଦ୍ର ସରକାରଙ୍କ ବନ୍ୟଜନ୍ତୁ ସୁରକ୍ଷା ମନ୍ତ୍ରଣାଳୟ ନିକଟରେ ପହଞ୍ଚି ଥିଲା। ବନ୍ୟଜନ୍ତୁ ମନ୍ତ୍ରଣାଳୟ ବ୍ରହ୍ମପୁର ଆରପିଏଫ୍ ସହ ଯୋଗାଯୋଗ କରି ବୁଧବାର ରାତିରେ ବ୍ରହ୍ମପୁରରେ ଟ୍ରେନ୍ ପହଞ୍ଚିବା ପରେ ଚଢାଉ କରାଯାଇ କଇଁଛ ସହ ତପନଙ୍କୁ କାବୁ କରିଥିଲେ।